Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlv. Capittel.

¶ Ioseph gheeft hem zijnen broederen te kennen, hy seynt tot zijnen Vader, wert seer verblijt, als hy hoort dat zijn soon leefde.

1

⁺ DOen en conde hem Ioseph niet langer onthouden, voor alle die om hem stonden ende hy riep: Laet alleman van my henen wt gaen. Ende gheen mensche en stont by hem, doen hem Ioseph van zijne broederen liet kennen.

+ A vers 1

2

Ende hy^† weende luyde, dat het de Egyptenaren ende Pharaos gesin hoorden, ende sprac tot zijne broederen:

† Gen. 43.e.30

3

Ick ben^‡ Ioseph, leeft mijn Vader noch? Ende zijn broederen en conden hem niet gheantwoorden, soo verschricten sy voor zijn aensicht.

‡ Act. 7.b.13.

4

Maer hy sprack tot zijne broederen: Tredet hier tot my. Ende sy traden henen toe. Ende hy sprack: Ick ben Ioseph uwe broeder^* dien ghy in Egypten vercocht hebt,

* Gen. 37.e.28.

5

Ende nv en becommert v niet, ende en denct niet dat ick daerom toornich sy, dat ghy my herwaerts vercocht hebt: Want om ws leuens wille heeft my God hier gesonden. Want dit zijn twee iaren, dat het dier int lant is.

6

Ende tzijn noch vijf iaren^* datter gheen ploeghen, noch oogsten zijn en sal.

* Gen. 8.d.22.

7

⁺ Maer Godt heeft my voor v hier gesonden, Dat hy v ouer blijuen late op Aerden, Ende uwe leuen behouden door een groote verlossinghe.

+ B vers 7

8

Ende nv ghy en hebt my niet herwaerts gesonden: Maer Godt die heuet my Pharao, tot eenen Vader ghestelt, Ende tot eenen Heere ouer alle zijn huys, ende eenen Vorst in alle Egypten landt.

9

Haestet v nv, ende trect henen op tot mijnen Vader, ende segt hem: Dat laet v Ioseph v soon seggen: Godt heeft my tot eenen Heere in geheel Egypten ghesedt coemt af tot my, en toeft niet langhe,

10

Ghy sult in dat landt Gosen woonen, ende nae by my zijn, ghy ende v kinderen, ende uwer kinder kinderen, uwe cleyn ende groot Vee, ende alle wat ghy hebt.

11

Ic wil v aldaer besorgen, want het zijn noch vijf iaren der dieren tijt, op dat ghy niet en verderft met v huys ende al dat ghy hebt.

12

Siet, uwe oogen sien, ende de oogen mijns broeders BenIamin, dat ick mondelijck met v spreke,

13

Vercondicht mijnen Vader alle mijn heerlicheyt in Egypten, ende alle wat ghy gesien hebt. Haest v, ende coemt neder met mijnen Vader herwaerts.

14

⁺ Ende hy viel zijnen broeder BenIamin om den hals, ende weende. Ende BenIamin weende oock aen zijnen halse,

+ C vers 14

15

Ende custe alle zijn broeders, ende weende ouer hen. Daer nae spraken zijne broederen met hem.

16

Ende als dat geruchte quam in Pharaos huys, dat Iosephs broederen gecomen waren, behaechdet Pharao wel, ende allen zijnen knechten.

17

Ende Pharao sprack tot Ioseph: Segt uwen broederen: Doet hem also ladet uwe Dieren, reyst henen, ende als ghy coemt int lant Canaan,

18

So neemt uwen Vader, ende v ghesin, ende coemt tot my, ick wil v goeden geuen, in Egypten lant, dat ghy eten sult dat merch int lant.

19

Ende gebodet hen: Doet hem also, neemt tot v wt Egypten lant wagenen tot uwen kinderen, ende wijuen, ende voeret uwen Vader, ende coemt,

20

Ende en siet uwen huysraet niet aen, want de goeden des gheheelen landts Egypten, sullen uwe zijn.

21

⁺ De kinderen Israels deden also: Ende Ioseph gaf hen waghenen na Pharaos beuel, ende teeringhe op den wege,

+ D vers 21

22

Ende gaf hen allen eenen yegelijcken een viercleet: Maer BenIamin gaf hy drie hondert siluerlingen, ende vijf viercleederen.

23

Maer zijnen Vader sandt hy daer by thien Ezelen met goede wt Egypten gheladen, ende thien Ezelinnen met Coren ende broodt, ende spijse zijnen Vader opten wech.

24

Also verliet hy zijne broederen, ende sy toghen henen, ende sprack tot hen: En kijft niet opten wech.

25

⁺ Also togen sy henen op van Egypten, ende quamen int lant Canaan tot haren Vader Iacob,

+ E vers 25

26

Ende vercondichden hem ende seyden: Ioseph leeft noch, ende is een Heere in geheel Egypten lant. Maer

[p. 19r]

zijn hert dachte gheheelijck veel anders, want hy en gheloofde hen niet.

27

Doen seyden si hem alle Iosephs woorden, die hy tot hen gheseyt hadde. Ende als hy sach de waghenen die hem Ioseph ghesonden hadde, om hem te voeren, wert de geest Iacobs haers Vaders leuendich,

28

Ende sprac: Ick heb genoech dat mijnen soon Ioseph noch leeft, Ick wil henen, ende hem sien, eer ick sterue.