Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxx. Capittel.

¶ Vanden Altaer des wieroockens, van dat metalen hantuat, van de wijnghe des salfolijs, ende ruecwercks.

1

⁺ GHy sult oock eenen roock Altaer van vueren houte maken om daer op te roocken, een elle lanc,

+ A vers 1

2

Ende breet, ghelijck viercant, ende twee ellen hooge, met zijnen hoornen,

3

Ende sulten met louteren goude ouertrecken, zijn dack, ende zijn wanden rontom, ende zijn hoornen. Ende ghy sult eenen Crants van louteren goude daer om maken,

4

Ende twee gulden ringhen onder den Crants aen beyde zijden, datmen hantboomen daer in steke, ende hem daer mede drage.

5

De hantboomen suldy oock van vueren houte maken, ende met gout ouertrecken,

6

Ende sulten setten voor dat voorhancsel, dat voor de Arcke des getuychenis hanct, ende voor den Genaden stoel die opt ghetuychenis is, van daer ick v betuyghen sal.

7

Ende Aaron sal daer op^* roocken, goet ruecwerck alle morgen als hi de Lampen bereyt:

* 2.Par. 26.c.18

8

Des gelijcx als hy de Lampen ontsteect, ontrent den Auont, soo sal hy oock sulcken roock maken. Dat sal dat dagelijcx gheroock zijn voor den HEEre by uwen nacomelinghen.

9

⁺ Ghy en sult gheen^† vreemde gheroock daer op maken oock geen brantoffer noch spijsoffer, ende gheen dranckoffer daer op offeren.

+ B vers 9

† Leu. 10.a.1.

10

Ende Aaron^* sal op zijn hoorne versoenen een mael tsiaers, met den bloede des sondoffers, tot eender versoeninge. Sulcke versoeninghe sal iaerlijcx een mael geschieden by uwen nacomelinghen. Want dat is den HEEre dat Alderheylichste.

* Leui. 16.g.34 Heb. 9.a.7. 3.Mach. 1.a.8

11

Ende de HEEre sprac met Mose^* seggende:

* Num. 1.a.2. 26.a.2.

12

Als ghy de hoofden der kinderen Israels telt, soo sal een yeghelijck den HEEre gheuen de versoeninghe zijnder sielen^† op dat hen gheen plaghe en ouercome, als sy ghetelt worden.

† 2.Re. 24.d.15.

13

Ende een yegelijck die mede int ghetal is, sal eenen haluen Sikel gheuen, nae den Sikel des heylichdoms.^† Eenen Sikel gelt twintich Gera. Alsulcken haluen Sikel sal dat Hefoffer des HEEren zijn.

† Leui. 27.d.25. Num. 3.g.47 Ezech. 45.b.12

14

Wie dat int ghetal is, van twintich iaren ende daer ouer, die sal dat Hefoffer den HEEre gheuen.

15

De rijcke en sal niet meer gheuen, ende de arme niet min dan den haluen Sikel, diemen den HEEre tot eenen Hefoffer gheeft, voor de versoeninghe haerder sielen.

16

⁺ Ende ghy sult alsulcken ghelt der versoeninghen nemen vanden kinderen Israels^† ende aenden Godts dienst der Hutten des getuychenis legghen, dattet sy den kinderen Israels een gedachtenis voor den HEEre, dat hy hem late ouer haer siele versoenen.

+ C vers 16

† 4.Reg. 11.a.5.

17

Ende de HEEre sprack met Mose^* seggende:

* Exo. 40.d.30.

18

Ghy sult oock een metalen hantuat maken, met eenen metalen voet, om te wasschen: Ende sullet stellen tusschen de Hutte des ghetuychenis, ende den Altaer, ende water daer in gieten.

19

Dat Aaron ende zijn sonen, haer handen ende voeten daer wt wasschen,

20

Als sy in de Hutte des ghetuychenis gaen, oft tot den Altaer, dat sy dienen met gheroock, een vier des HEEren,

21

Op dat sy niet en steruen. Dat sal een eewige sede zijn, hem ende zijnen sade, by haren nacomelinghen.

22

Ende de HEEre sprack met Mose, seggende:

23

^* Neemt tot v de beste Specerie, de edelste Myrre, vijfhondert (Sikel) ende Caneel half so veel, vijftich ende twee hondert, ende Kalmus oock vijftich ende twee hondert,

* Exo. 40.b.9.

24

Ende Casien vijfhondert, na den Sikel des heylichdoms ende olie van olijfboomen een Hyn,

25

Ende maect een heylighe salfolie, nae der Apotekers conste.

26

^* Ende ghy sult daermede saluen de Hutte des ghetuychenis, ende de Arcke des ghetuychenis,

* Leui. 8.b.10

27

⁺ De tafel met alle haer ghereetschap, den Candelaer, met zijnder ghereetschappen, den Roocaltaer,

+ D vers 27

28

Den brantoffer Altaer, met alle zijn ghereetschap, ende dat hantuat met zijnen voete.

29

Ende ghy sultse also wijen, dat sy dat Alderheylichste zijn. Wiese aenroeren wil, die sal ghewijdt zijn.

30

Aaron ende zijn sonen suldy oock saluen, ende wijense my tot Priesters.

31

Ende ghy sult met den kinderen Israels spreken, ende seggen: Dese olie sal my een heylige salue zijn by uwe nacomelinghen.

32

Sy en sal niet op menschen ghegoten worden. Ghi en sult ooc des gelijcx niet maken, want sy is heylich, daerom sal sy v heylich zijn.

33

Wie dat alsulcken maect, ofte eenen anderen daer af geeft, die sal van zijnen volck wtgheroeyt worden.

34

Ende de HEEre sprack tot Mose: Neemt tot v specerie, Balsem, stacten, Galban, ende reynen Wierooc, van deen so veel als van dander,

35

^† Ende maect rueckwerck daer af, nae der Apotekers conste, gemengt, dattet reyn ende heylich sy.

† 1.Par. 10.d.30

36

Ende ghy sultet te puluer stoten, ende stellen voor dat getuychenis, in de Hutte des ghetuychenis, van daer dat ick v betuygen sal: Dat sal v dat Alderheylichste zijn.

37

Ende des ghelijcken roockwerck, en suldy v niet maken, maer het sal heylich zijn den HEEre.

38

Wie dat een alsulcken maken sal, dat hy daermede roocke, die sal wtgeroeyt worden van zijnen volcke.