Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ De Heere beueelt haer alle de yerstgeboren te heyligen, hy leytse nae tbeloofde lant, niet opt naeste, maer door de woestijne, sdaechs met een wolccalumne, ende des nachts met een viercalumne.

1

⁺ ENde de HEEre sprack met Mose, segghende:

+ A vers 1

2

^† Heyliget my alle yerstegeboorte die alderley moeder breeckt, by den kinderen Israels, beyde menschen ende Vee: Want sy zijn mijn.

† Exod. 22.d.29 34.c.19. Num. 8.c.16. 1.Reg. 1.d.24 Luc. 2.d.23.

3

Doen sprack Mose totten volcke: Gedenct aen desen dach, inden welcken ghy wt Egypten, wt den diensthuyse gegaen zijt, dat v de HEEre met machtigher handt van hier wt heeft geleyt. Daerom en suldy gheen^* suerdeech eten.

* 1.Cor. 5.a.5.

4

Heden sydy wtghegaen inder maent Abib.

5

Wanneer v nv de HEEre brengen sal int landt der Cananiten, Hethiten, Amoriten, Heuiten, ende Iebusiten^* dat hy uwen vaderen ghesworen heeft, v te gheuen een landt daer melc ende honich in vloeyt: So suldy desen dienst houden in dese maent.

* Gen. 15.d.18. Exod. 3.d.17.

6

Seuen dagen suldy onghesuert broot eten, ende aenden seuensten daghe is des HEEren feest.

7

Daerom suldy seuen dagen ongesuert broot eten, dat by v geen suerdeech noch ghesuert broot ghesien en worde in alle uwe palen.

8

⁺ Ende ghy sult uwen soonen segghen inden seluen daghe [sulcx houden wy.] Om des wille dat ons de HEEre ghedaen heeft, doen wy wt Egypten togen.

+ B vers 8

9

Daerom salt v een teecken zijn in uwe handt, ende een gedenckteecken voor uwen ooghen, op dat des HEEren Wet sy in uwen mont, dat v de HEEre met machtiger handt wt Egypten gheleyt heeft.

10

Daerom houdt dese maniere, tot zijnder tijt iaerlijcx.

[p. 26r]

11

Wanneer v nv de HEEre int landt der Cananiten ghebracht heeft,^* also hy v, ende uwen Vaderen gesworen heeft, ende dat v ghegheuen.

* Gen. 15.d.18.

12

Soo suldy den HEEre wtscheyden, Alle wat de moeder breect, ende de yerste geboorte onder dat Vee, dat een Hy is.

13

De yerste geboorte van eenen Ezel suldy lossen met een schaep: Maer ist dat ghijs niet en lost, so breeckt hem den necke. Maer alle yerste menschen geboorte onder uwe kinderen, suldy lossen.

14

⁺ Ende wanneer v kint, heden oft morgen v vragen sal: Wat is dat? Suldy hem segghen: De HEEre heeft ons met machtiger hant wt Egypten, vanden diensthuyse gheuoert,

+ C vers 14

15

Want doen Pharao verhert was, ons los te laten, versloech de HEEre alle yerstgheboorte in Egypten landt, van des menschen yerstegheboorte aen tot aen de yerstegeboorte des Vees. Daerom offere ick den HEEre al wat zijn moeder breect, dat een Hy is, ende de yerstegeboorte mijnder kinderen losse ick.

16

Ende dat sal v een teecken in uwe handt zijn, ende een gedenckteecken voor uwen ooghen, dat ons de HEEre met machtiger handt wt Egypten gheuoert heeft.

17

⁺ Doen nv Pharao dat volck verlaten hadde, en leydese Godt niet op de strate door der Philistijnen lant, die ten naesten was, Want God dachte: Het mocht den volcke berouwen, als sy den strijt sagen, ende wederom in Egypten keeren.

+ D vers 17

18

Daerom leyde hy dat volck om, op de strate, door de woestijne aen de^† roode zee. Ende de kinderen Israels trocken ghewapent wt Egypten lant.

† Schelpmeer.

19

Ende Mose nam met hem Iosephs ghebeenten, want hy had eenen eedt vanden kinderen Israels genomen, ende gesproken:^† Godt sal v besoecken, so voert mijn ghebeente, met v van hier.

† Gen. 50.d.24 Iosue. 24.f.32

20

^* Also trocken sy wt van Suchoth, ende sloegen Tenten op in Etham voor inder woestijne.

* Nu. 33.b.6.

21

Ende de HEEre tooch voor hen^* des daechs in een wolckcalomne, dat hyse den rechten wech leyde. Ende des nachts in een viercalomne, dat hy hen lichte, te wandelen dach ende nacht.

* 1.Cor. 10.a.1. Esai. 4.b.5.

22

De wolckcalomne en weeck nemmermeer vanden volcke des daechs, noch de viercalomne des nachts.