Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Moses ende Aaron ghaen totten Coninck, sy doen teeckenen voor hem, maer de Coninck is onghehoorsaem, ende verhert.

1

⁺ DE HEERE sprack tot Mose: Siet, ic heb v tot eenen Godt geset ouer Pharao, ende Aaron v broeder sal uwe Propheet zijn.

+ A vers 1

2

Ghy sult seggen alle wat ick v gebieden sal. Maer Aaron v broeder sal tot Pharao seggen, dat hy de kinderen Israels wt sinen lande verlate.

3

^† Maer ick wil Pharaos herte verherden, dat ick mijnre teeckenen ende wonderen vele doe in Egypten landt.

† Exod. 4.d.21

4

Ende Pharao en sal v niet hooren, op dat ick mijn handt in Egypten bewijse, ende leyde mijn heyr, mijn volck de kinderen Israels wt Egypten landt, door groote oordelen.

5

Ende de Egyptenaren sullen ghewaer worden, dat ick de HEERE ben, als ick nv mijn handt ouer Egypten wt strecken, ende de kin-deren Israels van hen wechleyden sal.

6

⁺ Mose ende Aaron deden also hen de HEERE geboden hadde.

+ B vers 6

7

Ende Mose was tachtentich iaer out, ende Aaron drientachtentich iaer out, doen sy met Pharao spraken.

8

Ende de HEERE sprac tot Mose ende Aaron.

9

Wanneer Pharao tot v sal seggen: Bewijst uwe wonder, dan suldy tot Aaron segghen: Neemt uwen staf ende werpten voor Pharao, dat sy tot een slange werde.

10

Doen ginghen Mose ende Aaron in tot Pharao, ende deden so hen de HEERE geboden hadde. Ende Aaron werp sinen staf voor Pharao ende voor sinen knechten, ende hy wert tot een slanghe.

11

Doen ontboot Pharao de wijse ende toouenaers.^* Ende de Egyptensche toouenaers deden oock alsoo, met haren besweeren.

* 2.Tim. 3.b.8. Sap. 17.b.7.

12

Een yegelijck werp sinen staf van hem, ende daer werden slangen wt. Maer Aarons staf verslont hare stauen.

13

Also wert dat herte Pharao verstoct, ende en hoordese niet, ghelijck de HEERE ghesproken hadde.

14

⁺ Ende de HEERE sprack tot Mose: Pharaos herte is hert, hy weygert hem dat volck te verlaten.

+ C vers 14

15

Gaet morgen henen tot Pharao, siet, hy sal aent water gaen. So gaet hem onder oogen aenden oeuer des waters, ende neemt den staf in v hant die tot eender slangen wert,

16

Ende segt tot hem: De HEERE der Hebreen Godt, heeft my tot v gesonden, ende v laten segghen:^† Verlaet mijn volck, dattet my diene inder woestijnen. Maer ghy en hebt dus lange niet willen hooren.

† Exod. 8.a.1.

17

Daerom spreeckt de HEERE alsoo: Daer aen suldy beuinden, dat ic de HEERE ben: Siet, ick wil metten staf die ick in mijn handt heb, dat water slaen, dat inden stroom is, ende het sal in bloet verandert worden,

18

⁺ Dat de Visschen in de Vliete steruen sullen, ende de Vliet stincken, ende den Egiptenaren walgen sal te drincken dat water wt den Vliete.

+ D vers 18

19

Ende de HEERE sprack tot Mose: Seght Aaron: Neemt uwen staf, ende reckt uwe handt wt, ouer de wateren in Egipten. Ouer hare Beken, ende stroomen ende zee, ende ouer alle waterputten, dat sy bloet worden, ende daer sy bloet in dat gantsche Egipten lant, beyde in houten, ende steenen vaten.

20

Mose ende Aaron deden^* soo hen de HEERE gheboden hadde, ende hief den staf op, ende sloech int water dat inden Vliet was, voor Pharao ende zijne knechten. Ende alle dat water in den Vliete wert in bloet verandert.

* psal. 78.e.44 105.c.29.

21

Ende de Visschen inde Vliete storuen, ende de Vliete wert stinckende, alsoo dat de Egiptenaren niet ghedrincken en conden, vanden water wter Vlieten, ende daer was bloet in al Egipten landt.

22

Ende de Egiptische^* toouenaers deden oock also met haren besweren.^† Alsoo wert dat herte Pharaos verstockt, ende en hoordese niet, also de HEERE ghesproken had.

* Sap. 17.b.7.

† Exo. 4.d.21 7.a.3.

23

Ende Pharao keerde hem, ende ginck nae huys, ende en keerde daer zijn herte niet aen.

24

Maer alle

[p. 23v]

Egiptenaren groeuen nae water ontrent de Vliete, om te drincken, want sy en conden vanden water wter Vlieten niet gedrincken.

25

Ende dat duerde seuen daghen lanck, dat de HEERE de Vliete sloech.