Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxviij. Capittel.

¶ Vander Priesteren cleedinghe, ende van haerder wijnghe.

1

⁺ ENde ghi sult Aaron uwen broeder, ende sine sonen tot v nemen vanden kinderen Israels^* dat hi mijn Priester sy, te weten, Aaron ende zijn sonen, Nadab, Abihu, Eleazar, ende Ithamar.

+ A vers 1

* Exo. 40.b.13.

2

Ende ghy sult^† Aaron uwen broeder heylighe cleederen maken, die heerlijck ende schoone zijn.

† Exod. 39.a.1. Psal. 132.a.9.

3

Ende ghi sult den wijsen van herten segghen, die ic metten gheest der wijsheyt veruult hebbe, Dat si Aaron cleederen maken tot zijnder wijnge, dat hy mijn Priester sy.

4

Dit zijn nv de cleederen die si maken sullen, eenen borstlap, lijfrock, zijden rock, enghen rock, hoet ende gordel. Alsoo sullen si heylige cleederen maken uwen broeder Aaron, ende sinen sonen, dat hy mijn Priester sy.

5

Daer toe sullen si gout nemen, gheel zijde, scharlaken, rosetroot, ende witte zijde.

6

⁺ Den lijfrock sullen si maken van goude, gheelder zijden, scharlaken, rosetroot, ende ghetweernde witte zijde, constelijc,

+ B vers 6

7

Dat hy op beyde scouderen te samen geuoecht, ende aen beyde zijden te samen ghebonden worde,

8

Ende sinen gordel daer

[p. 31v]

op, sal vander selfder consten ende wercke zijn, van goude, van gheelder zijden, scharlaken, rosetroot, ende ghetweernde witte zijde.

9

Ende ghy sult nemen twee Onix steenen, ende daer op grauen de namen der kinderen Israels,

10

Op elcken ses namen, Na de ordinantie haers ouderdoms.

11

Dat suldy door de steensnijders doen, die de seghelen grauen, Alsoo dat sy met goude rontom begrepen worden.

12

Ende ghy sultse op de schouderen des lijfrocx hechten, dat het steenen zijn der ghedachtenissen voor de kinderen Israels, dat Aaron haer namen op beyde schouderen draghe, voor den HEERE tot eender ghedachtenisse.

13

⁺ Ende ghi sult gulden spannen maken,

+ C vers 13

14

Ende twee ketenen van louteren goude, met twee eynden, maer dat de leden in malcanderen hangen, Ende sultse aen de spannen maken.

15

Den borstlap suldy maken nader const, gelijck den lijfrock, van goude, gheelder zijden, scharlaken, rosetroot, ende getweernder witter zijden.

16

Viercant sal hy zijn ende dobbel. Een hant breet sal zijn lengte zijn, ende een hant breet zijn breyde.

17

Ende ghy sulten vullen met vier rijen vol steenen. De eerste rije zal zijn een Sardix, Topaes, Smaragdus:

18

De ander een Robijn, Saphir, Diamant:

19

De derde een Ligurius, Achates, Amethistus:

20

De vierde een Torkoys, Onix, Iaspis. Int gout sullen si gheuaet zijn, in alle rijen,

21

Ende sullen na de twaelf Namen der kinderen Israels staen, ghegrauen van steensnijders, een yeghelijck sinen naem, nae de twaelf stammen.

22

⁺ Ende ghy sult ketenen aen den borstlap maken, met twee eynden, maer dat de leden in malcanderen hanghen, van louteren goude,

+ D vers 22

23

Ende twee gulden ringhen aen den borstlap. Alsoo dat ghy de selue twee gulden ringhen hecht aen de twee hoecken des borstlaps,

24

Ende die twee gulden ketenen in de selue twee ringhen aen de beyde hoecken des borstlaps doet.

25

Maer die twee eynden vanden twee ketenen, suldy in de twee spannen maken, ende hechtense op de schouderen vanden lijfrock, teghen malcanderen ouer.

26

Ende ghy sult twee ander gulden ringen maken, ende aen de twee ander hoecken des borstlaps hechten, aen sinen cant, inwendich teghen den lijfrock.

27

Ende ghy sult noch twee gulden ringhen maken, ende op de twee hoecken beneden aenden lijfrock, buyten teghen malcanderen ouer hechten, daer den lijfrock te samen gaet, bouen aenden lijfrock, constelijck:

28

Ende men sal den borstlap met sinen ringen, met een gheel snoer aen de ringen des lijfrocx knoopen,⁺ dat hy op dien constelijc ghemaecten lijfroc vast sitte, ende den borstlap niet los en worde vanden lijfrock.

+ E vers 28

29

Also sal Aaron de namen der kinderen Israels draghen inden borstlap, op zijnder herten, als hy in dat heylige gaet, totter ghedachtenisse voor den HEEre altijt.

30

Ende ghy sult inden borstlap doen ^* LICHT ENDE RECHT, dat sy op Aarons herte zijn, als hy ingaet voor den HEEre, ende draghe dat RECHT der kinderen Israels op zijn herte voor den HEEre altijt.

* Deut. 33.b.8.

31

Ghy sult oock den zijden rock onder den lijfrock maken, gants van gheelder zijden,

32

Ende bouen midden daer in sal een Hol zijn, ende eenen boort rontom dat Hol te samen gheuoecht, dat hy niet en schuere.

33

⁺ Ende onder aen sinen soom suldy Granaet appelen maken, van gheelder zijden, scharlaken, rosetroot rontom. Ende tusschen de selue gulden bellen romtom,

+ F vers 33

34

Also dat daer een gulden belle sy, daer nae eenen Granaet appel, ende noch een gulden belle, ende dan weder eenen Granaet appel, ende also voort rontom aenden soom des seluen zijden rocx.

35

^* Ende Aaron sal hem aen hebben als hi dient, datmen zijn gheclanck hoore, als hy wt ende ingaet, in dat heylighe voor den HEEre, op dat hy niet en sterue.

* Eccle. 43.b.8.

36

Ghi sult oock een voorhooft plate maken van louteren goude, ende daer in grauen, ghelijcmen de segelen wtgraeft, DE HEILICHEIT DES HEEren.

37

Ende ghy sultse met een gheel snoer hechten voor aen den hoet op Aarons voorhooft,

38

Dat Aaron also draghe de misdaet des heylighen, dat de kinderen Israels heylighen, in alle gauen haerder heylighinghen. Ende het sal altijt aen zijn voorhooft zijn, dat hijse versoene voor den HEEre.

39

⁺ Ghy sult ooc eenen engen roc maken van witter zijden, ende eenen hoet van witter zijden maken, ende eenen ghesticten gordel.

+ G vers 39

40

Ende Aarons sonen suldy rocken, gordels, ende huyuen maken, die heerlijck ende schoon zijn.

41

Ende ghy sultse uwen broeder Aaron met sinen sonen aentrecken, ende ghy sultse saluen, ende haer handen vullen ende wijense, dat si mijne Priesters zijn.

42

Ende ghy sult hen lijnen broecken maken, om te bedecken dat vleesch der schamelheyt, vanden lendenen tot aen de huepe.

43

Ende Aaron ende zijn sonen sullense aen hebben, als si in de Hutte des ghetuychenis gaen, oft als si gaen totten Altaer, dat si dienen in dat heylichdom, dat si haer misdaet niet en draghen, ende steruen moeten. Dat sal hem ende sinen sade nae hem een eewighe sede zijn.