Den Bibel, Inhoudende dat Oude ende Nieuwe Testament (Biestkensbijbel)

¶ Dat .xl. Capittel.

¶ Ioseph bediet den twee gheuangen haren droom, ende voorseyt haer wat haer ghebueren sal.

1

⁺ ENde het gebuerde daer nae, dat de schencker des Conincx van Egypten, ende de backer misdeden tegen haren Heere, den Coninck van Egypten.

+ A vers 1

2

Ende Pharao wert toornich ouer beyde zijn camerlingen, ouer den schenckmeester, en ouer den backmeester,

3

Ende lietse setten in des Hofmeesters huys, inder geuanckenissen daer Ioseph geuangen lach.

4

Ende de Hofmeester stelde Ioseph ouer hen, dat hy hen diende, ende si saten sommige dagen inder gheuanckenisse.

5

Ende hen droomde beyden, den schencker ende den backer des Conincx in Egypten, in eender nacht, eenen yegelijcken eenen eigen droom: Ende een yegelijcx droom had zijn bediedinge.

6

Als nv des morgens Ioseph tot hen binnen quam, ende sach dat si truerich waren,

7

Vraechde hy hen, ende sprac: Waerom zijt ghy heden so bedroeft?

8

Sy antwoorden: Ons heeft gedroomt, ende en hebben niemant, diet ons wtlegghe. Ioseph sprack: Wtlegghen hoort Gode toe, doch vertellet my.

9

⁺ Doen vertelde de ouerste Schencker sinen droom, Ioseph, ende seyde tot hem: My heeft ghedroomt datter eenen wijnstock voor my was,

+ B vers 9

10

Die hadde drie rancken, ende hy groeyde, wiesch ende bloeyde, ende zijn druyuen werden rijp.

11

Ende ick hadde den Beker Pharaos in mijn hant, ende nam de besien ende drucktese wt inden Beker, ende ghaf den Beker Pharao inde hant.

12

Ioseph sprack tot hem: Dat is zijn bediedenisse: Drie rancken, zijn drie dagen.

13

Nae drie daghen sal Pharao v hooft verheffen, ende v weder aen v officie stellen, dat ghy hem weder den Beker in de hant gheeft, nae de voorghaende wijse, doen ghy zijn schencker waert.

14

Maer gedenckt mijnder wanneert v wel gaet, ende doet barmherticheyt aen my, dat ghijt Pharao vermaent, dat hy my wt desen huyse brenghe.

15

Want ick ben heymelijck gestolen wt den Hebreeuschen lande, oock en heb ick hier niet misdaen, dat si my ingheset hebben.

6[16]

⁺ Doen de ouerste backer sach, dat de bediedinghe goet was, sprack hy tot Ioseph: My heeft oock gedroomt: Ic droech drie witte coruen op mijn hooft,

+ C vers 6

17

Ende inden ouersten corf alderley gebacken spijse den Pharaoni. Ende de vogelen aten wt den corue op mijn hooft,

18

Ioseph antwoorde, ende sprac: Dat is zijn bediedinge. Drie coruen, zijn drie daghen.

19

Ende nae drie daghen sal Pharao v hooft verheffen, ende v aen de galghe hangen, ende de vogelen sullen v vleesch van v eten.

20

Ende het geschiede des derden daechs^* doen hielt Pharao zijnder gheboorten dach, ende hy maecte een maeltijt alle zijnen

* Mat. 14.a.6

[p. 16v]

knechten, ende verhief dat hooft des ouersten schenckers, ende dat hooft des ouersten backers, onder zijnen knechten.

21

Ende stelde den ouersten schencker weder in zijn schenck officie, dat hy den Beker gaue in Pharaos hant:

22

Maer den ouersten backer liet hy hanghen, soo hem Ioseph bediet hadde.

23

Maer de ouerste schencker en gedacht niet aen Ioseph maer vergat zijnder.