Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxv. Capittel.

¶ Iacob beueelt den sinen, dat si die Beelden souden grauen, Rahel zijn wijf sterf inder geboorte Ben Iamin. Iacob wort Israel gheheeten. Ruben beslaept Bilham de boelschap zijns Vaders.

1

⁺ ENde Godt sprack tot Iacob: Maect v op, ende trect nae^* BethEl, ende woont aldaer, ende maeckt aldaer eenen Altaer den Godt die v openbaerde, doen ghy vloodt voor uwen broeder Esau.

+ A vers 1

* Gen. 28.b.19.

2

Doe sprack Iacob tot sinen huyse, ende tot allen die met hem waren:^† Doet van v de vreemde Goden, die onder v zijn, ende reynicht v, ende verandert uwe cleederen,

† Gen. 31.c.19

3

Ende laet ons op zijn, ende nae BethEl trecken, dat ick aldaer eenen Altaer make, den Gode die my verhoort heeft, ter tijt mijns drucx, ende is met my gheweest op den weghe, dien ick getogen ben.

4

⁺ Doen gauen si hem alle vreemde Goden, die onder haer handen waren, ende haer ooren spanselen, ende hy begroefse onder een Eycke, die by Sichem stonde,

+ B vers 4

5

Ende si toghen wt: Ende daer quam een vreese Godts ouer de steden die rontom hen lagen, dat si den Sonen Iacob niet nae en iaechden.

6

Also quam Iacob te Lus int landt Canaan^* die daer BethEl heet, met al den volck dat met hem was,

* Gen. 28.d.19.

7

Ende boude aldaer eenen Altaer, ende hiet die stede ElBethEl, daerom dat hem Godt aldaer geopenbaert was, doen hy voor sinen broeder vloot.

8

Doe sterf Debora Rebecas^* voester, ende wert begrauen onder BethEl, onder den Eycke, ende wert ghenaemt de Claech eycke.

* Gen. 24.d.59

9

^* Ende Godt openbaerde Iacob noch eens, nae dien dat hy wt Mesopotamien ghecomen was, ende ghebenedide hem, ende sprac tot hem:

* Osee. 12.a.5

10

Ghy heet Iacob^* maer ghy en sult niet meer Iacob heeten, maer Israel suldy heeten. Ende alsoo heetmen hem Israel.

* Gen. 32.e.26 3.Reg. 18.d.31

11

Ende Godt sprack tot hem: Ick ben de Almachtige Godt, weest vruchtbaer ende vermeerdert v, volcken ende volcker hoopen sullen van v comen, ende Coningen sullen wt uwen Lendenen comen,

12

⁺ Ende^† dat Landt dat ick Abraham ende Isaac ghegeuen heb, wil ick v geuen, ende wilt uwen Sade gheuen nae v.

+ C vers 12

† Gene. 12.b.7. 15.d.18. 26.a.3

13

Also voer Godt op van hem, van dier plaetsen, daer hy met hem gesproken had.

14

Maer Iacob rechte aldaer een steenen Teecken op, op die plaetse, daer hy met hem gesproken had, ende goot drancoffer daer op, en begoten met olie.

15

Ende Iacob hiet die stede, daer Godt met hem gesproken hadde, BethEl.

16

Ende si togen van BethEl, ende doent noch een velt weechs was van Ephrat, doen baerde Rahel: Ende het quam haer hert aen ouer der gheboorten.

17

⁺ Maer doent haer so suer wert inder geboorten, sprack de Vroeyvrouwe tot haer.^† En vreest v niet, want desen soon suldy oock hebben.

+ D vers 17

† 1.Reg. 4.d.20

18

Maer doen de siel wtghinck dat si steruen moeste, hiet si hem BenOni: Maer zijn Vader hiet hem BenIamin.

19

^‡ Aldus sterf Rahel, ende wert begrauen aenden wege tot Ephrat, die nv heet BethLeHem.

‡ Gen. 48.b.7

20

Ende Iacob rechte een Teeken op bouen haer Graf, dat

[p. 14v]

selfde is dat graf teecken Rahels, tot op desen dach.

21

Ende Israel trock wt, ende rechte een Hutte op, op ghene side vanden toren^† Eder.

† Mich. 4.d.8.

22

Ende tgebuerde als Israel in dien lande woonde^* ginck Ruben henen, ende besliep^‡ Bilha zijns Vaders Byslaepster, ende dat quam voor Israel. Maer Iacob hadde tweelf sonen.

* 2.Reg. 16.d.21

‡ Gen. 30.a.3 49.a.4

23

⁺ De Sonen Leas waren dese: Ruben de yerstgheboren soon Iacobs, Simeon, Leui, Iuda, Isaschar ende Sebulon,

+ E vers 23

24

De sonen Rahels waren: Ioseph ende Ben Iamin.

25

De sonen Bilha Rahels dienstmaechts, Dan ende Napthali.

26

De sonen Silpa, Leas dienstmaechts, Gad ende Asser: Dat zijn Iacobs Sonen, die hem gheboren zijn in Mesopotamia.

27

Ende hy quam tot sinen vader Isaac te Mamre in de Hooftstadt, die daer heet Hebron, daer Abraham ende Isaac vreemdelinghen in gheweest zijn.

28

Ende Isaac wert hondert ende tachtentich iaer out,

29

Ende nam af, ende sterf, ende wert verghadert tot sinen Volcke oudt ende des leuens sadt, ende zijn sonen Esau ende Iacob begroeuen hem.