Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

De HEEre gheeft Mosi de twee tafelen der gheboden aen dat volck.

1

⁺ ENde Godt sprac alle dese woorden:

+ A vers 1

2

^† Ick ben de HEEre uwe Godt^‡ ick die v wt Egypen landt, wten diensthuyse gheleyt hebbe.

† Deut. 3.a.6.

‡ exo. 14.f.29. Prou. 3.a.5.

3

Ghy en sult gheen ander goden neuen my hebben.

4

^* Ghy en sult v gheen Beelden noch eenich gelijckenis maken, noch van tghene dat daer bouen in den Hemel is, noch van datter beneden op Aerden is, oft van datter in het water onder der Aerden is.

* Deu. 4.c.16 27.b.15.

5

En aenbidtse niet, noch en dientse niet. Want ick de HEEre uwe Godt, ben een ieloersche Godt,^* die daer besoecke der vaderen misdaet aenden kinderen, tot in dat derde ende vierde Lidt, die my haten:

* Exod. 34.a.7 Deut. 7.b.10.

6

Ende doe bermherticheyt aen veel duysenden, die my lief hebben, ende mijn gheboden houden.

7

^+† Ghy en sult den Naem des HEEren dijns Godts niet misbruycken. Want de HEEre en sal dien niet ongestraft laten, die sinen Naem misbruyckt.

+ B vers 7

† Leui. 19.c.12. Eccl. 23.b.9. Leui. 24.b.11

8

Ghedenckt des Sabbaths dach, dat ghy hem heylicht.

9

^† Ses daghen suldy aerbeyden, ende alle uwe dinck wtrichten.

† Exod. 23.b.12 34.c.21. 35.a.2 Ezech. 20.b.12

10

Mer ten seuensten dage, is den Sabbath des HEEren ws Godts: Soo en suldy geen werck doen, noch v soon, noch v dochter, noch v knecht, noch v dienstmaecht, noch v Vee, noch v vremdelinck die in uwe poorten is.

11

^† Want in ses dagen heeft de HEEre Hemel ende Aerde ghemaeckt, ende de zee, ende al wat daer in is, ende ruste ten seuensten dage. Daer om ghebenedide de HEEre den Sabbath dach, ende heylichde hem.

† Gen. 2.a.2.

12

^* Gy sult v vader ende v moeder eeren, op dat ghy lange leeft inden lande, dat v de HEEre uwe Godt gheeft.

* Mat. 15.a.4. Ephe. 6.a.2.

13

^+† Ghy en sult niet dooden.

+ C vers 13

† Mat. 5.b.21.

14

^* Ghy en sult gheen ouerspel doen.

* Mat. 5.e.27

15

^‡ Ghy en sult niet stelen.

‡ Mat. 19.c.18

16

^* Ghy en sult gheen valsche getuychenisse spreken, teghen uwen naesten.

* Rom. 13.b.9

17

^† Ghy en sult niet begheren ws naesten huys.

^* Ghy en sult niet begeren ws naesten wijf, noch sinen knecht, noch zijn dienstmaecht, noch sinen osse, noch sinen ezel, noch alle dat, dat uwe naeste heeft.

† Rom. 7.b.7

* eccl. 42.a.16 Mat. 5.d.28.

18

Ende alle dat volck sach den donder ende blixem, ende dat gheluyt der basuynen, ende den Berch roocken. Maer doe sy sulcx sagen, vloden sy, ende stonden van verre,

19

Ende spraken tot Mose:^† Spreect ghy met ons, wy willen toehooren, ende en laet Godt niet met ons spreken, wy mochten anders steruen.

† Deut. 18.c.16. Heb. 12.c.19.

20

Maer Mose sprac totten volcke: En vreest v niet, want Godt is ghecomen, dat hy v proefde, ende dat v zijn vreese voor ooghen ware, dat ghy niet en sondichden.

21

⁺ Also tradt dat volck van verre: Maer Mose ginck in totter donckerheyt daer Godt in was.

+ D vers 21

22

Ende de HEEre sprack tot hem: Also suldy den kinderen Israels seggen: Ghy hebt ghesien, dat ick met v vanden Hemel ghesproken heb,

23

Daer om en suldy niet neuen my maken: Silueren ende gulden Goden en suldy v niet maken.

24

^† Eenen altaer van Aerden maeckt my, daer ghy uwen brantoffer ende danckoffer, uwe schapen ende runderen op offert. Want in welcke stede daer ic mijns Naems ghedachtenisse stichten sal, daer wil ick tot v comen, ende v gebenedien.

† Esai. 65.c.7.

25

^† Ende wildy my eenen steenen altaer maken, so en suldy dien niet van gehouwen steenen bouwen. Want ist dat ghy met v mes daer op coemt, soo suldy dien ontwijen.

† Deut. 27.a.6. Ios. 8.g.30. 1.Mach. 4.f.47.

26

Ghy en sult ooc niet op trappen tot mijnen altaer climmen, dat uwe schamelheyt niet ontdeckt en worde voor hem.