Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ Hoe dat Abraham Gode gehoorsaem was, Isaac zijnen sone te offeren, ende daerom weder de belofte ontfinck.

[p. 8r]

1

⁺ NA dese geschiedenissen^† beproefde Godt Abraham, ende sprack tot hem: Abraham? Ende hy antwoorde: Hier ben ic.

+ A vers 1

† Iudit. 8.d.21. Eccl. 44.c.21

2

^* Ende hy sprack: Neemt Isaack uwen eenighen Sone, dien ghy lief hebt, ende gaet henen in dat landt Moria, ende offert hem aldaer tot eenen brantoffer op eenen berge, dien ick v segghen sal.

* Heb. 11.d.17

3

^* Doen stont Abraham des mogens vroech op, ende sadelde zijnen Ezel, ende nam met hem twee Ionghers, ende zijnen sone Isaac, ende cloofde hout totten brantoffer, maecte hem op ende ghinck henen ter plaetsen daer hem Godt af geseyt hadde.

* Ioan. 8.e.56.

4

Ten derden dage, hief Abraham zijn ooghen op, ende sach die stede van verre,

5

Ende sprack tot zijnen Ionghers: Blijft ghy hier met den Ezel, ick ende den Ionghen willen daer henen gaen,^* ende wanneer wy aengebeden hebben, willen wy weder tot v comen.

* Gen. 22.d.19.

6

⁺ Ende Abraham nam dat hout totten brantoffer, ende leydet op zijnen sone Isaac. Maer hy nam dat vier ende mes in zijn hant, ende die beyde ghingen te samen.

+ B vers 6

7

Doen sprack Isaack tot zijnen vader Abraham: Mijn vader. Abraham antwoorde: Hier ben ick mijn sone. Ende hy sprack: Siet, hier is vier ende hout, maer waer is dat schaep totten brantoffer?

8

Abraham antwoorde: Mijn sone, God sal hem^‡ wtsien een schaep totten brantoffer, ende die beyde ghinghen te samen.

‡ Versien.

9

Ende als sy quamen aen die stede die hem Godt seyde, boude Abraham aldaer eenen Altaer, ende leyde dat hout daer op, ende bant zijnen sone Isaac, leyde hem op den Altaer, bouen op dat hout,

10

Ende recte zijn hant wt, ende vaette dat mes, dat hy zijnen sone soude slaen.

11

⁺ Doen riep hem de Engel des HEEREN vanden Hemel, ende sprack: Abraham, Abraham. Hy antwoorde: Hier ben ick.

+ C vers 11

12

Hy sprack: En legt v hant niet aen den Ionghen, ende en doet hem niet. Want nv weet ick, dat ghy Godt vreest,^* ende en hebt uwen eenighen sone niet verschoont om mijnentwille.

* Rom. 8.d.32. 1 Mac. 2.f.52.

13

Doen hief Abraham zijn ooghen op, ende sach eenen Ram achter hem, inden bossche hanghende, met zijn hoornen, ende ghinck henen, ende nam den Ram, ende offerden tot eenen brantoffer, in zijns soons stede.

14

Ende Abraham hiet die stede: De HEERE siet. Daer af men noch heden sdaechs seyt: Op den berghe, daer de HEEre siet.

15

Ende de Enghel des HEEren riep Abraham noch eens vanden Hemel, ende sprack:

16

^† Ick heb by my seluen gesworen, spreect de HEEre, Dewijle ghy sulcx ghedaen hebt, ende en hebt uwen eenighen Sone niet ghespaert,

† Hebr. 6.b.13. Eccl. 44.c.22

17

Dat ick uwe saet ghebenedien ende vermeerderen wil, als de Sterren aen den Hemel ende als dat Sant aen den oeuer des Sees.^* Ende uwe saet sal besitten de poorten zijnder Vianden,

* Ge. 24.g.60

18

^† Ende door uwen Sade sullen alle volcken op Aerden ghenebedijt worden, daerom dat ghy mijnder stemmen ghehoorsaem gheweest hebt.

† Gene. 12.a.3. Gala. 3.b.8. Act. 3.d.25.

19

^+* Alsoo keerde Abraham weder tot zijnen Ionghers, ende maecten hen op, ende toghen te samen na BerSaba, ende woonden aldaer.

+ D vers 19

* Gen. 22.a.5.

20

Na dese gheschiedenissen ghebuerdet, dat Abraham aengheseyt wert:^† Siet, Milca heeft oock kinderen ghebaert uwen broeder Nahor,

† Gen. 11.d.29

21

Te weten,^* Vz, den yestgheboren ende^‡ Bus zijnen broeder, ende Kemuel, van dien de Syriers comen,

* Iob. 1.a.1.

‡ Iob. 32.a.2.

22

Ende Cesed, ende Haso, ende Pildas, ende Iedlaph,

23

Ende Bethuel. Maer Bethuel wan^† Rebeca. Dese acht ghebaerde Milca Nahor Abrahams broeder.

† Gen. 24.b.15.

24

Ende zijn Concubijn met namen Rehuma, baerde oock namelijck Thebath, Gaham, Thahas, ende Maacha.