Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlvj. Capittel.

¶ Iacob trect af in Egipten met alle zijnen volcke. Ende Ioseph coemt hem tegen ende ontfanghet hem.

1

⁺ ISrael tooch henen^* met al dat hi hadde, ende als hy te Bersaba quam, offerde hy offer den Gode zijns vaders Isaac.

+ A vers 1

* Iosu. 24.a.4. Acto. 7.b.15.

2

Ende Godt sprack tot hem des nachts in een gesichte: Iacob, Iacob. Hy sprack: Hier ben ic.

3

Ende hy sprack: Ick ben Godt, de God ws Vaders, en vreest v niet in Egipten henen af te trecken, want aldaer wil ic v tot eenen grooten volcke maken:

4

Ick wil met v henen af in Egipten trecken,^* ende wil v ooc weder hier op leyden. Ende Ioseph sal zijn handen op uwe ooghen legghen.

* Gene. 15.c.16.

5

Doen maecte hem Iacob op van Berseba, ende de kinderen Israels voerden Iacob haren Vader, met haren kinderen ende wijuen, op de wagenen, die Pharao ghesonden had, om hem te voeren.

6

Ende namen haer Vee ende haue, die sy in dat lant Canaan verworuen hadden,^* ende quamen also in Egipten:

* Esaie. 52.a.4.

7

Iacob ende alle zijn saet met hem, zijn kinderen, ende zijnder kinder kinderen met hem, zijn dochteren, ende zijnder kinder dochteren, ende alle zijn saet, die bracht hy met hem in Egipten.

8

^+* Dit zijn de namen der kinderen Israels, die in Egipten quamen: Iacob ende zijne sonen. De eerstegeboren Iacobs soon, Ruben.

+ B vers 8

* Exod. 1.a.1. 6.b.14.

9

^† Rubens kinderen: Hanoch, Pallu, Hetzron ende Charmi.

† Nu. 26.a.5. 1.Par. 6.a.3.

10

Simeons kinderen: Iemuel, Iamin, Ohad^* Iachin, Soar ende Saul de sone vanden Cananeeschen wijue.

* Exo. 6.b.15.

11

Leui kinderen: Gerson, Cahath, ende Merari.

12

Iuda kinderen: Ger, Onam, Sela, Perez, ende Serah. Maer Ger ende Onam waren ghestoruen int lant Canaan. Ende Perez kinderen: Hetzron ende Hamul.

13

^† Isaschar kinderen: Thola, Phua, Iob ende Semrom.

† 1.Para. 8.a.1.

14

Sebulons kinderen: Sered, Elon, Iahleel:

15

Dat zijn Leas kinderen, die sy Iacob baerde in Mesopotamia, met zijnder dochter Dina. Die maken alle te samen met sonen ende dochteren, dryendertich sielen.

16

⁺ Gad kinderen: Siphion, Haggi, Suni, Ezbon, Eri, Arodi ende Areli.

+ C vers 16

17

Asser kinderen: Iemna, Iesua, Iesui, Bria ende Serah haer suster. Ende Bria kinderen: Heber ende Malchiel:

18

Dat zijn Silpa kinderen^* die Laban gaf Lea zijnder dochteren, ende baerde Iacob dese sesthien sielen.

* Gen. 29.d.24.

19

Rahels kinderen Iacobs wijuen: Ioseph ende BenIamin.

20

Ende^* Ioseph werden gheboren in Egipten lant, Manasse ende Ephraim, die hem baerde Asnath, de dochter Potiphera, des Prie-sters tot On.

* Gen. 41.g.50.

21

BenIamins kinderen: Bela, Becher, Asbel, Gera, Naama, Ehi, Ros, Mupim, Hupim ende Ared.

22

⁺ Dat zijn Rahels kinderen, die Iacob gheboren zijn, alle te samen veerthien sielen.

+ D vers 22

23

Dans kinderen: Husim.

24

De kinderen Naphthali: Iahzeel, Guni, Iezer ende Sillem.

25

Dat zijn Bilhas kinderen, die Laban zijnder dochteren Rahel gaf, ende baerde Iacob dese seuen sielen.

26

^† Alle sielen die met Iacob in Egipten quamen, die van zijnen lendenen ghecomen waren (wtghenomen die wijuen zijnder kinderen) zijn alle te samen sesentsestich sielen.

† Deut. 10.d.22.

27

Ende Iosephs kinderen die in Egipten gheboren zijn, waren twee sielen. Alsoo dat alle sielen des huys Iacobs, die in Egipten quamen, waren tseuentich.

28

Ende hy sant Iuda voor hem henen tot Ioseph, dat hy hem aenwese tot Gosen, ende quamen in dat lant Gosen.

29

Doen spande Ioseph zijnen wagen aen, ende trock henen op, zijnen Vader Israel te gemoet, nae Gosen. Ende doen hy hem sach, viel hy om zijnen hals, ende weende langhe aen zijnen hals.

30

⁺ Doen sprac Israel tot Ioseph:^† Ic wil nv geerne steruen, nae dien ick v aengesicht gesien hebbe, dat ghy noch leeft.

+ E vers 30

† Luc. 2.d.29.

31

Ioseph sprack tot zijne broeders, ende zijns vaders huyse: Ic wil op trecken, ende Pharao bootschappen, ende hem segghen: Mijn broederen, ende mijns vaders huys is tot my gecomen wt den lande Canaan,

32

Ende tzijn Vee herders, want tzijn lieden die met vee omgaen: Haer cleyn ende groot vee, ende al wat sy hebben, hebben si mede ghebracht.

33

Wanneer v nv Pharao sal roepen ende seggen, wat is uwe neringe?

34

So suldy seggen: V knechten zijn lieden, die met vee omgaen, van onser ioncheyt aen, tot nv toe, beyde wy ende onse Vader, op dat ghy woonen muecht int lant Gosen, want wat veeherders zijn, dat is den Egiptenaren eenen grouwel.