Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxx. Capittel.

¶ Rahel gheeft Iacob haer dienstmaecht, die baert hem twee soonen, Also doet oock Lea met haer dienstmaecht die baert hem ooc twee sonen, Rachel neemt den Alruyn dat Iacob by Lea slapen mach.

1

⁺ DOen Rahel sach, dat si Iacob niet en baerde, benijde si haer suster, ende sprack tot Iacob: Geeft my oock kinderen, oft anders sal ick steruen.

+ A vers 1

2

Maer Iacob wert seer toornich op Rahel, ende sprack:^† Ick en ben doch Godt niet, die v ws lichaems vrucht niet gheuen en wil.

† 1.Reg. 1.a.5

3

Maer si sprack: Siet, daer is mijn ionckwijf Bilha,^* legget v by haer, dat si op mijnen schoot bare, ende ick doch door haer ghebouwet worde.

* Gen. 16.a.2

4

Ende gaf hem also Bilha haer ionckwijf ten wijue.

5

Ende Iacob leyde hem by haer, also wert Bilha beurucht, ende baerde Iacob eenen soone.

6

Doen sprack Rahel: Godt heeft mijn sake geoordeelt, ende mijn stemme verhoort, ende my eenen sone gegeuen, daerom hiet si hem^* Dan.

* 1.Par. 2.a.2

7

Noch eens wert Bilha Rahels ionckwijf beurucht, ende baerde Iacob den tweeden soon.

8

Doen sprack Rahel: Godt heeft het gewent met my ende mijnder suster, ende ick neme de ouerhant, ende hiet hem Naphtali.

9

⁺ Doe nv Lea sach, dat si op hiel te baren, nam si haer ionckwijf Silpa, ende ghafse Iacob te wijue.

+ B vers 9

10

Alsoo baerde Silpa Lea ionckwijf, Iacob eenen soon.

11

Doen sprack Lea: Rustich, ende hiet hem Gad.

12

Daer na baerde Silpa Lea ionckwijf, Iacob den tweeden sone.

13

Doen sprack Lea: Wel my, want my sullen salich prijsen de dochteren, ende hiet hem Assar.

14

Ruben ghinck wt ter tijt des terwen oogsts, ende vant Dudaim opten velde, ende brachtse te huys zijnder moeder Lea. Doen sprack Rahel tot Lea: Gheeft my dier Dudaim ws soons een deel:

15

Sy antwoorde: Hebdy niet genoech dat ghy my, mijnen man ghenomen hebt, ende wilt oock de Dudaim mijns soons nemen? Rahel sprack. Wel aen, hy sal desen nacht by v slapen, voor de Dudaim ws soons.

16

⁺ Doen nv Iacob des auondts vanden Velde quam, ghinck Lea wt hem te ghemoet, ende sprack: By my suldy ligghen, want ick heb v ghecoft voor de Dudaim

+ C vers 16

[p. 12r]

mijns soons. Ende hy sliep dien nacht by haer.

17

Ende Godt verhoorde Lea, ende si wert beurucht, ende baerde Iacob den vijfsten sone,

18

Ende sprack: God heeft my gheloont, dat ick mijnen man mijn dienstmaecht gegeuen heb, ende hiet hem Isaschar.

19

Noch eens wert Lea beurucht, ende baerde Iacob den sesten soon,

20

Ende sprack: Godt heeft my wel beraden, nv sal mijn man weder by my woonen, want ick heb hem ses soonen ghebaert, ende hiet hem Sebulon.

21

Daernae baerde si een dochter, die hiet si^* Dina.

* Gen. 34.a.1

22

Maer de HEERE ghedachte Rahels, ende verhoordese, ende maecktese vruchtbaer.

23

Doe wert si beurucht, ende baerde eenen soon, ende sprack: Godt heeft mijnen lachter van my genomen,

24

Ende hiet hem^* Ioseph, ende sprac: De HEERE woude my doch noch eenen anderen soon daer toe gheuen.

* 1.Par. 2.a.2

25

⁺ Doe nv Rahel Ioseph ghebaert had, sprack Iacob tot Laban:^† Laet my trecken ende reysen aen mijn plaetse, ende in mijn landt,

+ D vers 25

† 3.Reg. 11.d.21.

26

Gheeft my mijne wijuen ende mijn kinderen, daer ick v om ghedient heb, dat ick henen trecke, want ghy weet, hoe lange ende getrouwelijck ick v ghedient hebbe.

27

Laban sprack tot hem: Laet my genade voor uwen oogen vinden.^* Ick spuere dat my de HEERE gebenedijt heeft, om uwen wille,

* Gen. 39.a.5

28

Sedt dat loon dat ick v gheuen sal.

29

Mer hy sprac tot hem: Ghy weet wel hoe ick v gedient heb, ende wat ghy voor Vee hebt onder my,

30

Ghy had luttel eer ick hier quam, maer nv ist wtgebreyt in de veelheyt, ende de HEERE heeft v ghebenedijt, door mijnen voet. Ende nv, wanneer sal ick oock mijn huys besorghen?

31

⁺ Maer hy sprack: Wat sal ick v dan gheuen? Iacob sprack: Ghy en sult my niet met allen gheuen, maer ist, dat ghy my doen wilt, dat ick segghe, so wil ick wederom weyden, ende hoeden uwe schapen.

+ E vers 31

32

Ick wil heden door alle de Cudden gaen, ende wtscheyden alle geplacte ende bonte schapen, ende alle swerte schapen onder den lammeren, ende de bonte ende gheplacte gheyten: Wat nv bont ende gheplact vallen sal, dat sal mijnen loon zijn,

33

So sal my mijn gerechticheyt getuygen heden oft morgen, wanneer het coemt dat ick mijnen loon van v nemen sal, also dat, wat niet beplact, oft bondt, oft niet swert zijn en sal, onder den lammeren ende gheyten, dat si een dieuerye by my.

34

⁺ Doe sprack Laban: Siet daer, het si so ghy gheseyt hebt.

+ F vers 34

35

Ende scheide in dien daghe wt de ghesprickelde ende bonte Bocken, ende alle geplacte ende bonte Gheyten. Waer slechts wat wits aen was, ende al wat swert was onder den lammeren,

36

Ende deet onder de handen zijnder kinderen, ende maeckten ruymte, drie dach reysen verre, tusschen hem ende Iacob. Also weyde Iacob die ouergebleuen cudden Labans.

37

Maer Iacob nam stocken van groe-ne Popelierboomen, Hazelaren ende Castanien, ende schelde witte strepen daer aen, dat aen de stocken dat witte bloot wert,

38

Ende leyde de stocken, die hy geschelt hadde in de drenckgoten voor de cudden, die daer moesten comen om te drincken, dat si ontfanghen souden, als si quamen drincken.

39

Aldus ontfingen de Cudden bouen die stocken, ende brachten besprenckelde, beplacte ende bonte.

40

Doe scheyde Iacob lammeren, ende dede die afgescheydene cudden, tot den gheplacten ende swerten in de cudde Labans, ende maeckte hem een eygen Cudde, die en dede hy tot Labans Cudde niet.

41

⁺ Maer wanneer den^* loop der vroeger Cudden was, leyde hy de stocken in de goten, voor de oogen der Cudden, dat si bouen de stocken ontfangen souden.

+ G vers 41

* ramminge.

42

Maer in den spadelijcken loop, en leyde hyse daer niet in. Also werden de spadelinghen, Labans, ende de vroeghelingen, Iacobs: Daer af wert de Man bouen maten rijck, dat hy veel Schapen, Dienstmaechden, Knechten, Kemelen, ende Ezelen hadde.