Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

¶ Van de wijnghe Aarons des ouersten Priesters ende sine sonen, ende ooc des Altaers.

1

⁺ DIt ist oock dat ghy hen doen sult, dat si my tot Priesters gewijt worden.^* Neemt eenen ionghen Osse, ende twee Rammen sonder smette,

+ A vers 1

* Leuit. 8.a.2.

2

Onghesuert broot, ende onghesuerde koecken, met olie gemengt, ende onghesuerde Vladen met olye bestreken. Van terwen mele suldijt al maken,

3

Ende sullet in eenen korf legghen, ende inden korf daer brenghen, metten Osse ende de twee Rammen.

4

Ende ghi sult^* Aaron ende sine sonen voor de duere der Hutten des getuychenis brenghen, ende met water wasschen,

* Exod. 40.b.9

[p. 32r]

5

Ende de cleederen nemen, ende Aaron aen trecken den enghen rock, ende den zijden rock, ende den lijfrock, ende den borstlap tot den lijfrock. Ende ghy sult hem gorden buyten opten lijfrock,

6

Ende den hoet op zijn hooft setten, ende de heylighe croone aen den hoet,

7

Ende sult nemen de salfolie, ende op zijn hooft ghieten, ende hem saluen.

8

⁺ Ende zijn sonen suldy ooc daer by brenghen, ende hen den enghen rock aen trecken.

+ B vers 8

9

Ende beyde Aaron ende hen oock met gordelen gorden, ende hen huyuen opsetten, dat si dat Priesterdom hebben tot eewichlijcker seden.

10

Ende ghi sult Aaron ende sinen sonen de handen vullen, ende den Osse daer brenghen voor de Hutte des ghetuychenis.^* Ende Aaron met sinen sonen sullen haer handen op des Ossen hooft leggen,

* Leuit. 1.a.4.

11

Ende ghy sult den Osse slaen voor den HEEre, voor de duere der Hutten des ghetuychenis.

12

Ende ghy sult van sinen bloede nemen, ende op des Altaers hoornen doen met uwen vingher, ende al dat ander bloet aen den vloer des Altaers ghieten.

13

Ende^* ghy sult alle dat vet nemen aen dat inghewant, ende dat net dat ouer de leuer is, ende de twee nieren metten vette, dat daerom is, ende ghy sullet opten altaer ontsteken.

* Leuit. 3.a.3.

14

Maer des Ossen vleesch, vel ende^† mest, suldy buyten voor den legher met vier verbernen, want het is een sondoffer.

† Dreck.

15

⁺ Maer den eenen Ram suldy nemen, ende Aaron met sinen sonen sullen haer handen op zijn hooft leggen.

+ C vers 15

16

Dan suldy hem slaen ende van sinen bloede nemen, ende opten Altaer sprenghen rontom.

17

Ende den Ram suldy deylen in stucken, ende zijn inghewant wasschen, ende de^* schenckelen, ende ghy sullet op zijn stucken ende hooft legghen,

* Beenen.

18

Ende den gheheelen Ram aensteken opten Altaer. Want het is den HEEre een brantoffer, een soet gherueck, een vier des HEEren.

19

^* Den anderen Ram suldy nemen, ende Aaron met sinen sonen sullen haer handen op zijn hooft leggen,

* Leuit. 8.d.22.

20

Ende ghy sult hem slaen. Ende van sinen bloede nemen, ende doent opt eynde vander rechter ooren van Aaron, ende sine sonen, ende opten duym van haerder rechter hant, ende opten grooten theen haers rechten voets. Ende ghy sult dat bloet opten Altaer sprengen rontom.

21

Ende ghy sult vanden bloede opten Altaer nemen, ende salfolie, ende Aaron ende zijn cleederen, zijn sonen ende haer cleederen besprenghen. Soo sal hy ende sine cleederen, zijn sonen, ender haer cleederen ghewijet zijn.

22

^+† Daer nae suldy nemen dat vet vanden Ramme, den steert, ende dat vet aent inghewant, dat net om de leuere, ende de twee nieren, met den vette daer om, ende de rechte schoudere (want het is eenen Ram der vullinghen)

+ D vers 22

† Leuit. 8.d.25.

23

Ende een broot, ende eenen olykoeck, ende een vlade, wt den corue des ongesuerden broots,^† die voor den HEEre staet:

† Exod. 25.c.30.

