Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlix. Capittel.

¶ Iacob roept zijn sonen, ende seyt eenen yeghelijcken te voren wat hem ghebueren soude, ende hy sterft.

1

⁺ ENde Iacob riep zijn sonen, ende sprac: Vergadert v, op dat ick v vercondighe wat v ghebueren sal in toecomenden tijden.

+ A vers 1

2

Coemt te hoop, ende hoort toe ghy kinderen Iacobs, ende hoort uwen vader Israel.

3

^* Ruben mijn eerste soon,^† ghy zijt mijn cracht, ende mijn eerste macht, de ouerste in offere, ende de ouerste int rijcke.

* Gene. 29.f.32.

† Deu. 21.c.17

4

Hy voer lichtuaer-dich henen ghelijc water. Ghy en sult de ouerste niet zijn, want ghy hebt op ws vaders legher geclommen, aldaer hebdy mijne bedde ontsuyuert met dien opclimmen.

5

De ghebroeders Simeon ende Leui,^* haer sweerden zijn moordelijcke wapenen,

* Gen. 34.d.25.

6

Mijn siele en come niet in haren Raet, ende mijn eere en sy niet in haerder kercke: Want in haren toorne hebben sy den man verworcht, ende in haren moetwille hebben sy den^* osch verdoruen.

* Muer.

7

Veruloect sy haren toorne, dat hy soo strenge is, ende hare grimmicheyt, dat si so hertneckich is.^† Ick wilse verdeylen in Iacob, ende verstroyen in Israel.

† Iosue. 19.a.2.

8

⁺ Iuda, ghy sijtet, v broederen sullen v louen, v handt sal uwen vianden opten hals zijn. Voor v sullen hen buygen ws vaders kinderen.

+ B vers 8

9

Iuda is eenen ionghen^† Leew. Ghy zijt hooch ghecomen, mijn soon, door groote verwinninghe.^* Hy heeft neder gheknielt ende hem gelegert als eenen Leew, ende gelijck een Leeuwinne. Wie wil hem tegen hem verheffen?

† Miche. 5.b.7.

* Nu. 23.d.24. 24.b.9.

10

^† Den Scepter en sal van Iuda niet genomen worden, noch een meester van zijnen voeten, tot dat de HELT come, ende den seluen sullen den volcken aenhanghen.

† Luc. 3.a.1.

11

Hy sal zijn Vuelen aenden wijnstock binden, ende zijnder Ezelinnen soon aenden edelen ranck. Hy sal zijn cleet in wijn wasschen, ende zijnen mantel in wijnbesien bloet.

12

Sijn oogen zijn rootachtiger dan wijn, ende zijn tanden witter dan melck.

13

^+* Sebulon sal aen de Hauen der See woonen, ende aen de aenvaert der Schepen, ende reycken tot Sidon.

+ C vers 13

* Iosue. 19.a.10

14

Isaschar sal eenen beenen Ezel zijn, ende liggen tusschen de palen.

15

Ende hy sach de ruste dat sy goet is, ende dat lant dattet lustich is. Maer hy heeft zijne schouderen geneycht om te dragen, ende is dienstachtich gheworden onder tribuyt.

16

^* DAN, sal rechter zijn in zijnen volcke, als een ander gheslachte in Israel.

* Iud. 13. 14. 15. 16. 17.

17

Dan, sal een slanghe worden opten wege, ende een ader op den pade, ende dat peert inde verssenen bijten, dat zijn Ruyter te rugghe valle.

18

HEEre ick wacht op uwe Salicheyt.

19

Gad, gerust, sal dat heyr vueren, ende wederom vueren.

20

Van Asser coemt zijn vetbroot, ende hy sal den Coninghen te wille doen.

21

^* Naphthali is een snel Hert, ende geeft schoone redenen.

* Iudi. 4. 5.

22

⁺ Ioseph sal wassen, hy sal wassen als aen een Fonteynader. De dochteren treden henen inden Regimente.

+ D vers 22

23

Ende hoe wel hem de Schutters vertoornen, ende teghen hem oorloghen, ende hem veruolghen,

24

So blijft doch zijnen boge vast, ende de armen zijnder handen sterck, door de handen des Machtigen in Iacob. Wt hem zijn ghecomen herders, ende steenen in Israel.

25

Van ws vaders God is v geholpen, ende vanden Almachtigen sydy gebenedijt, met gebenedijngen bouen vanden hemel af, met gebenedijnge vander diepte, die hier onder leyt, met gebenedijnge aen borsten ende buycke.

26

De gebenedijngen ws

[p. 20v]

vaders gaen stercker, dan de gebenedijnghe mijnre voorouderen. (Na wensch der hooghen inder werelt.) Ende sullen comen op dat hooft Iosephs, ende op den schele des Nasirs onder zijne broeders.

27

^* BenIamin is een verschuerende Wolf. Des morghens sal hy roof eten, maer des auonts sal hy den roof wtdeylen.

* Phil. 3.a.5.

28

Dat zijn de twelf stammen Israels alle, ende dat ist dat haer vader met hen gesproken heeft, als hyse ghebenedijde, een yeghelijck met eender sonderlinger ghebenedijnghe.

29

⁺ Ende hy geboot hen, ende sprack tot hen: Ick worde vergadert tot mijnen volcke.^* Begraeft my by mijnen vaderen, in de speloncke opten acker Ephron des Hethiters,

+ E vers 29

* Gene. 23.d.19

30

In de dubbele speloncke die teghen Mamre leyt, int lant Canaan, die Abraham cochte metten Acker van Ephron den Hethiter, tot een erf begrauenisse.

31

Aldaer hebben sy Abraham begrauen, ende Sara zijn wijf. Aldaer hebben sy oock^† Isaac begrauen ende Rebeca zijn wijf. Aldaer hebbe ick oock Lea begrauen

† Gene. 35.e.29.

32

Inden Acker, ende inder speloncken die vanden kinderen Heth gecocht is.

33

Ende als Iacob voleynt hadde de geboden aen zijne kinderen, dede hy zijn voeten te samen opt bedde, ende verscheyde^* ende wert vergadert tot zijnen volcke.

* Actor. 7.b.15.

34

Doen viel Ioseph op zijns Vaders aensicht, ende weende ouer hem, ende custe hem.