Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Hier worden menigherley insettinghen ende rechten onder malcanderen beschreuen.

1

⁺ GHy en sult een valsche aenclaghe niet gheloouen, dat ghy eenen godloosen bystant doet, ende een valsche ghetuyghe zijt.

+ A vers 1

2

^* Ghy en sult der Menichten niet volghen totten quade, ende voor het gherecht niet antwoorden, dat ghy metter Menichten vanden rechte wijct.

* Ioan. 7.e.51.

3

Ghi en sult den cleynen niet vercieren in zijnder sake.

4

^† Als ghi ws viants Osse oft Ezel gemoet, dat hy doolt, soo suldy hem den selfden weder toeleyden.

† Deut. 22.a.1.

5

^* Als ghy des geens Ezel, die v haet, siet onder den Last ligghen, wacht v, ende en verlaet hem niet, maer versuymt geerne dat uwe om sinent wille.

* Deut. 22.a.4. Luc. 14.a.5.

6

Ghy en sult dat recht ws Armen, niet buyghen in zijnder saken.

7

Sijt verre van valsche saken.

^* Den ontschuldighen, ende den gherechtighen en suldy niet verworghen, want ic en laet den godloosen gheen recht hebben.

* Sus. g.53.

8

^* Ghy en sult gheen ghiften nemen, want ghiften maken de siende blint, ende verkeeren de saken der Rechtuaerdigen.

* Deut. 17.a.2. Eccle. 20.d.31.

9

^* De vreemdelingen en suldy niet verdrucken. Want ghy weet hoet den vreemdelinghen om het herte is, dewijle ghy oock vreemdelingen in Egipten lant geweest zijt.

* Gene. 46.a.6 Exod. 22.c.21.

10

^+† Ses iaer suldy v lant besaeyen, ende zijn vruchten vergaderen:

+ B vers 10

† Leuit. 25.a.3.

11

Inden seuensten iare suldijt laten rusten, ende liggen laten, op dat de Armen onder uwen volcke daer af eten. Ende watter ouer blijft, laet dat Wilt des velts daer af eten. Alsoo suldy oock doen met uwen wijngaerden, ende Olijfgaerden.

12

^* Ses dagen suldy uwen arbeyt doen, maer den seuensten dach suldy vieren, opdat uwen Os ende Ezel ruste, ende uwer dienstmaecht sone, ende vreemdelinc haer vermaken.

* Exod. 20.b.12. 34.c.21. 35.a.2.

13

Al wat ick v gheseyt heb, dat hout.^† Ende der ander goden namen en suldy niet ghedencken, ende wt uwen monde en sullen si niet ghehoort worden.

† Ephe. 5.a.3.

14

Driemael suldy my feest houden inden Iare.

15

Te weten,^* dat feest der onghesuerder brooden suldy houden, dat ghi seuen daghen onghesuert broot eet (so ick v gheboden hebbe) inder tijt der maent Abib. Want inder seluer sydy wt Egypten ghetrocken. Maer en verthoont v nyet ydel voor my.

* Exod. 13.a.6. 34.c.18.

16

^† Ende de feeste des eersten Oogsts der vruchten, die ghy opten velde ghesaeyt hebt. Ende de feeste der vergaderingen inden wtganck des iaers, als ghy uwen arbeyt vergadert sult hebben vanden velde.

† Deut. 16.b.9.

17

^* Driemael inden Iare sullen hen verthoonen voor den HEEre den Heerschapper, alle uwe Manspersoonen.

* Deut. 16.c.16.

18

⁺ Ghy en sult dat bloet mijns offers, niet met dat suerdeech offeren. Ende dat vet van mijnder feesten, en sal niet blijuen totten morghen.

+ C vers 18

19

^* Dat eerste vanden eersten vruchten op uwen velde, suldy brenghen in dat huys des HEEren ws Gods.^† Ende ghy sult dat bocxken niet coken, al dewijle dattet aen zijnder moeder melck is.

* Exod. 34.c.26 Deut. 26.a.2.

† Deu. 14.b.21 Exod. 34.c.26

20

^* Siet ick seynde eenen Enghel voor v henen, die v behoede op den wege, ende in de plaetse brenghe, die ick v bereyt heb.

* Exod. 32.g.34 33.a.2.

21

Daerom wacht v voor zijn aensicht, ende hoort zijn stemme, ende en verbittert hem niet. Want hy en sal uwe ouertredinghe niet vergeuen, ende mijnen naem is in hem.

22

^† Maer ist dat ghy zijn stemme hoort, ende doet al wat ick v segghen sal, soo wil ick uwer vianden, vyant, ende uwer teghenpartijen, tegenpartijder zijn.

† Gene. 12.a.3. 4.Re. 19.d.22 Act. 9.a.4.

23

Als nv mijnen Enghel voor v henen gaet, ende brengt v aen de Amoriten, Hethiten, Pheresiten, Cananiten, Heuiten, ende Iebusiten, ende icse verdoe,

24

^† So en suldy hare goden niet aenbidden, noch hen dienen, ende niet doen als si doen.^‡ Maer ghy sult haer afgoden afdoen ende breken.

† Num. 25.a.2.

‡ Deut. 7.a.5.

25

^+* Ende ghy sult den HEEre uwen God dienen, soo sal hy v broot, ende v water seghenen. Ende ick wil alle crancheyt van v keeren.

+ D vers 25

* Deut. 7.c.11.

26

^† Daer en sal

† Deut. 7.b.14.

[p. 30r]

gheene onswanghere, ende onuruchtbaer zijn in uwen Lande, ende ick wil v laten oudt worden.

27

Ick wil mijn verschricken voor v henen seynden, ende alle tvolck versaecht maken, daer ghy coemt. Ende ick wil v alle uwe vianden in de vlucht gheuen.

28

Ick^† wil horselen voor v seynden, die voor v wt iaghen de Heuiten, Caniten ende Hethiten.

† Deut. 7.d.20.

29

Ick^† en wilse in eenen iare niet wtstooten voor v. Op dat, dat lant niet en verwoeste, ende dat de wilde dieren niet vermenicht en worden tegen v.

† Iosue. 11.c.18. Deut. 7.e.22.

30

Allenskens den eenen na den anderen wil icse wtstooten, tot dat ghy wast, ende dat lant besidt.

31

^* Ende ick wil uwe palen stellen de^† roode zee, ende der Philistijnen zee, ende de woestijne tot aen dat water. want ick wil v in v hant geuen de inwoonders des lants. Ghy sultse witstooten voor v.

* 3.Reg. 4.b.21

† Schelpmeer

32

Ghy^† en sult met hen, noch met haren goden geen verbont maken,

† Exod. 34.b.12 Deut. 7.a.2.

33

Maer en laetse in v lant niet woonen, op dat si v niet en verleyden tegen my.^† Want ist dat ghy haren goden dient, so salt v tot arghernisse vergaen.

† 3.Reg. 11.a.2. Num. 25.a.2.