Den Bibel, Inhoudende dat Oude ende Nieuwe Testament (Biestkensbijbel)

Dat .xlj. Capittel.

¶ Ioseph bediet den Coninck Pharao zijnen droom. Ende hy wort een Heere ouer Egypten gheset. Den dieren tijt ende hongher beghinnen.

1

⁺ ENde na twee iaren hadde Pharao eenen droom: Hoe dat hy stont aen twater,

+ A vers 1

2

Ende sach wt den water climmen seuen schoone vette koeyen, ende gingen weydende int gras.

3

Na desen, sach hy ander seuen koeyen wt den water opclimmen, die waren ongestelt, ende mager ende traden by de koeyen aenden oeuer aent water.

4

Ende de onghestelde ende magher koeyen, verslonden die seuen schoone ende vette koeyen.

5

Doen wert Pharao wacker.

Ende hy sliep weder in, ende hem droomde noch eens.

6

Ende sach, dat seuen Aren wiessen wt eenen halm, vol ende dick. Daernae sach hy seuen dunne ende versengde Aren op gaen.

7

Ende de seuen magher Aren verslonden de seuen dicke ende volle Aren. Doen ontwaeckte Pharao, ende mercte dattet eenen droom was.

8

Ende als morghen wert, was zijnen gheest becommert, ende sant wt ende liet roepen alle waersegghers in Egypten, ende alle wijse, ende vertelde hen zijnen droom. Maer daer en was niemant: diese Pharao bedieden conde.

9

⁺ Doen sprack de ouerste schencker met Pharao ende seyde: Ick ben heden ghedachtich mijnder sonden:

+ B vers 9

10

Als Pharao toornich wert ouer zijnen knecht, ende my metten ouersten backer inder gheuanckenis leyde, in des Hofmeesters huys.

11

Doen droomde ons beyde in eender nacht, een yeghelijck zijnen droom, diens bediedinge hem aenginck.

12

Daer was by ons een Hebreeusch iongelinck, des hofmeesters knecht, dien verteldent wy. Ende hy bediede ons onse droomen een yeghelijck na zijnen droom.

13

Ende so hijt ons bediede, so ist ghegaen, want ick ben weder aen mijn officie gheset, ende de ander is ghehanghen.

14

^* Doen sant Pharao henen, ende liet Ioseph roepen: Ende lieten hem haestelijck wter geuanckenis. Ende hy liet hem scheren ende tooch ander cleederen aen, ende quam in tot Pharao.

* Psal. 105.c.20

15

Doen sprac Pharao tot hem: My heeft eenen droom ghedroomt, ende daer en is niemant, dien bedieden can: Maer ick heb van v hooren seggen, als ghy eenen droom hoort so condy hem bedieden.

16

Ioseph antwoorde Pharao ende sprack: Dat en staet by my niet, Godt sal doch door Pharao wat goets propheteren.

17

⁺ Doen vertelde Pharao Ioseph: My droomde ick stonde aen-den oeuer by den water:

+ C vers 17

18

Ende sach wt den water climmen seuen schoone vette koeyen, ende die ghinghen weydende int gras.

19

Ende na dese sach ick seuen ander dorre, seer ongestelde magher koeyen wt climmen. Ick en hebbe in al den lande van Egypten, niet alsulcken ongestelden gesien.

20

Ende de seuen magher onghestelde koeyen, Verslonden de seuen yerste vette koeyen.

21

Ende als sise opgheslockt hadden, en merctemens aen hen niet, dat si die ghegeten hadden, ende waren ongestelt gelijck te vooren. Doen werde ick wacker.

22

Ende noch eens sach ick in mijnen droome, seuen Aren op eenen halm wassen, vol ende dick.

23

Daer nae ghinghen op seuen dorre Aren, dunne ende versengt.

24

Ende de seuen dunne Aren verslonden de seuen dicke Aren. Ende ick hebt den waerseggeren gheseyt, maer si en connent my niet bedieden.

25

⁺ Ioseph antwoorde Pharao: beyde de droomen Pharao zijn eenderley. Want God vercondicht Pharaoni wat hy voor heeft.

+ D vers 25

26

De seuen schoone koeyen zijn seuen Iaer, ende de seuen goede Aren oock seuen Iaer. Het is eenderley droom.

27

Die seuen magher ende onghestelde koeyen, die nae dese opghecomen zijn, dat zijn seuen Iaer. Ende de seuen magher, ende versengde Aren, zijn seuen Iaren diers tijts:

28

Dat ist nv dat ick gheseyt heb tot Pharao, dat Godt Pharao cont doet, wat hy voor heeft.

29

Siet, seuen rijcke Iaren sullen comen int geheele Egypten lant,

30

Ende na dese selue sullen seuen Iaren diers tijts comen, datmen vergeten sal alle sulcke oueruloedicheyt in Egipten lant.

