Den Bibel, Inhoudende dat Oude ende Nieuwe Testament (Biestkensbijbel)

[p. 35r]

¶ Dat .xxxvj. Capittel.

¶ Hier wort vertelt wat sy gemaect hebben.

1

⁺ DOen arbeyden Bezaleel ende Ahaliab, ende alle wijse mannen, dien de HEEre wijsheyt ende verstandt ghegheuen hadde, om te weten hoe sy alderley werck maken souden, tot den dienst des Heylichdoms, na alle dat de HEERE gheboden hadde.

+ A vers 1

2

Ende Mose riep Bezaleel ende Ahaliab, ende alle wijse mannen, dien de HEEre wijsheyt ghegheuen had int herte, te weten, alle die hen ghewillichlijck daer toe boden, ende daer toe traden, om te arbeyden aent werck.

3

Ende sy namen tot hen van Mose alle Heffinghen, die de kinderen Israels brachten tot den werc des dienst des Heylichdoms, op dattet ghemaect werde. Want sy brochten alle morghen haer willighe gaue tot hem.

4

⁺ Doe quamen alle wijse die aent werc des Heylichdoms arbeyden, een yegelijc van zijnen wercke dat sy maecten,

+ B vers 4

5

Ende spraken tot Mose: Dat volck brengt te vele, meer dan tot den werck des dienst van noode is, dat de HEEre gheboden heeft te maken.

6

Doe gheboot Mose, datmen liet roepen door den legher: Niemant en brenghe meer toe, totter Heffinge des Heylichdoms. Doe hielt dat volc op te brenghen,

7

Want alle dinck wasser ghenoech tot allen wercke datter te maken was, ende noch daer ouer.

8

Also maecten alle wijse mannen onder de arbeyders aent werck^* de Wooninge thien Tapeten van witter ghetwernder siden, gheelder siden, schaerlaken, rosetroot, Cherubim, constelijck.

* Exod. 26.a.1.

9

De lengte eender Tapeten was achtentwintich ellen, ende de breede vier ellen, ende waren al van eender maten.

10

Ende hy knoopte vijf tapeten tsamen deen aen die andere.

11

⁺ Ende hy maecte gheele knopkens aenden rant van elcker Tapete, daer sy te samen gheuoecht werden,

+ C vers 11

12

Te weten, vijftich knopkens aen eender tapete, daer dat een dat ander mede vatte.

13

Ende hy maecte vijftich gulden ringskens, ende voechde de Tapeten met den ringskens, die een aen de andere te samen, dattet een Wooninghe wert.

14

Ende hy maecte elf Tapeten^* van geyten hayr, totter Hutten ouer de Wooninge.

* Exod. 26.b.7.

15

Dertich ellen lanck, ende vier ellen breet, alle van eender maten.

16

Ende hy voechdese haerder vijf tsamen op een side, ende ses tsamen op de ander side,

17

Ende hy maecte vijftich knopkens aen elc Tapeet aenden rant, daer mede dat sy tsamen gehecht werden.

18

Ende hy maecte vijftich metale ringskens, daer mede dat de Hutte tsamen in een geuoecht wert.

19

Ende hy maecte een decsel ouer de Hutte van rootachtige Rams vellen, ende daer ouer noch een decsel van Dasch vellen.

20

^+† Ende hy maecte berderen totter Wooninghe van vueren houte, die staen souden,

+ D vers 20

† Exod. 26.c.15.

21

Een yeghelijc thien ellen lanc, ende anderhalf elle breet,

22

Ende aen yegelijcke twee tappen, daer mede dat deen aen dan-der geset wert. Also maecte hy alle berderen ter Wooninge,

23

Dat der seluer berderen twintich stonden Suytwaert,

24

Ende maecte veertich silueren voeten daer onder, onder elck berdt twee voeten aen zijn twee tappen.

25

Aldus ter ander siden der Wooninghe tegent Noorden, maecte hy, ooc twintich berderen,

26

Met veertich silueren voeten, onder elck bert twee voeten.

27

Mer achter aen de Wooninge tegent Westen, maecte hy ses berderen,

28

Ende twee ander op de twee hoecken der Wooninghe achter aen,

29

Dat elck bert met zijnen hoeckberde, van onder op voechde, ende bouen aent hooft tsamen quamen, met eender scroeuen,

30

Datter acht berderen werden, ende sesthien silueren voeten, onder elcken berde twee voeten.

31

⁺ Ende hy maecte rijchels van vueren hout, vijf tot den berderen opter eender siden der Wooninghe,

+ E vers 31

32

Ende vijf opter ander siden, ende vijf achter aen, teghent Westen.

33

Ende hy maecte de rijchelen datse midden aen de berderen door, henen gestooten werden, vanden eenen eynde totten anderen,

34

Ende hy ouertrock de berderen met goude. Mer haer ringen maecte hy van goude, tot den rijchelen, ende ouertooch de rijchelen met goude.

35

Ende hy maecte dat voorhancsel met den Cherubim daer aen, constelijck van gheelder siden, scaerlaken, rosetroot, ende getwernder witter side.

36

Ende hy maecte daer toe vier columnen van vueren houte, ende ouertrocse met goude, ende haer hoofden van goude, ende daer toe goot hy vier silueren voeten,

37

Ende hy maecte een Laken in de duere der Hutten, van geelder siden, van schaerlaken, rosetroot ende getwernder witter siden gestict,

38

Ende vijf columnen daer toe met haren hoofden, ende ouertooch hare hoofden, ende de reepen met goude, ende vijf metalen voeten daer aen.