Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Godt de HEEre openbaert hem Mosi inden bossche, ende hy gheeft hem Mosi te kennen. Hy geeft hem beuel aenden Coninck ende aent volck.

1

⁺ MOse huedde de Schapen^† Iethro zijns Sweers des Priesters in Midian, ende dreef de Schapen achter in de woestijne, ende quam aenden berch Gods Horeb.

+ A vers 1

† Exod. 18.a.1.

2

Ende de^* Engel des HEEren openbaerde hem in een vierige vlamme wt den bossche. Ende hy sach dat dat bosch met viere bernde, ende en wert doch niet verteert,

* 4.Es. 14.a.3. Actor. 7.d.30.

3

Ende sprack: Ick wil daer henen, ende besien dat groot ghesichte, waerom dattet bosch niet en verbernt.

4

Maer doe de HEEre sach, dat hy henen ghinck om te sien, riep hem Godt wt den bosch, ende sprac: Mose, Mose. Hy antwoorde: Hier ben ick.

5

Ende hy sprack:^† En tredet niet herwaerts, trect v schoenen wt van uwe voeten, want de plaetse, daer ghy op staet, is een heylich lant.

† Iosue. 5.d.15.

6

Ende sprac noch:^† Ick ben de Godt ws vaders, de Godt Abrahams, de Godt Isaacs, ende de Godt Iacobs, Ende Mose bedecte zijn aensicht: Want hy vreesde hem Godt aen te sien.

† Mat. 22.d.32. Mar. 12.c.26. Luc. 20.e.37.

7

Ende de HEEre sprack: Ick heb ghesien den ellende mijns volcx in Egipten, ^* ende heb haer geschrey ghehoort, ouer die, diese drijuen. Ick heb haer leet bekent,

* Eccle. 21.a.6.

8

Ende ben neder ghestegen dat ickse verlosse vander Egiptenaren hant, ende hen wtleyde wt desen lande, in een goet ende^† wijt lant, in een lant daer melck ende honich in vloeyt, te weten, aen de syde der Cananiten, Hethiten, Amoriten, Pheresiten, Heuiten ende Iebusiten.

† Breet.

9

Dewijle dan nv dat gheschrey der kinderen Israels voor my ghecomen is, ende hebbe oock daer toe ghesien haren ancxt, hoese de Egiptenaren beancxten.

10

So^† gaet nv henen, ic wil v tot Pharao seynden, dat ghy mijn volc, de kinderen Israels wt Egipten leyt.

† Actor. 7.e.35. Psal. 105.d.26

11

Mose sprac tot God:^† Wie ben ic, dat ic tot Pharao gae, ende leyden de kinderen Israels wt Egipten?

† Iudi. 6.c.15.

12

⁺ Hy sprack: Ick wil met v zijn, ende dat sal v dat teecken zijn, dat ick v ghesonden heb: Als ghy mijn volck wt Egipten gheleyt hebt, soo suldy Gode offeren op desen Berch.

+ C vers 12

13

Mose sprack tot Godt: Siet, wanneer ick totten kinderen Israels come, ende segghe tot hen: De Got uwer vaderen heeft my tot v ghesonden, ende sy my segghen sullen:^* Hoe heet zijnen naem? Wat sal ick hen segghen?

* Iudic. 13.c.17.

14

Godt sprack tot Mose:^† Ick sal zijn, die ic zijn sal. Ende sprack: Aldus suldy tot den kinderen Israels segghen: Ick salt zijn, die heeft my tot v ghesonden.

† Ioan. 8.d.25

15

Ende voort sprack Godt tot Mose: Alsoo suldy totten kinderen Israels segghen:^† De HEERE uwer vaderen Godt, de Godt Abrahams, de Godt Isaacs, de Godt Iacobs, heeft my tot v ghesonden, dat is mijnen Naem eewelijc, daer by men my noemen sal voort ende voort.

† Hebr. 11.c.16.

16

Daerom so gaet henen, ende vergadert de Outste in Israel, ende segt tot hen: De HEEre uwer vaderen Godt is my verschenen, de Godt Abrahams, de Godt Isaacs, de Godt Iacobs, ende heeft gheseyt: Ick heb v besocht, ende ghesien wat v in Egipten geschiet is,

17

⁺ Ende heb geseyt: Ick wil v wt der ellenden Egipti leyden, int lant der Cananiten, Hethiten, Amoriten, Pheresiten, Heuiten, ende Iebusiten, in dat Lant, daer melck ende honich in vloeyt.

+ D vers 17

18

Ende als sy v stemme hooren, so sult ghy, ende de Outsten in Israel ingaen tot den Coninc in Egipten, ende tot hem seggen: De HEEre der Hebreeuscher God heeft ons gheroepen, so laet ons nv gaen drie dachreysen inde woestijne, dat wy offeren den HEEre onse God.

19

^* Maer ick weet dat v de Coninc in Egipten niet en sal laten trecken, dan door een stercke hant.

* Exod. 10.c.10.

20

Want ick sal mijn hant^† wtstrecken, ende Egipten slaen met alderley wondere, dat ick daer in doen sal, daer na sal hy v laten trecken.

† Exod. 11.a.1. 12.d.29.

21

^* Ende ic wil desen volcke genade geuen voor den Egiptenaren, dat wanneer ghy wt trect niet ledich wt en trect.

* Exod. 11.a.2. 12.e.36.

22

Maer een yegelijck wijf sal van haerder ghebuerinnen ende huysghesin eysschen silueren ende gulden vaten, ende cleederen, die suldy op uwe sonen ende dochteren legghen, ende den Egiptenaren ontkeeren.