Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ Van diefte, Van schaden dye met opset oft onuerhoets gheschieden, Hoe datmen hem hebben sal metten gheleenden oft verpanden.

1

⁺ VVanneer yemant eenen Os oft scaep steelt, ende slatet oft vercoopet^* die sal vijf ossen voor eenen os weder gheuen, ende vier schapen voor een schaep.

+ A vers 1

* Prou. 6.d.31. 2.Reg. 12.b.6.

2

Wort een dief beuonden, dat hy inbreect, ende wordt daer ouer gheslaghen dat hy sterft, so en salmen geen bloetghericht ouer den ghenen laten gaen.

3

Maer is de Sonne ouer hem op ghegaen, soo salmen dat bloetghericht gaen laten.

Maer een dief sal weder vernoeghen. Heeft hy niet, soo vercoopmen hem, om zijn dieuerye.

4

Maer vintmen de dieuerye leuendich by hem, het sy os, ezel, oft schaep. soo sal hijt dobbel weder gheuen.

5

Ist dat yemant eenen acker oft wijngaert beschadicht, dat hy zijn vee schade laet doen in eens anders acker, die salt vanden besten van sinen acker ende wijngaert weder vernoeghen.

6

^* Ist datter een vier wt coemt, ende coemt in de doornen, ende verbrant de schoouen oft dat coren dat noch staet, oft den acker, soo sal hijt weder vernoeghen die dat vier aenghesteken heeft.

* 2.Reg. 14.c.30

7

^+* Oft yemant sinen naesten ghelt oft iuweelen te bewaren doet, ende het wort den seluen wt sinen huyse gestolen, vintmen den dief, soo sal hijt dobbel weder gheuen:

+ B vers 7

* 2.Mac. 3.c.15.

8

Ende vintmen den dief niet, soo salmen den Huysweert voor de^† goden brenghen, oft hy zijn hant niet gheleyt heeft aen zijns naesten goet.

† Psal. 82.a.6. Ioan. 10.d.34

9

Oft die een den anderen beschuldicht om eenigerhande Onrecht, het sy om Os, Ezel oft Schaep, oft Cleederen, oft yet datter verloren is, so sullen haerder beyden saken voor de goden comen, ende den welcken de goden verdoemen, die salt dobbel sinen naesten weder gheuen.

10

Wanneer yemant sinen naesten eenen Ezel, oft Osse, oft Schaep, oft eenich Vee te bewaren doet, ende het ontsterft hem oft bederft, oft het wordt hem ontdreuen, dattet niemant en siet,

11

So salment tusschen hen op eenen Eedt by den HEERE laten comen, oft hy zijn hant niet geslaghen en heeft aen zijns naesten haue. Ende de Heere des goets salt aennemen, dattet ghene niet en derf betalen.

12

Maer steeltet hem een dief, so sal hijt sinen Heere weder vernoeghen.

13

Maer wordet^† verschuert, so sal hy ghetuychenis daer af brenghen, ende niet betalen.

† Gen. 31.e.38.

14

⁺ Oft yemant van sinen naesten yet leent, ende het wordt gheargert, oft het sterft dat zijn Heere daer niet by en is, so sal hijt hem weder vernoeghen.

+ C vers 14

15

Maer is zijn Heere daer by, so en sal hijt hem niet weder betalen, dewijle hijt voor zijn gelt ghehuert heeft.

16

Ist dat yemant een^* maecht bepraet,

* Gen. 34.a.2 Deut. 22.d.29.

[p. 29v]

dien noch niet verlooft en is, ende beslaeptse, die sal haer gheuen haren bruytschat, ende haer te wijue hebben:

17

Maer en wiltse haer Vader hem niet gheuen, soo sal hy haer ghelt weghen, soo vele als eender maecht tot eenen bruytschat behoort.

18

De^* toouenaerschen en suldy niet leuen laten.

* 1.Reg. 28.a.3.

19

Wie^‡ een Vee beslaept, die sal de doot steruen.

‡ Deut. 27.c.21.

20

Wie den goden offert, sonder alleen den HEEre, die si verbannen.

21

Ghy^† en sult de vreemdelinghen niet scheynden noch verdrucken, want ghi hebt ooc vreemdelingen in Egypten lant geweest.

† Leui. 19.g.34

22

Ghy^† en sult geen weduwen noch weesen bedroeuen,

† Iob. 24.a.4.

23

Bedroefdyse soo zullen si tot my roepen, ende ick sal haren roep verhooren,

24

So sal mijnen toorne vergrammen, dat ic v metten sweerde dooden sal, ende uwe wijuen sullen weduwen worden, ende v kinder sullen weesen worden.

25

Als ghy mijnen volcke^* dat daer arm by v is, ghelt leent, soo en suldy hen nyet tot schade dringhen, ende gheen woecker op hen drijuen.

* Leuit. 25.f.34 Deut. 23.c.19.

26

⁺ Als ghy een cleet van uwen naesten te^† pande neemt, so suldijt hem weder geuen eer de Sonne onder gaet.

+ D vers 26

† Deut. 24.b.6

27

Want zijn cleet is alleen daer zijn vel mede bedect wort, ende daer hi in slaept. Ist dat hy tot my roept, so sal ic hem verhooren, want ic ben genadich.

28

Den Goden en suldy^* niet vloecken, ende den Ouersten onder v volck en sult ghy niet lasteren.

* 2.Reg. 16.b.7

29

Ghy en sult niet vertrecken te offeren uwe herde ende uwe weecke vruchten.

^* Ghy sult my geuen uwen eersten soon:

* Exod. 13.a.2. 34.c.19.

30

So suldy ooc doen met uwen Ossen ende schapen: Seuen dagen latet by zijnder moeder zijn, ten achtsten dage suldijt my geuen.

31

Ghy sult heylighe lieden voor my zijn^* daerom en suldy gheen vleesch eten, dat opten velde vanden dieren verschuert is, maer voor de Honden worpen.

* Leuit. 22.a.8.