31

Ende den dieren tijt sal dat lant verteren, datmen niet weten en sal vander oueruloedicheyt int lant, om den dieren tijt, die daer nae coemt want hy sal seer swaer zijn.

32

Maer dat Pharao ten anderen mael gedroomt heeft bediet, dat sulcx Godt gewisselijck ende gheringhe doen sal.

33

⁺ Nv sie Pharao na eenen verstandigen ende wijsen man, dien hy ouer Egypten lant sette,

+ E vers 33

34

Ende beschicke, dat hy officiers verordinere, inden lande, ende neme den vijfsten deel in Egypten lant, in de seuen rijcke Iaren,

35

Ende vergadere alle spijse der goeder Iaren die daer comen sullen, dat si Coren opleggen in Pharaos Corenhuysen, tot voorraet inden steden, ende verwarent,

36

Op datmen spijse geordineert vinde den landen in die seuen diere Iaren, die ouer Egypten lant comen sullen, op dat dat lant niet van honger en verderue.

37

Dese redene beuiel Pharao ende allen zijnen knechten wel,

38

Ende Pharao sprac tot zijnen knechten: Hoe mochten wy eenen alsulcken man vinden, in welcken de gheest Gods si?

39

Ende sprack tot Ioseph: De wijle v Godt sulcx al heeft cont ghedaen, so en is niemant so verstandich ende wijs als ghy.

40

⁺ Ghi^‡ sult ouer mijn huys zijn, ende uwen woorde sal al mijn volck gehoorsaem zijn, alleen des Coninclijcken

+ F vers 40

‡ Dan. 2.g.48 Psal. 105.c.20 Act. 7.b.10

[p. 17r]

stoels, wil ick hoogher zijn dan ghy.

41

Ende voort sprack Pharao tot Ioseph: Siet, ick heb v ouer dat geheel Egypten lant gheset,

42

Ende tooch zijnen rinck van zijnder hant, ende gaffen Ioseph aen zijn hant, ende cleede hem met witter zijden, ende hinck hem een gulden Keten aen zijnen hals,

43

Ende liet hem op zijnen anderen waghen varen, ende liet voor hem wtroepen: Dese is des lants Vader. Ende sette hem ouer dat geheel Egypten lant.

44

Ende Pharao sprack tot Ioseph: Ick ben Pharao, sonder uwen wille en sal niemant zijn hant oft zijnen voet roeren in dat geheel Egypten lant.

45

Ende noemde hem den heymelijcken Raedt, ende gaf hem een wijf Asnath de dochter Potiphera des Priesters tot On.

46

Alsoo trock Ioseph wt om dat landt Egypten te besien. Ende hy was dertich iaer out,

47

Als hy voor Pharao stont den Coninck in Egypten, ende voer wt van Pharao, ende trock door alle tlandt van Egypten. Ende dat landt dede also die seuen rijcke iaren,

48

Ende vergaderden alle de spijse der seuen iaren, die in Egypten landt waren, ende dedense in die steden. Wat daer voor spijse opten velde om elcke stadt wiesch, dat deden sy daer in.

49

Also goot Ioseph dat Coren op, bouen der maten veel, ghelijck tzant aende See, also dat hy op hielt te tellen, want men en conde niet meer tellen.

50

⁺ Ende^† Ioseph werden twee sonen geboren, eer den dieren tijt quam, die baerde hem Asnath Potiphera des Priesters tot On dochter,

+ G vers 50

† Gen. 46.e.20

51

Ende hiet den yersten Manasse, want Godt (seyde hy) heeft my laten vergheten alle mijn ongheluck, ende al mijns Vaders huys.

52

Den anderen hiet hy Ephraim, Want God (seyde hy) heeft my laten wassen inden landen mijnder ellenden.

53

Als nv die seuen rijcke iaren om waren, inden lande Egypten:

54

Doen begonsten die seuen^* diere iaren te comen, daer Ioseph af gheseit had,

* Act. 7.b.11.

55

Ende daer wert eenen dieren tijt in allen landen, maer in dat geheel Egypten landt was broot.

56

Als nv dat geheel Egypten lant oock hongher leet, riep dat volck tot Pharao om broot. Maer Pharao sprack tot al de Egyptenaren: Gaet henen tot Ioseph, wat hy v seyt, dat doet.

57

Als nv ouer alle dat landt dieren tijt was, doen dede Ioseph ouer al Corenhuysen op, ende vercocht den Egyptenaren:

58

Want den dieren tijt wert hoe langher hoe grooter inden lande, ende alle de landen quamen na Egypten om te coopen by Ioseph, want den dieren tijt was groot in allen landen.