Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ De Heere seyt Mose noch van eender straffinge die hy ouer Egipten wil seynden. Hy beueelt dat de Israeliten van haren naesten gulden ende silueren vaten souden eysschen, ende haer die ontdraghen.

1

⁺ ENde de HEERE sprack tot Mose: Ick wil noch een plaghe ouer Pharao ende Egipten laten comen, daer nae sal hy v verlaten van hier, ende en salt niet alleen al verlaten, maer v oock van hier drijuen.

+ A vers 1

2

So seght nv voor den volcke^* dat een yeghelijck van sinen naesten, ende een yegelijcke van haren naesten,

* Exod, 3.e.22. 12.e.35.

[p. 25r]

silueren ende gulden vaten eyssche.

3

Want de HEEre sal den volcke ghenade gheuen voor den Egyptenaren.^† Ende Mose was een seer groot man in Egypten lant, voor de knechten Pharaos, ende voor den volcke.

† Eccle. 45.a.1.

4

⁺ Ende Mose sprack: Aldus seyt de HEEre:^* Ick wil ter middernacht wtgaen in Egypten landt,

+ B vers 4

* Exod. 12.e.29

5

Ende alle yerste gheboorte in Egypten landt, sal steruen: Van Pharaos yersten soon aen, die op sinen stoel sidt, totten yersten soone der dienstmaecht die achter de Muelen is, ende alle yerste gheboorte onder dat Vee.

6

Ende daer sal eenen grooten roep zijn in alle Egypten landt, des gelijcx noyt geweest en is, noch zijn en sal.

7

Maer by allen kinderen Israels en sal niet eenen hondt zijn tonge roeren, vanden Menschen aen tot aen dat Vee. Op dat ghy mercket, hoe de HEEre Egypten ende Israel scheyde.

8

^+* Dan sullen tot my af comen alle dese uwe knechten, ende my te voete vallen, ende segghen: Treckt wt, ghy, ende alle dat volck, dat onder v is. Daer nae wil ick wt trecken. Ende hy ginck van Pharao met grimmighen tooren.

+ C vers 8

* Exod. 12.e.31.

9

De HEEre sprack tot Mose: Pharao en hoort v niet, op dat veel wonderen geschieden in Egypten landt.

10

Ende Mose ende Aaron hebben dese wonderen al ghedaen voor Pharao. Maer de HEEre verstocte hem zijn herte, dat hy de kinderen Israels niet verlaten en wilde wt sinen lande.