Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ De Heere leert het ghebruyck des Passah, des Paeschlams, ende des onghesuerden broots. Hy verslaet inder nacht de yerstegheborenen, Daer om verdrijft Pharao tvolck van Israel wt sinen lande.

1

⁺ MAer de HEEre sprack tot Mose ende Aaron in Egypten lant:

+ A vers 1

2

Dese maent sal by v de yerste maent zijn, ende van deser sult ghy de maenden des iaers beginnen.

3

Seght der gantscher^† Menichten Israels,^* ende spreect: Inden thiensten dach van deser maent, neme een yeghelijck een Lam, waer dat een huysuader is, een Lam tot elcken huyse.

† oft vergaderinghe.

* Exo. 23.b.15

4

Maer waer haerder in een huys, tot een Lam te weynich zijn, So neme hijt, ende zijn naeste nagebuer aen sinen huyse, tot dat haerder soo vele worde, dat sy dat Lam op eten connen.

5

Maer ghy sult een sulcken Lam nemen, daer gheen gebreck aen en is, een^† Hy, ende een iaer out. Vanden lammeren ende geyten suldijt nemen.

† Manneken.

6

^* Ende sullet behouden tot opten veerthiensten dach des maents. Ende eenen yegelijcken hoop, in den gantschen Israel salt slaen tusschen den Auont:

* Ezec. 45.c.21.

7

⁺ Ende ghy sult van sinen bloede nemen,^† ende beyde posten aender dueren, ende den oppersten dorpel daermede bestrijcken, aende huysen, daer zijt in eten:

+ B vers 7

† Ezech. 9.b.4 Apoc. 7.a.3.

8

Ende sult alsoo vleesch eten, in dier seluer nacht, aenden viere ghebraden, ende onghesuert broot,

9

Ende sullet met bitteren cruyde eten? Ghy en sullet niet rou eten, noch met water gesoden: Maer aent vier ghebraden, zijn hooft met sinen beenen ende ingewant.

10

Ende en sulter niet af ouer laten totten morghen: Maer ist datter wat ouerblijft totten morghen, soo suldijt met vier verbernen.

11

Ende aldus suldy dat eten: Om uwe lendenen suldy gegort zijn, ende uwe schoenen aen uwe voeten hebben, ende stocken in uwe handen, ende sullet metter haest eten, als die hen wech haesten: Want het is des HEEren Passah.

12

Want ic wil in der seluer nacht, duer Egypten landt gaen, ende alle yerstgeboorten slaen in Egypten landt, beyde onder den menschen ende Vee, ende wil mijn straffe bewijsen aen alle de goden der Egyptenaren.

13

Ick de HEEre.^† Ende dat bloet sal uwe teecken zijn, aen de huysen daer ghy in zijt, Dat, wanneer ick dat bloet sie, voor v voor by gae, ende v de plage niet en ghebuere die v verderue, wanneer ick Egypten landt slae.

† Heb. 11.e.28.

14

⁺ Ende sult desen dach hebben tot een ghedachtenisse, ende sulten den HEEre vieren tot een feeste, ghy ende al uwe nacomelinghen, tot een eewighe wijse.

+ C vers 14

15

^* Seuen dagen suldy ongesuert broot eten, te weten, inden yersten daghe suldy ophouwen, met ghesuerden broode in uwen huysen. So wie gesuert broot eet, vanden yersten dach aen, tot opten seuenden, diens siel sal wtgeroyt worden van Israel.

* Exod. 23.b.15. 34.c.18.

16

Den yersten dach sal heylich zijn, dat ghy te samen coemt, ende den seuenden sal ooc heylich zijn, dat ghy te samen coemt. Gheen arbeyt en sult ghy daer in doen, dan alleen dat der spijsen aengaet voor alderley sielen, dat selfde alleen muechdy voor v doen.

17

^† Ende hout v aen dat onghesuerde broot. Want recht opten seluen dach, heb ick uwe heyr wt Egypten landt gheleyt. Daerom suldy desen dach houden, ende al v nacomelinghen, tot een eewich ghebruyck.

† Leuit. 23.a.5. Num. 28.c.16.

18

Ten veerthiensten daghe, der yerster maent, des auonts, suldy onghesuert broot eten, tot aen den eenentwintichsten dach der maent aen den auont,

19

Datmen in seuen daghen gheen ghesuert broot en vinde, binnen uwen huyse: Want wie ghesuert broot eet, diens siel sal wtgheroyt worden, vander ghemeynten Israels: Het sy een vreemdelinck oft een inwoonder inden lande.

20

Daerom en eet gheen ghesuert broot, maer enckel ongesuert broot, in alle uwe wooninghen.

21

⁺ Ende Mose liet alle Outsten in Israel roepen, ende sprack tot hen: Leest wt ende neemt schapen, een yeghelijck voor zijn ghesin, ende slaet dat Passah.

+ D vers 21

22

Ende neemt een busselken Isopen, ende doopet in dat bloet, in het becken, Ende aenroert daermede den ouerdorpel, ende die twee posten. Ende niemant en gae tot zijnder huysdueren wt, tot aenden morghen.

