Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Godt onderwijst Mosen voorder, ende seynt hem totten volcke. Hier worden de gheslachten ghetelt.

1

⁺ ENde Godt sprack met Mose, seggende tot hem: Ick ben de HEEre^* ende ben verscenen Abraham, Isaac ende Iacob, dat ic haren Almachtigen Godt zijn woude. Maer mijnen naem, HEEre, en heb ick hen niet condich ghemaect.

+ A vers 1

* Gene. 17.a.1. 32.b.7.

2

Oock heb ic mijn verbont met hen gemaect, dat ick hen geuen wil dat lant Canaan, dat lant haerder wandelingen [oft pilgrimagien] daer sy vreemdelingen in gheweest zijn.

3

Ooc heb ick^* gehoort de weeclage der kinderen Israels, die de Egiptenaren met Hofdienst beswaren. Ende heb aen mijn verbont ghedacht.

* Exod. 3.b.7.

4

Daerom segt den kinderen Israels: Ick ben de HEEre, ende wil v wtleyden van uwen lasten in Egipten, ende wil v verlossen van uwen Hofdienst. Ende wil v verlossen door eenen wtgerecten arm, ende grooten vonnisse.

5

Ende ick wil v aennemen tot een volck, ende wil uwe Godt zijn, dat ghijt beuinden sult, dat ick de HEEre ben uwe God, die v wtgeleyt heeft vanden last Egipti,

6

⁺ Ende v ghebracht in dat lant, daer ick mijn hant heb ouergeheuen, dat ict gheue Abraham, Isaac ende Iacob, dat wil ick v geuen tot eygen: Ick de HEEre.

+ B vers 6

7

Mose seyde sulcx den kinderen Israels. Maer sy en hoorden hem niet, ouermits het suchten ende ancxt, ende herden arbeyt.

8

Doen sprack de HEEre met Mose, segghende:

9

Gaet henen, ende spreect met Pharao den Coninc in Egipten, dat hy de kinderen Israels wt zijnen lande verlate.

10

Maer Mose sprack voor den HEEre, seggende: Siet, de kinderen Israels en hooren my niet, hoe soude my dan Pharao hooren?^† Daer toe ben ick van onbesneden lippen.

† Exod. 4.b.10 6.d.27.

11

Also sprack de HEEre met Mose ende Aaron, ende dede hen beuel aen de kinderen Israels, ende Pharao de Coninc in Egipten, dat sy de kinderen Israels wt Egipten leyden souden.

12

Dit zijn de hoofden, in elck gheslachte der Vaderen.^† De kinderen Ruben des eersten soons Israels, zijn dese: Hanoch, Pallu, Hezron, Carmi, dat zijn de

† Ge. 46.b.8. Num. 26.a.5. 2.Par. 6.a.3.

[p. 23r]

geslachten van Ruben.

13

De kinderen Simeons, zijn dese: Iemuel, Iamin, Ohad, Iachin, Sohar, ende Saul, de soone des Cananeetschen wijfs, dat zijn Simeons gheslachten.

14

⁺ Dit zijn de namen der kinderen Leui, in haeren gheslachten^† Gerson, Kahath, Merari. Maer Leui wert hondert ende seuenendertich iaer out.

+ C vers 14

† Num. 3.c.17

15

Gersons kinderen zijn dese: Libni ende Semei, in haren gheslachten:

16

Kahath kinderen zijn dese^† Amram, Iezear, Hebron, Vsiel, Ende Kahath waert hondert ende driendertich iaer out.

† 1.Par. 24.b.12.

17

Merari kinderen zijn dese: Maheli, ende Musi, dat zijn de gheslachten Leui, in haren stammen.

18

^* Ende Amram nam zijns Vaders suster Iochebed ten wijue, die baerde hem Aaron ende Mose. Maer Amram wert hondert ende seuenendertich iaer out.

* Exod. 2.a.1. Nu. 26.g.59.

19

Iezears kinderen zijn dese: Korah, Nepheg, Sichri.

20

De kinderen Vsiel, zijn dese: Misael, Elzaphan, Sithri.

21

⁺ Aaron nam ten wijue Eliseba, de dochter Ammi Nadab, Nahassons suster: Die baerde hem Nadab, Abmu, Eleazar, Ithamar.

+ D vers 21

22

De kinderen Korah zijn dese: Assir, Elkana, Abiassaph, dat zijn de gheslachten der Korithen.

23

Maer Eleazar Aarons soone, die nam vanden dochteren Putiel een wijf, die baerde hem Pinehas. Dat zijn de hoofden onder de vaderen der Leuiten gheslachten.

24

Dat is Aaron ende Mose, tot dien de HEERE sprac: Leyt de kinderen Israels wt Egipten landt, met haren heyren.

25

Sy zijnt, die met Pharao den Coninck in Egypten spraken, dat sy de kinderen Israels wt Egypten souden leyden, te weten, Mose ende Aaron.

26

Ende in dien dage sprack de HEERE met Mose in Egypten landt, ende seyde tot hem: Ick ben de HEERE, spreeckt met Pharao den Coninck in Egypten, al wat ick met v spreecke.

27

Ende hy antwoorde voor den HEERE:^† Siet, ick ben van onbesneden lippen, hoe sal my dan Pharao hooren?

† Exod. 4.b.10 6.b.10.