Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxvij. Capittel.

¶ Van de Arcke des getuychenissen, met haren hantboomen.

1

⁺ ENde Bezaleel^* maecte de Arcke van vueren houte twee ellen ende een halue lanc, anderhalue elle breet ende hooch,

+ A vers 1

* Exod. 25.b.10

2

Ende ouertrocse met louteren goude, binnen ende buyten. Ende hy maecte haer om ende om eenen gulden crans,

3

Ende goot haer vier gulden ringhen aen haer vier hoecken, op elcke side twee.

4

Ende hy maecte hantboomen van vueren hout, ende ouertrocse met goude,

5

Ende stacse in de ringen aen de siden van der Arcken datmense dragen mocht.

6

Ende hy maecte den Genadenstoel van louteren goude, twee ellen ende een halue lanck, ende anderhalf elle breet.

7

Ende hy maecte twee Cherubim van ghesuyuert gout, aen de twee eynden des Ghenadenstoels.

8

Een Cherub aen dat een eynde, den anderen aen dander eynde.

9

Ende de Cherubim breyden wt hare vluegelen van bouen, ende bedecten daer mede den Genaden stoel, ende hare aensichten stonden tegen malcanderen, ende saghen opden Ghenaden stoel.

[p. 35v]

10

^+† Ende hy maecte de Tafel van vueren houte, twee ellen lanc, een elle breet, ende anderhalf elle hooch,

+ B vers 10

† Exod. 25.c.23.

11

Ende ouertrocse met louteren goude. Ende maecte eenen gulden crans rontom,

12

Ende maecte haer eenen lijst rontom, een hantbreet hooch. Ende hy maecte eenen gulden Crans rontom den lijst.

13

Ende hy goot daer toe vier gulden Ringen, ende maectese aen de vier hoecken, aen haer vier voeten vast aen den lijst,

14

Dat de Hantboomen daer inne waren, daermede datmen de Tafele droech.

15

Ende hy maecte de hantboomen van vueren houte, ende ouertrocse met gout, datmen de Tafel daer mede droech.

16

Ende hy maecte ooc van louteren goude de Iuweelen totter tafelen, Schotelen, bekers, Cannen ende Schalen, daer mede datmen wt ende in schencte.

17

⁺ Ende hy maecte den^† Candelaer van louteren gheslegen goude, daer aen was de schacht met Armen, Schalen, Knoopen, ende Bloemen.

+ C vers 17

† Exod. 25.d.31.

18

Ses armen ghinghender ter siden wt, ter elcker siden drie armen.

19

Drie schalen waren aen elcken Arm met knoopen ende bloemen.

20

Maer aenden Candelaer waren vier schalen, met knoopen ende bloemen, te weten,

21

Onder twee Armen eenen knoop, dat alsoo ses Armen wt hem ghingen,

22

Ende haer knoopen ende Armen daer aen. Ende het was al gesmeet louter gout.

23

Ende hy maecte de seuen Lampen met haren keers snutters ende Blushoornen, van louteren goude,

24

Van eenen^† talent fijns gouts maecte hy hem, ende alle zijn ghereetschap.

† Centuer.

25

⁺ Hy maecte oock den Rooc altaer van vueren houte, een elle lanck ende breet, ghelijck viercant, ende twee ellen hooch, met zijnen hoornen,

+ D vers 25

26

Ende ouertooch hem met louteren goude, zijn dack ende zijne wanden rontomme, ende zijn hoornen. Ende maecte hem eenen Crans rontom van louteren goude,

27

Ende twee gulden Ringhen onder den Crans, aen beyde de siden, datmen hantboomen daer in stake, ende hem daermede droeghe.

28

Maer de hantboomen maecte hy van vueren hout ende ouertrocse met gout.

29

Ende hy maecte de heylige Salue ende roocwerck van reynder speceryen, na der Apotekers const.