23

Want de HEEre sal rontom gaen, ende de Egyptenaren plagen. Ende als hy dat bloet sien sal aenden ouerdorpel, ende aen de twee posten, so sal hy

[p. 25v]

voor de duere voor by gaen, ende den verderuer binnen uwen huyse niet laten comen om v te plagen.

24

Daerom so hout dese wijse voor v, ende uwen kinderen eewelijck.

25

Ende als ghy int lant coemt, dat v de HEEre geuen sal, so hy gheseyt heeft, so hout desen dienst.

26

Ende^† wanneer uwe kinderen tot v seggen sullen: Wat hebt ghy daer voor eenen dienst?

† Ios. 4.d.21.

27

Soo suldy seggen: Het is dat Passah offer des HEEren die voor de kinderen Israels voor by ginck in Egypten, doen hy de Egyptenaren plaechde ende onse huysen verloste.

28

Doen neychde hen dat volck ende aenbaden. Ende de kinderen Israels gingen henen, ende deden soo de HEEre Mose ende Aaron gheboden hadde.

29

⁺ Ende ter middernacht^† sloech de HEEre alle yerstgheboorte in Egypten landt, Vanden yersten soon Pharao aen, die op sinen stoel sadt, tot op den yersten soon des gheuangenen inder gheuanckenisse, ende alle yerstgheboorte des Vees.

+ E vers 29

† Exod. 11.b.4. Psal. 78.e.51. 135.b.8. 136.a.10. Sap. 18.c.11.

30

Doen stont Pharao op, ende alle zijn knechten, inder seluer nacht, ende alle Egyptenaren, Ende daer wert een groot gheschrey in Egypten. Want daer en was gheen huys daer geen doode in en was.

31

^* Ende hy dede Mosen ende Aaron inder nacht roepen, ende sprack: Maect v op, ende treckt wt van mijnen volcke, ghy, ende de kinderen Israels.^† Gaet henen ende dient den HEEre, so ghy geseyt hebt.

* Exo. 10.f.24.

† 1.Reg. 6.b.6.

32

Neemt oock met v, uwe schapen ende runderen, so ghy gheseyt hebt, gaet henen, ende gebenedijt my oock.

33

Ende de Egyptenaren drongen dat volck, dat zijt haestelijck wt den lande dreuen: Want sy seyden: Wy zijn alle des doots.

34

Ende dat volck droech dat rouwe deech, eer dattet gesuert worde, tot haerder spijsen, gebonden in haer cleederen, op hare schouderen.

35

^† Ende de kinderen Israels hadden ghedaen, so Mose geseyt had, ende hadden vanden Egyptenaren gheeyscht, silueren ende gulden Iuweelen ende cleederen.

† Exod. 3.c.22. 11.a.2.

36

^† Daer toe had de HEEre den volck ghenade ghegeuen voor den Egyptenaren, dat zijt hen leenden, ende onkeerdent den Egyptenaren.

† Exod. 3.g.22. 11.a.2. Gen. 15.c.14.

37

^+† Also trocken de kinderen Israels wt van Raemses nae Suchoth, Seshondert duysent mannen te voet, sonder de kinderen.

+ F vers 37

† Num. 11.c.21. 33.a.3. Iosue. 24.b.6

38

Ende veel des ghemeynen volcx, tooch oock met hen, ende schapen ende Runderen, ende geheel veel Vees.

39

Ende sy biecken vanden rouwen deege, dat sy wt Egypten brachten, onghesuerde coecken. Want ten was niet ghesuert, dewyle sy wt Egypten ghestooten werden, ende en condent niet vertrecken, ende en hadden hen anders gheen teeringhe toebereyt.

40

^* Maer den tijt die de kinderen Israels in Egypten gewoont hebben, is, vierhondert ende dertich iaer.

* Gen. 15.c.16. Act. 7.a.6.

41

Doen de selue om waren, ghinck dat geheel heyr des HEEren op eenen dach wt Egypten landt.

42

Daerom wort desen nacht den HEEre ghehouden, dat hyse wt Egyp-ten landt ghe uoert heeft. Ende de kinderen Israels sullen hem den HEEre houden, sy, ende hare nacomelinghen.

43

⁺ Ende de HEEre sprack tot Mose ende Aaron: Dit is de wijse Passah te houden: Gheen vreemde en sal daer af eten.

+ G vers 43

44

Maer wie een gecocht knecht is, dien salmen besnijden, ende dan ete hy daer af.

45

Een huysgenoot ende gehuert knecht en sullen daer niet af eten.

46

In een huys salment eten. Ghy en sult van sinen vleesche buyten voor dat huys niet draghen.^† Ende ghy en sult gheen been aen hem breken.

† Num. 9.b.12. Ioan. 19.d.36

47

De gheheele Menichte Israels sal sulcx doen.

48

Maer ist datter een vreemdelinck by v woont, ende den HEEre dat Passah houden wil, die besnijde alle dat manlijc is: Ende dan ga hy toe, dat hy sulcx doe, ende sy als een lantbesitter. Want gheen onbesneden en sal daer af eten.

49

Eenderley wet sy den lantbesitter, ende den vreemdelinck die onder v woont.

50

Ende alle kinderen Israels deden, also de HEEre Mose ende Aaron gheboden hadde.

51

^† Also leyde de HEEre op eenen dach, de kinderen Israels wt Egypten landt met haren heyr.

† Iudic. 6.b.8.