Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Hier verhaelt hy weder int corte, dwelcke bouen int .xix. Capittel gheseyt is, van dat boeck ende bloet des verbonts.

1

⁺ ENde hy sprack tot Mose:^* Climt op totten HEEre, ghy ende Aaron, Nadab ende Abihu, ende de tseuentich ouders Israels, ende aenbidt van verre.

+ A vers 1

* Exod. 19.a.3.

2

Maer laet Mose alleen comen totten HEEre, ende en laet de ander niet nader comen, ende dat volck en come oock met hen niet op.

3

Mose quam, ende vertelde den volcke alle de woorden des HEEren, ende alle rechten. Doen antwoorde al tvolck met eender stemmen, segghende:^† Alle de woorden die de HEEre gheseyt heeft, willen wy doen.

† Exod. 19.b.8.

4

Doen schreef Mose alle de woorden des HEEren, ende stont des morghens vroech op,^* ende boude eenen Altaer onder aenden berch met twaelf Pilaernen nae de twaelf stammen Israels.

* Exo. 20.d.24.

5

⁺ Ende sant daer Ionghelinghen vanden kinderen Israels, dat si Brantoffer daer op offeren souden, ende Danckoffer den HEEre van Ossen.

+ B vers 5

6

Ende Mose nam de helft des bloets, ende dedet in een becken. De ander helft sprengde hy opten Altaer,

7

Ende nam dat boec des verbonts, ende last voor de ooren des volcx. Ende doen si seyde: Al wat de HEEre gheseyt heeft, willen wy doen ende dien ghehoorsaem zijn,

8

^† Doen nam Mose dat bloet ende besprengde dat volck daer mede, ende sprack: Siet, dat is dat bloet des verbonts, dat de HEEre met v maect, bouen alle dese woorden.

† 1.Pet. 1.a.2. Hebr. 9.c.13. 10.c.22.

9

⁺ Doen^* clommen Mose ende Aaron, Nadab ende Abihu, ende de tseuentich ouders Israels opwaerts,

+ C vers 9

* Exod. 19.d.24

10

Ende saghen de God Israels. Onder zijn voeten wast ghelijck eenen schoonen Saphier, ende ghelijc de gedaente des Hemels alst daer is,

11

Ende hy en liet zijn hant niet ouer de selue ouersten in Israel. Ende als si God ghesien hadden, aten si ende droncken.

12

Ende de HEEre sprack tot Mose: Coemt op tot my opten berch, ende blijft aldaer^* dat ick v geue steenen Tafelen, ende Wet, ende geboden, die ick gescreuen heb, die ghy hen leeren sult.

* Exo. 31.d.18. 32.d.15.

13

Doen maecte hem Mose op ende zijn dienaer Iosua, ende clommen opten berch Gods.

14

Ende sprac tot den ouders: Blijft hier tot dat wy weder tot v comen. Siet, Aaron ende Hur zijn by v, heefter yemant eenighe sake, die laet tot hen comen.

15

⁺ Doen nv Mose opten berch quam bedecte een wolcke den berch,

+ D vers 15

16

Ende de heerlijckheydt des HEEren woonde opten berch Sinai, ende bedecte hem ses daghen metter wolcken, ende hy riep Mose ten seuenden daghe wter wolcken.

17

Ende dat aenschouwen der heerlijcheyt des HEEren, was ghelijck een verterende vier opten top vanden berghe, voor de kinderen Israels.

18

Ende Mose ghinck midden in de wolcke, ende clam opten berch,^* ende bleef opten berch veertich daghen ende veertich nachten.

* Deut. 34.d.28