Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Moses metten volcke Godts singhen den Heere eenen lofsanck. Sy comen tot Marach, daer wert dat bitter water soet.

1

⁺ DOen sanck Mose ende de kinderen Israels dit Liedt den HEEre, ende spraken:

^† Ick wil den HEEre singen, want hy heeft een heerlijcke daet gedaen: Ros ende waghen heeft hy om gheworpen in de zee.

+ A vers 1

† Exod. 15.c.21.

2

De HEEre is mijn^* sterckte ende Lofsanck, ende is mijn^† salicheyt.

^* Dat is mijn Godt, ick wil hem prijsen: Hy is mijns vaders Godt, ick wil hem verheffen.

* psal. 118.b.14

† of hulpe.

* Esai. 12.a.2.

3

De HEEre is de rechte crijschman: HEEre is sinen Naem.

4

Pharaos waghenen, ende zijn macht werp hy in de zee.

5

Sijn wtuercoren Hooftlieden versoncken in de^† roode zee, Die diepte heeftse bedeckt. Sy vielen te gronde ghelijck de steenen.

† of Schelpmeer.

6

HEEre, uwe rechte hant doet groote wonderen. HEEre, uwe rechte handt heeft de vianden verslagen.

7

Ende met uwe groote heerlicheyt heb-dy uwe wederspannige verstooten: Want doen ghy v gramschap wt liet, verteerde syse als stoppelen.

8

Door dijn blasen, deden hen de wateren op, ende de Vloeden stonden op hoopen: De diepten wentelden van malcanderen, midden in de zee.

9

⁺ De viant dacht: Ick wilse nae iagen, ende grijpense, ende den roof wt deylen, ende mijnen moet aen hen coelen.

Ick wil mijn sweert wttrecken, ende mijn hant salse verderuen.

+ B vers 9

10

Doen liet ghy uwen wint blasen, ende de zee bedecktese, ende soncken onder, als loot in machtighe wateren.

11

HEEre, wie is v ghelijck onder de Goden? Wie is v ghelijck, die soo machtich, heylich, verschrickelijck, louelijck, ende wonderdadich sy?

12

Als ghy v rechterhandt wt recte, verslontse de Aerde.

13

Ghy hebt gheleyt door uwe bermherticheyt v volck dat ghy verlost hebt, ende hebtse gheuoert door uwe sterckte tot uwe heylighe wooninghe.

14

Doe dat de volcken hoorden, beefden sy, anxt quam de Philistinen aen.

15

^* Doe verschricten de Vorsten Edoms, beuen quam den gheweldighen Moab aen. Alle inwoonders Canaan werden versaecht.

* Ios. 2.b.9.

16

Laet ouer hen vallen verschricken ende vreese, door uwen grooten Arm, dat sy onberuerlijck zijn als steenen, tot dat v volck, HEEre, door come, tot dat dit volck door come, dat ghy verworuen hebt.

17

⁺ Brencktse in, ende plantse opten berch ws erfdeels, die ghy HEEre tot uwer wooninghen ghemaeckt hebt, tot uwen heylichdom, HEEre dat uwe handt bereyt heeft.

+ C vers 17

18

De HEEre sal Coninc zijn altijt ende eewelijck.

19

Want Pharao tooch in, in de zee, met Rossen ende wagenen, ende Ruyteren, ende de HEEre liet de zee weder ouer hen vallen.

Maer de kinderen Israels ghinghen drooghe midden door de zee.

20

Ende Mir Iam de prophetersse, Aarons suster, nam een trommele in haer hant, ende alle wijuen volchden haer nae wtwaerts, met trommelen in eenen reye.

21

Ende Mir Iam sanck haer voor.^† Laet ons den HEEre singhen, want hy heeft een heerlijcke daedt ghedaen. Man ende Peert heeft hy in de zee gheworpen.

† Exod. 15.a.1.

22

^+* Mose liet de kinderen Israels trecken vande roode zee wt, totter woestijnen Sur, ende sy wandelden drie daghen inder woestijnen, datse gheen water en vonden.

+ D vers 22

* Num. 33.b.8.

23

Doe quamen sy te Mara. Maer sy en consten dat water te Mara niet gedrincken, want het was seer bitter. Daer af heetmen de plaetse Mara.

24

Doen murmureerde dat volck tegen Mose, seggende: Wat sullen wy drincken?

25

Hy riep totten HEEre.^† Ende de HEEre wees hem eenen Boom, dien leyde hy int water, doen wert het suet.

Aldaer maeckte hy een wet ende een recht, ende proefdese, ende sprack:

† Iudit. 5.d.14 4.Re. 4.f.41 Eccle. 38.a.9.

[p. 27r]

26

^† Hoordy de stemme des HEEren ws Godts, ende doedy dat recht is voor hem, ende vaet ghy in uwen ooren zijne gheboden, ende houdy alle zijn insettingen, so en wil ick gheen van den cranckheden op v legghen, die ick op Egypten gheleyt heb: Want ick ben de HEEre, uwe Medecijnmeester.

† Deu. 28.f.60.