Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ De Heere beueelt Mose te maken dat Heylichdom, ende al wat daer toe behoort.

1

⁺ ENde de HEEre sprack met Mose, segghende:

+ A vers 1

2

^* Segt den kinderen Israels, dat si my een Hefoffer gheuen, ende neemt dat selue van een yeghelijc, diet gewillichlijc gheeft.

* Exod. 35.a.4.

3

Ende dit is dat Hefoffer dat ghi van hen nemen sult: Gout, siluer, metael,

4

Gheel zijde, scharlaken, rosetroot, witte zijde, geyten hayr,

5

Rootachtige Rams vellen, Dasch vellen, vueren hout,

6

Olie voor de Lampen, specerije tot salue ende goeden rueckwerck,

7

Onix steen, ende edel steenen, tot eenen lijfrock, ende tot eenen borstlap.

8

Ende si sullen my een Heylichdom maken, dat ick onder hen woone.

9

Ghelijc ick v een voorbeelt der Wooninghe, ende alles zijns ghereetschaps wijsen sal, soo suldijt maken.

10

^+† Maect een Arcke van vueren houte. Twee ellen ende een halue sal de lengte zijn: Anderhalf elle de breyde, ende anderhalf elle de hoochde.

+ B vers 10

† Exod. 37.a.1.

11

Ende sultse met louteren goude ouertrecken, binnen ende buyten. Ende maeckt daer bouen rontom eenen gulden Crants,

12

Ende ghiet vier gulden ringhen, ende maectse aen haer vier hoecken, also datter twee ringhen zijn op een zijde, ende twee op dander zijde.

13

Ende maect hantboomen van vueren houte, ende ouertrectse met goude,

14

Ende steectse in de ringhen aen de zijde der Arcken, datmense daer mede draghe.

15

Ende si sullen in de ringhen blijuen, ende nyet wtghetoghen worden.

16

Ende ghy sult in de Arcke dat ghetuychenis legghen dat ick v gheuen sal.

17

Ghy sult oock eenen Ghenaden stoel maken van louteren goude, twee ellen ende een halue sal zijn lengte zijn, ende anderhalf elle zijn breyde.

18

^* Ende sult twee Cherubim maken, van^† ghesmeden goude, op beyde

* 3.Reg. 6.d.23.

† Dichten,

[p. 30v]

de eynden vanden Ghenaden stoel,

19

Dat die een Cherubim sy aen dit eynde, ende de ander aen dander eynde. Ende alsoo sullen daer zijn twee Cherubim aen des Ghenaden stoels eynden.

20

Ende de Cherubim sullen haer vloghelen wtspreyden bouen ouer, dat si den Ghenaden stoel bedecken met haren vloghelen. Ende haer aensichten sullen deen tegen des ander staen, ende haer aensichten sullen opten Ghenaden stoel sien:

21

⁺ Ende sult den Ghenaden stoel bouen op de Arcke setten, ende in de Arcke legghen dat ghetuychenis, dat ick v gheuen sal.

+ C vers 21

22

^† Van die plaetse wil ick v betuygen, ende met v spreken, te weten vanden Ghenaden stoel, tusschen de twee Cherubim, die opter Arcken des ghetuychenis is, alle wat ick v ghebieden wil, aen de kinderen Israels.

† Num. 7.h.88. Rom. 3.c.25. Hebr. 5.a.3.

23

^* Ghy sult oock een Tafel maken van vueren houte. Twee ellen lanck, ende een elle breet, ende anderhalf elle hooch,

* Exod. 37.b.10

24

Ende sultse ouertrecken met louteren goude. Ende eenen gulden Crans rontomme maken,

25

Ende eenen lijst daer om een hant breet hooghe, ende eenen gulden Crans om den lijst.

26

Ende sult vier gulden ringhen daer aen maken, aen de vier hoecken aen zijn vier voeten.

27

Vast onder den lijst sullen de ringen zijn, datmen hantboomen daer in steken mach, ende de tafel dragen,

28

Ende sult de hantboomen van vueren houte maken, ende ouertreckense met goude, datmen de tafel daer mede drage.

29

Ghy sult ooc sine schotelen, bekeren, cannen, schalen, van louteren goude maken, datmen daer mede wt ende in giete.

30

Ende^† ghy sult altijt Thoonbroot op de tafel leggen voor my.

† Leuit. 24.b.5.

31

⁺ Ghy sult oock eenen^‡ Candelaer van gesmeden louteren goude maken. Daer aen sal den schacht met armen, coppen, knoopen ende bloemen zijn.

+ D vers 31

‡ Exod. 37.c.17 Num. 8.a.2.

32

Ses armen sullen wt den Candelaer ter zijden wt gaen, wt elcker zijden drie armen.

33

Een yeghelijc arm sal drie open schalen, Coppen, ende bloemen hebben.

34

Dat sullen die ses armen wt den Candelaer zijn. Maer den schacht aen den Candelaer sal vier open schalen met knoopen ende bloemen hebben,

35

Ende eenen knoop onder twee armen, der welcker ses wt den Candelaer gaen,

36

Want beyde haer knoopen ende armen sullen wt hem gaen, ende dat al van ghesmeden louteren goude.

37

^* Ende ghy sult daer bouen op seuen lampen maken, dat si tegen malcanderen lichten,

* Num. 8.a.2.

38

Ende keerssnutters, ende bluschoornen, van louteren goude,

39

Van hondert pond fijns gouts suldy dat maken, met alle dese gereetscap.

40

^† Ende siet toe dat ghijt maect nae haren beelde dat ghy opten berch ghesien hebt.

† Hebr. 8.a.5. Act. 7.f.44.