Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxix. Capittel.

¶ Ioseph wert van sinen Heere in Egypten (dien hy vercocht was) bemint, hy wert van zijns Heeren huysvrouwe tot oncuysheyt verwect, ende als hy haer niet en wilde consenteren, so wert hy inden kercker gheset.

1

⁺ IOseph wert nederwaerts in Egypten geuoert^* ende Potiphar een man van Egypten Pharaos Camerlinck ende Hoofmeester, cocht hem vanden Ismaeliten, die hem af brochten.

+ A vers 1

* Gen. 37.f.36

2

Ende de HEERE was met Ioseph, dat hy een gelucksalich man wert, ende was in zijns Heeren des Egyptenaers huys.

3

Ende zijn Hee-

[p. 16r]

re sach dat de HEERE met hem was, want al wat hy dede, dat liet de HEERE geluckick voortgaen door hem,

4

Also dat hy genade vant voor sinen Heere, ende zijn dienaer wert. Die stelde hem ouer zijn huys, ende al wat hy had, dede hy onder sinen handen.

5

^* Ende van dier tijt aen, doen hy hem ouer zijn huys ende alle zijn goeden geset had, gebenedijde de HEERE des Egyptenaers huys om Iosephs wille. Ende ten was niet dan ghebenedijdinge des HEEREN, in allen wat hy had in huys, ende opten velde,

* Gen. 30.d.27 Esa. 45.a.4

6

Daerom liet hijt al onder Iosephs handen, wat hy hadde. Ende hy en nam hem gheens dincx aen, de wijle hy hem hadde, dan dat hy adt ende dranck.^† Ende Ioseph was schoon ende huepsch van aensicht.

† 1.Reg. 16.b.12 d.18

7

⁺ Ende het gebuerde nae dese geschiedenisse, dat zijns Heeren wijf haer oogen op Ioseph werp, ende sprac: Slaept by my:

+ B vers 7

8

Maer hy weygerdet haer, ende sprac tot haer: Siet, mijn Heer en neemt hem geens dincx aen voor my, wat int huys is, ende al wat hy heeft, dat heeft hy onder mijn handen gedaen.

9

Ende en heeft niet so groot inden huyse, dat hy voor my verholen heeft, sonder v, mits dat ghy zijn wijf zijt. Hoe soude ic dan nv so grooten quaet doen, ende tegen Godt sondigen?

10

Ende si had sulcke woorden teghen Ioseph dagelijcx. Maer hy en hoordese niet, dat hi by haer sliepe, noch by haer ware.

11

⁺ Het gebuerde op eenen dach, dat Ioseph in dat huys ginck om zijn dingen te doen, ende daer en was geen mensch vanden gesinne des huys daer by,

+ C vers 11

12

Ende si vatte hem by sinen cleede, ende sprack: Slaept by my. Maer hy liet dat cleet in haerder hant, ende vloot, ende liep ten huyse wt.

13

Doen si nv sach, dat hy zijn cleet in haer hant liet, ende wtulooch,

14

Riep si tgesinne in huys, ende sprack tot hen: Siet, hy heeft ons den Hebreeuschen man hier in gebrocht, dat hy ons te schanden make. Hy quam tot my hier in, ende woude by my slapen, maer ick riep met luyder stemmen.

15

⁺ Ende doen hy hoorde dat ic een geluyt maecte ende riep, doen liet hy zijn cleet by my ende vloot ende liep wt.

+ D vers 15

16

Ende si leyde zijn cleet by haer, tot dat zijn Heere thuys quam.

17

Ende seyde tot hem euen de selue woorden, ende sprac: De Hebreeusche knecht, die ghy ons hier in ghebracht hebt, quam tot my hier in, ende woude my tot schande maken,

18

Maer doen ick een geruchte maeckte ende riep, doen liet hy zijn cleet by my, ende vloot wt.

19

Als zijn Heere hoorde de reden zijns wijfs, die si hem seyde, ende sprack: Alsoo heeft my v Hebreeusche knecht ghedaen, wert hy seer toornich.

20

^+* Doen nam hem zijn Heere, ende leyde hem inde geuanckenisse, daer des Conincx gheuangenen in lagen, ende hy lach daer inde geuanckenis,

+ E vers 20

* Psal. 105.c.18

21

Maer de HEERE was met hem, ende neychde zijn barmherticheyt tot hem, ende liet hem genade vinden voor den meester der gheuanckenissen:

22

Dat hy hem beual alle de gheuanghenen inder gheuanckenissen onder zijn hant, op dat alle wat daer geschiede, door hem gheschieden moeste:

23

Want de meester der geuanckenis en nam hem gheens dincx aen. Want de HEERE was met Ioseph, Ende wat hy dede, daer ghaf de HEERE gheluck toe.