Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Hoe Sara sterf, ende Abraham eenen Acker cochte vanden kinderen Heth, tot eender begrauinghe zijns gheslachts.

1

⁺ SAra werdt hondert seuenentwintich Iaer out [so langhe leefde sy]

+ A vers 1

2

Ende sterf, inder hooftstadt die Hebron heet inden lande Canaan. Daer quam Abraham,^* dat hyse beclaechde ende beweende.

* Act. 8.a.2.

3

Daer na stont hy op van zijnen Lijcke, ende sprack met den kinderen Heth, ende seyde:

4

Ick ben een vreemt man ende een Inwoonder by v, gheeft my een erfbegrauenisse by v, dat ick mijnen dooden begraue die voor my leyt.

5

Doen antwoorden Abraham de kinderen Heth, ende spraken tot hem:

6

Hoort ons lieue Heere, ghy zijt een Vorst Gods onder ons. Begraeft uwen dooden in onse eerlijcste grauen, gheen mensche onder ons en sal v beletten, dat ghy in zijnen graue uwen dooden begraeft.

7

⁺ Doen stont Abraham op, ende neychde hem voor den volcke des lants, namelijck, voor de kinderen Heth.

+ B vers 7

8

Ende hy sprack met hen, ende seyde: Ist uwen wille, dat ick mijnen dooden, die voor my leyt begraue, so hooret my, ende biddet voor my, aen Ephron den sone Soar,

9

Dat hy my geue zijn dubbel speluncke, die hy heeft aent eynde zijns Ackers. Om een gelijck ghelt gheue hijse my, so veelse weert is, onder v tot eender erfbegrauenisse,

10

Want Ephron woonde onder de kinderen Het. Doen antwoorde Ephron de Hethiter Abraham, dattet de kinderen Het aenhoorden, voor alle de ghene die tzijnder stadt poorten wt ende in ghingen, ende sprack:

11

Neen mijn Heere, maer hoort my, Ic gheue v den Acker, ende de speluncke daer in daer toe, ende gheuese v ouer voor de ooghen der kinderen mijns volcx, te begrauen uwen dooden.

12

⁺ Doen neychde hem Abraham voor dat volc des lants,

+ C vers 12

13

Ende sprack met Ephron, dattet aenhoorde dat volck des lants, ende seyde: Wildy my dien laten, soo bid ick, neemt van my dat gelt voor den

[p. 8v]

Acker, dat ict v gheue, soo wil ick mijnen dooden aldaer begrauen.

14

Ephron antwoorde Abraham ende sprack tot hem:

15

Mijn Heere hoort my doch. Dat velt is vier hondert sikels siluers weert, maer wat is dat tusschen v ende my? Begraeft slechts uwen dooden.

16

Abraham anwoorde Ephron, ende woech hem dat ghelt daer henen, dat hy geseyt had, dattet de kinderen Heth aenhoorden, te weten, vier hondert sikel siluers, dat int coopen gancbaer ende begeuelijck was.

17

⁺ Also wert Ephrons Acker, daer die dubbel speluncke in is, tegen Mambre ouer, Abraham tot eyghen goede beuesticht metter speluncken daer in, ende met met allen boomen opten Acker rontom,

+ D vers 17

18

Dat het de kinderen Heth aensaghen, ende alle die tot zijnder stadt poorten wt ende in ghinghen.

19

Daer na begroef Abraham zijn wijf Sara, in de speluncke des Ackers, die dubbel is, teghen Mamre ouer, dat is Hebron int Lant Canaan.

20

Also wert beuesticht den Acker ende de speluncke daer in, Abraham ter erfbegrauenissen vanden kinderen Heth.