24

Ende legghet al op Aarons handen, ende zijnder sonen, ende beweget den HEEre.

25

Daer na nemet van haren handen, ende ontsteket opten Altaer, tot eenen brantoffer, tot eenen soeten rueck voor den HEEre. Want dat is een vier des HEEren.

26

^* Ende ghy sult de borst nemen vanden Ramme der vullinghen Aarons, ende sultse voor den HEEre Beweghen, dat sal v deel zijn.

* Leuit. 8.f.29.

27

⁺ Ende ghy sult also heylighen de Weghe borst, ende de Hefschouder, die Beweecht ende gheheuen zijn, vanden Ramme der vullinghen Aarons, ende zijnder sonen.

+ E vers 27

28

Ende tsal Aaron ende zijnder sonen zijn, tot een eewighe sede, vanden kinderen Israels. Want het is een Hefoffer, ende de Hefofferen sullen des HEEren zijn, vanden kinderen Israels, aen hare dancofferen ende Hefofferen die si den HEEre doen.

29

^* Maer de heylighe cleederen van Aaron sullen zijn sonen hebben nae hem, dat si daer in ghesalft, ende haer handen gheuult worden.

* Num. 20.d.26

30

Soo wie dat onder zijn sonen, in zijn stede Priester wordt, die salse seuen daghen aendoen, dat hy gae in de Hutte des ghetuychenis, om te dienen inden heylighen.

31

^+* Maer ghy sult nemen den Ram der vullinghen, ende zijn vleesch aen eenen heylighen hoeck koken.

+ F vers 31

* Leuit. 8.f.31.

32

Ende Aaron met sinen sonen sullen des selfs Rams vleesch eten metten broode inden korf, voor de duere der Hutten des ghetuychenis.

33

Want daer is een versoeninghe mede gheschiet, te vullen haer handen, dat si ghewijt worden. Een vreemde en sal daer niet af eten, want het is heylich.

34

Maer blijfter wat ouer vanden vleessche der vullinghen, ende vanden broode, tot des morghens, dat suldi met vier verbernen, ende niet laten eten: Want het is heylich.

35

Ende ghy sult alsoo met Aaron ende sine sonen doen, al dat ick v gheboden hebbe. Seuen daghen suldy haer handen vullen,

36

Ende daghelijcks eenen Osse totten sondoffer slaen, tot eender versoeninghe. Ende ghy sult den Altaer ontsondighen, als ghy hem versoent, ende ghy sult hem saluen, dat hy ghewijt worde.

37

Seuen daghen suldy den Altaer versoenen, ende wijen hem, dat hy sy een Altaer des Alderheylichsten. Wie desen Altaer aenroeren wil, die sal ghewijt zijn.

38

^+* Ende dat suldy met den Altaer doen: Twee iarighe Lammeren suldy altijt des daechs daer op offeren.

+ G vers 38

* Num. 28.a.3. 1.par. 16.e.40

39

Een Lam des morghens, dat ander ontrent den Auont.

40

Ende tot eenen Lamme een thienden deel^† Semelmeels, ghemengt met een vierendeel van een Hin ghestooten olye, ende een vierendeel van een Hin wijns, tot eenen dranckoffer.

† Semelmeel is de bloeme vanden mele.

41

Met den anderen Lam ontrent den auont, suldy doen, ghelijck met den spijsoffer ende dranckoffer des morghens, tot eenen soeten rueck, een vier den HEEre.

42

Dat is dat dagelijcx brantoffer by uwen naecomelinghen, voor de duere der Hutten des ghetuychenis,^† voor den HEEre

† Leuit. 1.a.1. Num. 12.a.5.

[p. 32v]

daer ick v betuyghen, ende met v spreken wil:

43

Aldaer wil ic de kinderen Israels bekent ende geheylicht worden, in mijnder heerlicheyt.

44

Ende wil de hutte des ghetuychenis met den Altaer heylighen, ende Aaron ende zijn sonen my tot Priesters wijen.

45

^† Ende wil onder de kinderen Israels woonen, ende haer Godt zijn:

† Leu. 26.b.9 2.Cor. 6.c.16.

46

Dat sy weten sullen, dat ic ben de HEEre haer Godt, diese wt Egypten lant^† brochte, om dat ick onder haer woonen soude, Ick de HEEre haer Godt.

† Leyde.