Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxviij. Capittel.

¶ Hier wort verhaelt hoe dat Iudas houde, ende zijns soons wijf beslaept. Ende hoe si van hem twee Soonen ontfanckt ende baert.

1

⁺ IN dien tijden gebuerdet, dat Iuda henen af tooch, van sinen broederen ende ghaf hem tot eenen man tot Odollam, die hiet Hira,

+ A vers 1

2

Ende Iuda sach aldaer eens Cananiters mans dochter, die hiet Sua, ende namse. Ende doen hyse besliep,

3

Wertse beurucht, ende baerde eenen soon dien hiet hy^† Ger.

† Num. 26.c.19

4

Ende anderwerf wert si beurucht, ende baerde eenen soon, dien hiet si Onan.

5

Noch baerde si eenen soon, dien hiet si Sela: Ende si was te Chesib doen si hem baerde.

6

Ende Iuda ghaf sinen yersten soon Ger, een wijf die Thamar hiet,

7

Maer hy was quaet voor den HEERE, daerom doode hem de HEERE.

8

Doen sprack Iuda tot sinen soon Onan: Legt v by ws broeders wijf, ende neemtse te houwelijck, dat ghy uwen broeder saet verweckt.

9

⁺ Mer doen Onan wiste^* dat dat saet zijn eygen niet en soude zijn, als hy by zijns broeders wijf laghe, liet hijt op de Aerde vallen, ende verdorft, op dat hy sinen broeder gheen Saet gheuen en soude.

+ B vers 9

* Deut. 25.a.5

10

Doe mishaechdet den HEERE dat hy dede, ende doode hem oock.

11

Doen sprac Iuda tot zijns soons wijf Thamar, blijft een Weduwe in ws Vaders huys, tot dat mijn soon Sela groot wort. Want hy dachte: Misschien mochte hy oock steruen ghelijck zijn broeders. Also ghinck Thamar henen, ende bleef in haers Vaders huys.

12

Doe nv veel dagen verloopen waren, sterf des Sua dochter, Iudas wijf. Ende als Iudas wtgetruert hadde^* ginck hy opwaerts om zijne schapen te scheren nae Thimnath, met sinen Herder Hira van Odollam.

* Gen. 31.c.19 2.Reg. 13.d.23

13

⁺ Doen wert Thamar geseyt: Siet, v sweer ghaet opwaerts nae Thimnath, om zijne schapen te scheren.

+ C vers 13

14

Doen leyde si de weduwen cleederen van haer, die si droech, bedeckte haer met eenen mantel, ende vermaeckte haer, ende ginck sitten voor de duere aen den wege nae Thimnath, want si sach dat Sela groot gheworden was, ende si en was hem niet ten wijue ghegheuen.

15

Doense nv Iuda sach, meynde hy het waer een Hoere, want si had haer aensicht bedeckt:

16

Ende hy ghinck tot haer aenden weghe, ende seyde: Laet my doch by v ligghen. Want hy en wist niet dattet zijns soons wijf was. Sy antwoorde: Wat wildy my gheuen, dat ghy by my ligt?

17

Hy sprack: Ick wil v eenen geyten bock vander Cudden seynden. Sy antwoorde: So gheeft my eenen pant tot dat ghijt my seynt. Hy sprack:

18

⁺ Wat pant wildy dat ick v gheue? Sy antwoorde: Vwen rinck, ende uwe snoer, ende uwen staf die ghy in v hant hebt.^* Doen gaf hy haer dat, ende ginck by haer liggen, ende si wert van hem beurucht,

+ D vers 18

* Leuit. 18.b.15

19

Ende si stont op, ende ginck wech, ende leyde den mantel af, ende track haer weduwen cleederen weder aen.

20

Maer Iuda fant den geyten bock door sinen Herder van Odollam, dat hy den pant weder haelde vanden wijue, ende hy en vantse niet.

21

Doen vraechde hy den lieden van dier plaetsen, ende seyde: Waer is de Hoere, die buyten aenden wege sadt? Sy antwoorden: Daer en heeft gheen Hoere geweest.

22

Ende hy quam weder tot Iuda, ende sprack: Ick en hebse niet vonden, oock segghen de lieden van dier, datter gheen Hoere en heeft geweest.

23

Iuda sprack: Sy hebbet haer: Sy en can ons doch emmers geen schande nae seggen, want ick heb den bock gesonden, ende ghy en hebtse niet vonden.

24

Nae drie maenden wert Iuda gebootschapt, ws soons wijf Thamar heeft gehoereert, daer toe, siet, si is van hoereren beurucht geworden. Iuda sprack: brengtse voort, dat si verbrant worde.

25

⁺ Ende alsmense voortbrachte, schickte si tot haren Sweer, ende sprac: Van dien man ben ick beurucht, dien dat behoort, ende sprack: Kendy oock wiens desen rinck, ende dit snoer, ende desen staf is?

+ E vers 25

26

Iuda bekendet, ende sprack: Sy is gerechter dan ick, want ick en heb haer niet gegeuen mijnen Soon Sela. Doch en besliep hyse niet meer.

27

Ende^† als si baren soude, werden tweelingen in haren lichaem beuonden.

† 1.Par. 2.a.4 Mat. 1.a.3

28

Ende als si nv baerde quam daer een hant wt. Doen nam de Vroeyurouwe, ende bandt eenen rooden draet daer om, ende sprack, die sal de yerste wtcomen.

29

Maer als die zijn hant weder in trock, quam zijn broeder wt, ende si sprack: Waerom hebt ghy om uwen wille sulcken schuere geschuert? Ende men hiet hem Perez.

30

Daer nae quam zijn broeder wt die den rooden draet om zijn hant hadde, ende men hiet hem Serah.