Den Bibel, Inhoudende dat Oude ende Nieuwe Testament (Biestkensbijbel)

[p. 21r]

¶ Exodus, Dat tweede Boeck Mose.

¶ Dat eerste Capittel.

¶ Der kinderen van Israel werden vele, ende vermeerderen crachtelijc. De Coninc heet haer dooden ende verdrincken.

1

⁺ DIt zijn de^* namen der kinderen Israels, die met Iacob in Egipten quamen. Een yegelijck quam daer in met zijnen huyse.

+ A vers 1

* Gen. 46.b.8.

2

Ruben, Simeon, Leui, Iuda,

3

Isaschar, Sebulon, BenIamin,

4

Dan, Naphtali, Gad, Aser,

5

Ende alle sielen die wt Iacobs Lendenen gecomen waren, waren tseuentich. Maer Ioseph was te voren in Egipten.

6

Doen nv Ioseph ghestoruen was, ende alle zijn broederen, ende alle die tot dier tijt toe gheleeft hadden,

7

Wiessen^* de kinderen Israels, ende baerden kinderen, ende vermeerderden hen, ende haerder werden seer vele, dat haerder dat lant vol wert.

* Psal. 105.c.24 Acto. 7.c.17.

8

⁺ Doen quam een nieu Coninc op ouer Egipten, die en wiste niet van Ioseph,

+ B vers 8

9

Ende sprac tot zijn volc: Siet, des volcx der kinderen Israels is veel, ende meer dan wy.

10

Welaen, wy willense met liste dempen, dat haerder niet so veel en werden. Want waert datter eenen Crijch op stont, so mochten sy hen oock tot onsen vianden geuen ende tegen ons strijden, ende ten Lande wt trecken.

11

Ende hy settede Prouoosten ouer hen^* diese met swaren dienste drucken souden, want men boude Pharao die Steden Pithon ende Raemses, tot schathuysen.

* Deut. 26.b.6.

12

Maer hoe sy dat volc meer onder dructen, hoet hem meer vermeerde ende wt breydde. Ende sy hielden de kinderen Israels, als eenen grouwel.

13

⁺ Ende de Egiptenaren dwonghen de kinderen Israels te dienen met onbermherticheyt,

+ C vers 13

14

Ende maecten hen haer leuen suer met swaren arbeyt, aen Leem ende Tegelsteenen, ende met alderley Hofdienst opten velde, ende met alderley arbeyt die sy hen opleyden met onbermherticheyt.

15

Ende de Coninck te Egipten sprac totten Vroeyvrouwen der Hebreeuscher wijuen: Die eene hiet Siphra, ende de ander Pua.

16

Wanneer ghy den Hebreeuschen wijuen helpt, ende op den stoel siet dattet eenen soon is^* so doodet hem, mer ist een dochter so laetse leuen.

* Sapi. 18.b.5. Acto. 7.c.19.

17

Mer de vroeyvrouwen vreesden Godt, ende en deden niet so hen de Coninc in Egipten geseyt had, maer lieten de kinderen leuen.

18

⁺ Doen riep de Coninck in Egipten de Vroeyvrouwen, ende sprac tot haer: Waerom doedy dat, dat ghy de kinderen laet leuen?

+ D vers 18

19

De Vroeyvrouwen antwoor-den Pharao: De Hebreeusche wijuen en zijn niet gelijck de Egiptische want sy zijn herde wijuen, eer de Vroeyvrouwe tot haer coemt, hebben sy ghebaert.

20

Daer om dede Godt den Vroeyvrouwen goet. Ende dat volc vermeerderde hem, ende wert seer veel.

21

Ende om dat de Vroeyvrouwen Godt vreesden^* boude hi hen huysen.

* Psal. 127.a.1.

22

Doe geboot Pharao alle zijn volck, ende sprack: Alle sonen die geboren worden die werpt int water, ende alle dochteren laet leuen.