Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Vanden Altaer ende sine toebehoorte, vanden voorhof der wooninghe. Vande olie ende de Ampullen.

1

⁺ ENde ghy sult eenen^* Altaer maken, van vueren houte, vijf ellen lanck ende breet, dat hy ghelijck viercant sy, ende drie ellen hooch.

+ A vers 1

* Exod. 38.a.1. Ezech. 43.c.13

2

Ende ghy sult hoornen aen zijn vier hoecken maken, ende ghy sultet met metael ouertrecken.

3

Maect oock aschpotten, schuppen, beckenen, crauwels, vierpannen. Alle zijn ghereetschap suldy van metael maken.

4

Ghy sult ooc een metalen Tralie maken, ghelijck een net, ende vier metalen ringhen aen zijn vier hoecken.

5

Ghy sulten van onder op alom den Altaer maken, dat de tralie reycke tot midden vanden Altaer.

6

Ende ghy sult oock hantboomen maken totten Altaer, van vueren houte, met metael ouertrocken,

7

Ende ghy sult de hantboomen in de ringhen steken, dat de hantboomen aen beyde siden des Altaers zijn, daermen mede draghen mach.

8

Ende sultet also van berderen maken, dattet inwendich hol sy, ghelijck v opten berch ghetoont is.

9

⁺ Ghy sult der wooninghe oock eenen hof maken, Een omhancksel van witter ghetweernder zijden. Op een zijde hondert ellen lanck teghent zuyden,

+ B vers 9

10

Ende twintich columnen op twintich metalen voeten, ende hare knoopen met haren reepen van siluer.

11

Also oock sal tegent Noorden een omhancsel zijn, hondert ellen lanc, twintich columnen op twintich metalen voeten, ende hare knoopen met haren reepen van siluer.

12

Maer teghen het Westen sal de breyde des hofs hebben een omhancsel vijftich ellen lanc, thien columnen op thien voeten.

13

Teghen het Oosten, sal de breyde des hofs hebben, vijftich ellen,

14

Also dat het omhancsel opter eender zijden hebbe vijfthien ellen, daer toe drie columnen op drie voeten.

15

Ende noch eenmael vijfthien ellen op die ander zijde, daer toe drie columnen op drie voeten.

16

⁺ Maer de poorte des hofs sal een Laken zijn van twintich ellen breet, ghestict van geelder zijden, scharlaken, rosetroot, ende ghetweernder witter zijden, daer toe vier columnen op haer vier voeten.

+ C vers 16

17

Alle die columnen om den hof, sullen silueren reepen hebben, ende silueren knoopen, ende metalen voeten.

18

Ende de lengde des hofs sal zijn hondert ellen, ende de breede vijftich ellen, ende de hoochte vijf ellen, van getweernder witter zijden. Ende zijn voeten sullen metalen zijn,

19

Oock alle de ghereetschap der wooninge tot alderley officie, ende nae sine naghelen, ende alle naghelen des hofs sullen metalen zijn.

20

⁺ Ghebiet den kinderen Israels^* dat si tot v brengen die alder reynste ende puerste olie van Olijfboomen ghestooten om te lichten, datmen altijt in de lampen giete,

+ D vers 20

* Leuit. 24.a.2.

21

Inder Hutten des ghetuychenis, buyten dat voorhancsel, die voor dat getuychenis hangt. Ende Aaron ende zijn sonen sullense bereyden, van smorghens tot tsauonts voor den HEERE. Dat sal v een eewighe sede zijn op uwe nacomelinghen, onder de kinderen Israels.