Den Bibel, Inhoudende dat Oude ende Nieuwe Testament (Biestkensbijbel)

Dat xxxvij. Capittel.

¶ Ioseph des vaders liefste soon wort van zijnen broederen ghehaet, ende in eenen verdroochden put gesteken. Ende wordt den Cooplieden in Egipten vercocht.

1

⁺ MAer Iacob woonde int landt, daer zijn Vader een vreemdelick in geweest was, te weten, int landt Canaan.

+ A vers 1

2

Ende dat zijn de gheslachten Iacobs: Ioseph was seuenthien iaer oudt, dat hy een Herder des Vees wert met zijnen broederen. Ende den ionghen was byden kinderen Bilha ende Silpha, zijns vaders wijuen, ende bracht voor haren vader, wanneer daer een quaet gherucht teghen hen was.

3

Maer Israel had Ioseph lieuer dan alle zijn kinderen, om dat hy hem in den ouderdom ghewonnen hadde, ende maecte hem eenen bonten rock.

4

Doe nv zijn broeders saghen dat haer Vader hem lieuer had, dan alle zijn broederen, waren sy hem viant, ende en conden hem gheen vriendelijck woort toe ghespreken.

5

^* Daer toe hadde Ioseph eens eenen droom, ende hier af seyde hy zijnen broederen. Doen werden sy hem noch meerder vianden.

* Gen. 42.b.9.

6

Want hy sprack tot hen: Lieue, hoort doch wat my ghedroomt heeft.

7

⁺ My docht wy bonden schoouen op den velde, ende mijnen schoof rechte hem op, ende stont: Ende uwe schoouen alom neychden haer tegen mijnen schoof.

+ B vers 7

8

Doen spraken zijne broederen tot hem: Soudy onse Coninck worden, ende ouer ons heerschappie hebben? Ende werden hem noch meerder vianden om zijns drooms ende zijnder redenen wille.

9

Ende hy had noch eenen anderen droom, dien vertelde hy zijnen broederen, ende sprack: Siet, ick heb noch eenen droom ghehadt, my docht, de Sonne ende de Mane, ende elf sterren neychden hen voor my.

10

Ende doen dat zijnen Vader ende zijnen broeder gheseyt werdt, strafte hem zijn Vader, ende seyde tot hem: Wat droom is dat die ghy ghedroomt hebt? Sal ick, ende v Moeder, ende v broederen comen, ende v aenbidden?

11

Ende zijn broeders benijdden hem, maer zijn Vader onthielt dese woorden.

12

⁺ Doe nv zijn broeders henen ginghen om haers Vaders Vee te weyden in Sichem, sprack Israel tot Ioseph.

+ C vers 12

13

Hoeden niet uwe broeders dat Vee in Sichem? Coemt, ick wil v tot hen seynden. ^† Maer hy sprack Hier ben ick.

† 1.Reg. 3.d.4.

14

Ende hy seyde: Gaet henen ende siet, oft wel staet met uwe broederen, ende met dat vee, ende segt my weder, hoe dattet hen gaet: Ende hy fandt hem wt totten dale Hebron, dat hy na Sichem ginghe.

15

Doen vant hem een man dolende int velt, die vraechde hem, ende seyde: Wien soeckt ghy?

16

Hy antwoorde: Ick soecke mijn broederen, segt my doch waer sy hoeden.

17

De man sprack: Sy zijn van daer ghetrocken. Want ick hoorde dat sy seyden: Laet ons na Dothan gaen. Doen volchde Ioseph zijnen broederen na, ende vantse tot Dothan.

18

⁺ Als si hem nv saghen van verre, eer hy na by hen quam, sloeghen si eenen raet aen, dat si hem dooden,

+ D vers 18

19

Ende seyden onder malcanderen,^† Siet, de droomer coemt daer,

† Mat. 21.d.38. Mar. 12.a 7. Luc. 20.b.14.

20

Coemt nv ende laet ons hem verworghen, ende in eenen cuyl worpen, ende segghen: Een quaet dier heeft hem geten, soo salmen sien wat zijne droomen zijn.

21

Doe dat Ruben hoorde, wilde hy hem wt haren handen verlossen, ende sprack:^† En laet ons hem niet dooden,

† Gen. 42.c.22.

22

Ende Ruben sprack voort tot hen: En laet ons gheen bloet storten, maer werpt hem inden cuyl, die inder Woestijnen is, ende en legt die handt niet aen hem. Maer hy wilde hem wt haren handen verlossen, dat hy hem weder brochte tot zijnen vader.

23

⁺ Als nv Ioseph tot zijnen broederen quam, trocken sy hem zijnen rock, metten bonten rock wt, die hy aen had,

+ E vers 23

24

Ende namen hem ende wierpen hem in eenen cuyl: Maer de selue cuyl was leech, ende daer en was gheen water in,

25

Ende ginghen sitten om te eten. Daer en tusschen hieuen sy haer ooghen op, ende saghen eenen hoop Ismaeliten comen van Gilead, met haer Kemelen, die droeghen cruyt, Balsem ende Myrre, ende toghen henen af in Egipten.

26

Doen sprack Iuda tot zijnen broederen: Wat helpet ons, dat wy onsen broeder verworghen, ende zijn bloet verberghen?

27

Coemt laet ons hem den Ismaeliten vercoopen, op dat hen onse handen niet aen hem en vergrijpen, want hy is ons broeder, ons vleesch, ende bloet: Ende sy hoorden hem.

28

Ende doe de Midianiten de cooplieden voorby reysden, trocken sy hem wt den cuyl,^* ende vercochten hem den Ismaeliten, voor twintich Siluerlinghen, die brochten hem in Egipten.

* Act. 7.b.9.

29

⁺ Als nv Ruben weder totten cuyle quam, ende en vant Ioseph daer niet in, verschuerde hy zijn cleederen,

+ F vers 29

30

Ende quam weder tot zijnen broederen, ende sprack: De iongen en is daer niet, waer sal ick nv henen?

31

Doe namen sy Iosephs rock, ende sloeghen eenen Geytenbock, ende staken den rock in dat bloet, ende schickten den bonten rock henen,

32

Ende lietenen haren vader brengen, ende segghen: Desen hebben wy gheuonden, siet, oft ws soons rock sy oft niet.

33

Maer hy bekende hem ende

[p. 15v]

sprack: Het is mijns soons rock.^* Een quaet dier heeft hem gheten: Een verslindende Dier heeft Ioseph verschuert.

* Ge. 44.d.28

34

Ende Iacob verschuerde zijn cleederen, ende leyde eenen sack om zijne Lendenen, ende droech rouwe om sinen Soone langen tijt.

35

Ende alle zijne soonen ende dochteren traden tot hem, om hem te troosten, maer hy en wilde hem niet laten troosten, ende sprack: Ick sal met rouwe nederwaerts varen in den kuyl, tot mijnen Sone, ende zijn vader beweende hem.

36

Maer die Midianiten^† vercochten hem in Egypten den Potiphar, Pharaos Camerlinck ende Hoofmeester.

† Psal. 105.c.17