Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiij. Capittel.

¶ Iacob trect sinen broeder Esau met sinen volcke teghen, Sy spreken minlijcken met malcanderen, ende wordens eens, Esau belooft veel duechden sinen broeder. Iacob coemt tot Sochoth ende Salem, ende hy woont aldaer.

1

⁺ IAcob hief zijn ooghen op, ende sach sinen Broeder Esau comen met vierhondert Mannen, ende deylde sine kinderen tot Lea ende tot Rahel, ende tot beyden dienstmaechden,

+ A vers 1

2

Ende schickte de dienstmaechden met haren kinderen voor aen, ende Lea met haren kinderen daer nae, ende Rahel met Ioseph ten laetsten,

3

Ende hy ginck voor haer henen, ende neech hem seuenmael op de aerde, tot dat hy tot sinen broeder quam.

4

^† Maer Esau liep hem te gemoet, ende nam hem inden arm, ende viel hem om den hals, ende custe hem, ende si weenden,

† Gen. 27.g.45

5

Ende hief zijn ooghen op, ende sach die vrouwen met den kinderen, ende sprack: Wie zijn dese by v? Hy antwoorde: Het zijn kinderen, die Godt uwen knecht verleent heeft.

6

⁺ Ende die dienstmaechden traden toe met haren kinderen, ende negen voor hem.

+ B vers 6

7

Lea tradt oock toe met haren kinderen, ende neech voor hem, daer nae tradt Ioseph ende Rahel toe, ende negen oock voor hem.

8

Ende hy sprack: Wat wildy met alle den heyr, dat my te gemoet comen is? Hy antwoorde: Dat ick ghenade vonde voor mijnen Heere,

9

Esau sprack: Ick heb ghenoech mijn broeder, behout dat ghy hebt.

10

Iacob antwoorde: Och neen: Heb ic genade vonden voor v, so neemt mijn geschenck van mijnder hant.^† Want ick sach v aenblick, als saghe ick Godts aengesicht, ende laet v wel behagen van my.

† 2.Re. 19.e.27 14.c.17

11

^* Neemt doch den seghen van my aen, die ick v toeghebracht hebbe, want Gode heuet my verleent, ende ic heb van als ghenoech. Also dwonck hy hem, dat hijt aen nam.

* 2.Reg. 25.e.27

12

⁺ Ende hy sprack: Laet ons voort trecken ende reysen, ick wil met v reysen.

+ C vers 12

13

Maer hy sprack tot hem: Mijn Heere ghy weet, dat ick cleyne kinderen by my heb, daer toe Vee ende soogende koeyen, wanneer si eenen dach afghedreuen werden, so soude my die gantsche cudde steruen.

14

Mijn Heere trecke voor sinen knecht henen, Ick wil saechtelijck nae drijuen, daer nae dattet Vee ende de kinderen gaen connen, tot dat ic come tot mijnen Heere in Seir.

15

⁺ Esau sprack: So wil ick doch by v laten sommighe vanden Volcke, dat met my is. Hy antwoorde: Wat ist van noo-de? Laet my slechts genade voor mijnen Heere vinden.

+ D vers 15

16

Also trock Esau dien dach wederom zijns wechs nae Seir.

17

Ende Iacob trock nae^* Suchoth, ende timmerde hem een huys, ende maecte sinen Vee hutten, daer af heet de stede Suchoth.

* Iudi. 8.b.6

18

^* Daer na tooch Iacob te Salem, totter stadt Sichem, die int landt Canaan leyt, nae dien hy wt Mesopotamien gecomen was, ende maeckte sinen leegher voor de Stadt,

* Gen. 28.d.21

19

^* Ende cocht een stuck Ackers vanden kinderen Hemor, des Vaders Sichem, voor hondert grosschen.

* Iosu. 24.d.32

20

Aldaer rechte hy zijn Hutten op, ende stelde aldaer eenen Altaer, ende riep aen den Naem des stercken Godts Israel.