Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ In Raphidim twiste dat volck met Mose om des waters wil, ende dat selue coemt haer wt den steen. Ende nae dien strijden si teghen Amalek.

1

⁺ ENde de geheele Menichte der kinderen Israels, trock wt der woestijnen Sin, haer dachreyse, soo hen de HEEre beual, ende si legherden hen in^* Raphidim. Daer en had dat volc gheen water te drincken.

+ A vers 1

* Nu. 33.b.14.

2

Ende si keuen tegen Mose, ende spraken: Gheeft ons water, dat wy drincken. Mose sprack tot hen: Wat kijft ghy tegen my? Waerom tempteerdy den HEEre?

3

Maer doen dat volck aldaer dorst had nae water, murmureerden si teghen Mose, segghende:^† Waerom hebdy ons laten trecken wt Egypten, dat ghy ons, onse kinderen, ende Vee van dorste laet steruen?

† Num. 20.a.4 Iud. 7.d.13.

4

⁺ Mose riep totten HEEre, ende sprack: Hoe sal ic doch metten volcke handelen? Daer en schilt niet veel aen, si en sullen my noch steenen.

+ B vers 4

5

De HEEre sprack tot hem: Gaet voor dat volc voorhenen, ende neemt sommige Ouders van Israel met v, ende neemt uwen staf in v hant, daer ghy dat water mede sloecht, ende gaet henen.

6

Siet,^† ic wil aldaer staen voor v, op eenen steen in Horeb, daer suldy den steen slaen, dan sal daer water wt loopen, dat dat volc drincke. Mose dede also voor den ouders van Israel.

† 1.Cor. 10.a.4

7

Doen hietmen die stede Massa ende Meriba^† om des gekijfs wille der kinderen Israels, ende om dat si den HEEre getempteert ende geseyt hadden: Is de HEEre onder ons, oft niet?

† Num. 20.b.13 Deut. 9.d.22.

8

⁺ Doe quam^* Amalek ende street teghen Israel in Raphidim.

+ C vers 8

* Num. 20.c.20 Deut. 25.c.17. Abdi. 1.b.10. Iudith. 4.c.8

9

Ende Mose sprack tot Iosua: Kiest ons mannen wt, trect wt ende strijt tegen Amalek. Morghen wil ick op des cleynen berchs toppe staen, ende den staf Godts in mijn handt hebben.

10

Ende Iosua dede so hem Mose seyde, dat hy tegen Amalek streedt. Mose ende Aaron ende Hur clommen op den toppe des cleynen berchs.

11

Ende dewijle Mose zijn hant op hief,^* verwan Israel: Maer als hy zijn hant neder liet, verwan Amalek.

* lach Israel bouen.

12

⁺ Maer Mose handen waren swaer. Daerom namen si eenen steen, ende leydenen onder hem, dat hy daer op sitten soude. Ende Aaron ende Hur onderhielden hem zijn handen, op elcker siden een. Also bleuen zijn handen ghewis, tot dat de Sonne onder ginck.

+ D vers 12

13

Ende Iosua dempte Amalek ende zijn volck, door des sweerts scherpte.

14

Ende de HEEre sprack tot Mose: Schrijft dat tot eender gedenckenisse, in een boeck, ende beuelet inde ooren van Iosua.^† Want ick wil den Amalek onder den Hemel wtroeyen, datmen zijns niet meer en ghedencke:

† Nu. 24.d.20. 1.Reg. 15.a.2.

15

Ende Mose boude eenen Altaer, ende hiet hem, de HEEre^* Nissi.

* Nissi heet mijn Baniere

16

Want hy sprack: Het is een Teecken, by den stoel des HEEren, dat de HEEre strijden sal teghen Amalek van kinde tot kindts kinde.