Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxviij. Capittel.

¶ Isaac seynt Iacob tot Laban, Iacob siet inden slape een leeder totten hemel verheuen, ende de Engelen daer op ende afclimmende, de Heere beuesticht hem zijn beloften Abraham ghedaen, ende hem bystant toeseyt, daer op doet Iacob een ghelofte.

1

⁺ DOen riep Isaac zijnen sone Iacob, ende ghebenedijde hem, ende gheboot hem, ende sprack tot hem.^† En neemt geen wijf van den dochteren Chanaan,

+ A vers 1

† Gen. 24.a.3

2

Maer maeckt v op^* ende treckt in Mesopotamien, tot Bethuel, ws moeders Vaders huys, ende neemt v aldaer een wijf vanden dochteren Laban ws moeders broeder.

* Ozee. 12.b.13

3

Maer de almachtige Godt gebenedie v, ende make v vruchtbaer, ende vermeerdere v, dat ghy wort eenen hoop volcx,

4

Ende geue v de benedictie Abrahams, v, ende uwen sade met v, dat ghy besidt dat lant, daer ghy een vreemdelinc in zijt^* dat Godt Abraham ghegeuen heeft.

* Gen. 15.d.15. 24.a.7

5

Also schickte Isaac Iacob wech, dat hy in Mesopotamien trock tot Laban, Bethuels soon, in Syrien den broeder Rebecca, zijnder ende Esaus moeder.

6

⁺ Als nv Esau sach, dat Isaac Iacob ghebenedijt hadde, ende henen ghesonden in Mesopotamien, dat hy aldaer een wijf name, ende dat hy, de wijle hy hem ghebenedijde, hem gheboot, ende sprack: Ghy en sult gheen wijf nemen vanden dochteren Chanaan,

+ B vers 6

7

Ende dat Iacob zijn Vader ende zijne moeder hoorde, ende in Mesopotamien tooch,

8

Sach ooc dat Isaac zijn Vader niet geerne en sach de dochteren Chanaan,

9

Doen ghinck hy henen tot Ismael, ende nam bouen de wijuen, die hy te voren hadde,^* Mahalath de dochter Ismaels, des soons Abraham, de suster Nebaioth te wijue.

* Gen. 36.a.3

10

⁺ Maer Iacob tooch wt van Bersaba,^* ende reysde nae Haran,

+ C vers 10

* Gen. 11.d.31

11

Ende quam aen een plaetse, daer bleef hy den nacht ouer. Want de sonne was onder gegaen, ende hy nam eenen steen dier plaetsen, ende leyden tot sinen hoofde, ende ghinck liggen slapen, in de selue plaetse.

12

Ende hem droomde, ende siet, een leere stond opter aerden, die roerde met het eynde aenden Hemel, ende siet.^* De Engelen Godts clommen daer lancx op ende neder.

* Ioan. 1.f.51

13

Ende de HEERE stont bouen daer op^* ende sprack: Ick ben de HEERE Abrahams ws vaders Godt, ende Isaacs Godt, dat lant daer ghy op ligt, wil ick v, ende uwen sade geuen,

* Eccl. 44.e.25

14

Ende v saet sal worden ghelijck dat stof op aerden, ende ghy sult wtgebreyt worden, tegent Westen, Oosten, Noorden, ende Suyden,^* ende door v ende uwen sade sullen alle geslachten op aerden ghebenedijt worden.

* Gen. 12.a.3. 22.c.18 Gal. 3.b.8

15

Ende siet^† ick ben met v, ende wil v behoeden waer ghy henen treckt, ende wil v weder hier brenghen in dit lant, want ick en wil v niet verlaten, tot dat ick doe alle wat ick v gheseyt hebbe.

† Esa. 43.a.2

16

⁺ Doen nv Iacob van sinen slape ontwaeckte, sprack hy:^‡ Ghewisselijck is de HEERE in dese plaetse, ende ick en wistes niet,

+ D vers 16

‡ Act. 12.a.11

17

Ende vreesde hem, ende sprack: Hoe heylich is dese stede. Hier en is niet anders, dan een huys Godts, ende hier is die poorte des hemels.

18

Ende Iacob stont des morgens vroech op^* ende nam den steen die hy tzijnen hoofde gheleyt hadde, ende rechte hem op tot een teecken, ende goot daer olie bouen op,

* Gen. 31.b.13

19

^* Ende hiet de stede BethEl, daer te voren hiet si anders de stadt Lus.

* Gen. 35.a.1

20

^* Ende Iacob dede een ghelofte, ende sprack: Ist dat Godt met my sal zijn, ende my behoeden op den weghe, die ick reyse, ende broot te eten gheuen, ende cleederen aen te trecken,

* 1.Par. 4.b.10

21

Ende my met vreden weder te huys tot mijnen Vader brengen, so sal de HEERE mijn Godt zijn:

22

Ende desen steen die ick opgherecht heb, tot een teecken, sal een Godts huys worden, ende alle wat ghy my gheeft, daer af wil ick v die thiende gheuen.