Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxj. Capittel.

¶ Wat wercmeesters datmen hebben soude om dat voorschreuen te maken. Van de houdinghe des Sabbaths, van de gheuinghe der steenen tafelen.

[p. 33r]

1

⁺ Ende de HEEre sprack met Mose, segghende:

+ A vers 1

2

Siet,^* Ick, heb met namen geroepen, Bezaleel Vri soon, die Hurs soon was, vanden stammen Iuda,

* Exod. 35.d.30 1.Par. 2.d.20.

3

Ende hebbe hem veruult met den gheest Gods, met wijsheyt ende verstant, ende wetenheyt, ende met alderley werc,

4

Constelijck, om in gout te wercken, in siluer, metael,

5

Constelijck steen te snijden, ende in te setten, ende constelijc te timmeren van houte, te maken alderley werc,

6

Ende siet, ick hebbe hem eenen gheselle ghegheuen Ahaliab, Ahisamachs soon, vanden stamme Dan. Ende ick heb alderley wijsen, de wijsheyt in therte gegheuen, dat si maken sullen al wat ick v gheboden hebbe:

7

^+† De Hutte des ghetuychenis, de Arcke des ghetuychenis, den Ghenaden stoel daer op, ende alle ghereetschap der Hutten.

+ B vers 7

† Exod. 25. 26. 27. 28. 30.

8

De Tafele ende zijn ghereetschap, den fijnen Candelaer, ende alle zijn ghereetschap. Den rooc Altaer,

9

Den brantoffer Altaer, met alle zijn ghereetschap. Dat hantuat, met alle sine voeten.

10

De officie cleederen, ende de heylighe cleederen des Priesters Aaron, ende de cleederen zijnder sonen, tot het Priesterdom.

11

De salfolie, ende dat roocwerck van specerye, totten heylichdom. Al wat ick v gheboden hebbe sullen si maken.

12

⁺ Ende de HEEre sprack met Mose, segghende:

+ C vers 12

13

Segt de kinderen Israels, ende spreect:^† Hout mijnen Sabbath. Want de selue is een teeken tusschen my ende v, tot op uwe nacomelinghen, Om dat ghy weten sult, dat ick de HEEre ben, die v heylicht.

† Exod. 20.b.8.

14

Daerom so hout mijnen Sabbath, want hy sal heylich zijn.^† Wie hem ontheylicht, die sal den doot steruen. Want wie dat eenich werck daer in doet, diens siel sal worden wtgheroeyt van sinen volcke.

† Num. 15.d.35.

15

Ses daghen salmen wercken, maer den seuensten dach, is den Sabbath,^* de heylighe ruste des HEEren. Wie dat eenich werck doet, inden Sabbath dach, die sal den doot steruen.

* Gene. 2.a.2.

16

Daerom sullen de kinderen Israels den Sabbath houden, dat si hem oock by haren naecomelingen houden, tot een eewich verbont.

17

Hy is een eewich Teeken tusschen my, ende de kinderen Israels. Want in ses daghen maecte de HEEre Hemel ende Aerde, Maer ten seuensten daghe ruste hy, ende verquicte hem.

18

Ende als de HEEre zijn reden gheeynt hadde met Mose, opten berch Sinai:^† Gaf hy hem twee tafelen des getuychenis, die steenen waren, ende gheschreuen metten vingher Gods.

† Exod. 24.c.12. 32.d.15. Deut. 5.c.22. 9 b.10.