Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

¶ Iacob coemt totter fonteynen by Haran, hy watert Labans schapen, hy vertoont hem seluen Rachel, hy dient Laban seuen iaer om Rachel, hy wort in Lea bedrogen, hy dient weder seuen iaer om Rachel, Lea baert hem vier sonen, ende Rachel is onuruchtbaer.

1

⁺ DOen hief Iacob zijn voeten op, ende ginc in dat lant dat tegent Oosten leyt,

+ A vers 1

2

Ende sach om, ende siet, daer was een fonteyn opten velde, ende siet, drie Cudden Schapen lagen daer by. Want van dier fonteynen plegen si de Cudden te drencken, ende daer lach eenen grooten steen voor dat hol der fonteynen,

3

Ende si plegen alle de Cudden aldaer te vergaderen, ende den steen van dat hol der fonteynen te wentelen, ende de Schapen te drencken, ende leyden den steen weder voor dat hol in zijn stede.

4

Ende Iacob sprack tot hen: Lieue broeders van waer sidy? Sy antwoorden: Wy zijn van Haran.

5

Hy sprac tot hen: Kendy oock Laban den sone Nahor? Sy antwoorden: Wy kennen hem wel.

6

⁺ Hy sprack:^† Gatet hem ooc wel? Sy antwoorden: Het gaet hem wel, ende siet, daer coemt zijn dochter Rachel met de Schapen.

+ B vers 6

† Gen. 43.e.27

7

Hy sprac: Het is noch hooch dach, ende ten is noch geen tijt, dat Vee in te drijuen, drenckt de Schapen, ende gaet henen, ende weytse.

8

Sy antwoorden: Wy en connen niet, tot dat alle de Cudden te samen gebracht worden, ende wy den steen van dat hol der fonteynen wentelen, ende also de Schapen drencken.

[p. 11v]

9

Als hy noch met hen sprack, doen quam Rachel metten Schapen haers Vaders, want si hoede de Schapen.

10

Maer doen Iacob Rahel sach Labans dochter, zijns moeders broeders, ende de Schapen Labans zijns moeders broeders, tradt hy hem toe,⁺ ende wentelde den steen vanden hole der fonteynen ende drenckte de Schapen Labans zijnder moeder broeders,

+ C vers 10

11

Ende custe Rahel, hief op zijn stemme, ende weende,

12

Ende seyde haer, dat hy haers Vaders broeder was, ende Rebeca soone: Doen liep si henen, ende seydet haren Vader aen.

13

Maer doen Laban hoorde van Iacob zijnder suster sone, liep hy hem te gemoet, ende omhelsde hem ende custe hem, ende brocht hem in zijn huys. Doen vertelde hy Laban alle dese geschiedenissen.

14

Doen sprack Laban tot hem: Welaen ghy zijt mijn been ende mijn vleesch. Ende doen hy nv een maent lanck by hem gheweest was,

15

Sprack Laban tot Iacob: Al sidy mijn broeder, soudy my daerom, om niet dienen? Segt, wat sal uwen loon zijn?

16

Maer Laban had twee dochteren, de Oudste hiet Lea, ende de Ioncste Rahel.

17

Maer Lea had een swack ghesichte: Rahel was schoon van ghedaente ende schoon van aensichte.

18

⁺ Ende Iacob creech Rahel lief, ende sprack: Ick wil v seuen iaer om Rahel uwe Ioncste dochter dienen.

+ D vers 18

19

Laban antwoorde: Het is beter, dat ickse v gheue, dan eenen anderen: Blijft by my.

20

Also diende Iacob om Rahel seuen Iaer, ende het dochte hem luttel daghen te wesen, so lief had hy haer.

21

Ende Iacob sprack tot Laban: Gheeft my mijn wijf, want den tijt is hier, dat ick by haer ligge.

22

Doen noode Laban alle de lieden van dier plaetsen, ende maeckte een weerschap.

23

Maer des auonts nam hy zijne dochter Lea, ende brachtse tot hem in. Ende hy besliepse.

24

Ende Laban^* ghaf Lea zijnder Dochter zijn dienstmaecht Silpa tot een dienstmaecht.

* Gen. 46.c.18.

25

⁺ Maer des morgens, Siet, doen wast Lea. Ende hy sprack tot Laban: Waerom hebdy my dat ghedaen? Heb ick niet ghedient om Rahel? Waerom hebdy my dan bedrogen?

+ E vers 25

26

Laban antwoorde: Het en is niet ghewoonlijck in onsen lande, datmen de Ionckste wtgheeft voor de Outste.

27

Hout met dese dese weke wt, so wil ick v dese ooc geuen, om den dienst, die ghy my noch ander seuen Iaren dienen sult.

28

Iacob dede also, ende hielt de weke wt.

29

Doen ghaf hem Laban Rahel zijn dochter te wijue, ende ghaf Rahel zijn dochter zijn dienstmaecht Bilha tot een ionckwijf.

30

Also lach hy oock by Rahel, ende had Rahel lieuer dan Lea, ende diende by hem voort aen dander seuen iaer.

31

Maer doen de HEERE sach, dat Lea onweert was, maeckte hijse vruchtbaer, ende Rahel onuruchtbaer.

32

⁺ Ende Lea wert beurucht, ende baerde eenen soon^* dien hiet si Ruben, ende sprack: De HEERE heeft aenghesien mijne allende, Nv sal my mijn man liefhebben.

+ F vers 32

* 1.Par. 2.a.1

33

Ende wert noch eens beurucht, ende baerde eenen soon, ende sprac: De HEERE heeft ghehoort dat ick onweert ben, ende heeft my desen oock ghegeuen, ende hiet hem Simeon.

34

Noch eens wert si beurucht, ende baerde eenen soon, ende sprack: Nv sal hem mijn man weder tot my doen, want ick heb hem drie soonen gebaert, daerom hiet si hem Leui.

35

Ten vierden wert si beurucht, ende baerde eenen soon, ende sprack: Nv wil ick den HEERE dancken, daerom hiet si hem Iuda, ende hielt op kinderen te baren.