Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Hoe Isaac na der beloften Gods gheboren worde, ende hoe Agar verworpen worde met den kindeken Ismael, ende van dat verbondt Abrahams met Abimelech.

1

⁺ ENde de HEEre besocht Sara, alsoo hy ghesproken had, ende dede met haer,^* also hy ghesproken hadde.

+ A vers 1

* Gen. 18.b.10

2

^† Ende Sara wert beurucht ende baerde Abraham eenen sone in zijnen ouderdom, ter tijt, die hem Godt gheseyt hadde.

† Heb. 11.c.11. 1.Reg. 1.c.20.

3

^‡ Ende Abrahan hiet zijnen sone, die hem geboren was, Isaac, die hem Sara baerde.

‡ Matt. 1.c.21. Iosue. 24.a.3.

4

Ende besneet hem ten achsten daghe,^† als hem Godt geboden hadde.

† Gen. 17.b.10.

5

Hondert iaer was Abraham out, doen hem zijn sone Isaac gheboren wert.

6

Ende Sara sprack: Godt heeft my een lachen toe ghericht. Want wiet hooren sal, die sal mijnder belachen.

7

Ende sprac voorder: Wie dorste dat van Abraham seggen, dat Sara kinderen soochde, ende hadde hem eenen sone ghebaert in zijnen ouderdom? Ende dat kint wies ende wert ghespeent.

8

Ende Abraham bereyde een groote gasterije inden daghe, doen Isaac ghespeent wert.

9

Ende Sara sach den sone Hagar der Egiptischer, dien sy Abrabraham ghebaert hadde, dat hy een bespotter was,

10

⁺ Ende sprack tot Abraham:^† Drijft dese dienstmaecht wt met haren sone, want deser maghet sone en sal niet eruen met mijnen sone Isaac.

+ B vers 10

† Iudi. 11.a.2. Gala. 4.c.30.

11

Dat woort beuiel Abraham seer qualijc om zijns soons wil.

12

Maer God sprac tot hem: En laet het v niet qualijcken beuallen om des knechtkens ende dienstmaechts wil. Alle wat Sara v gheseyt heeft, dat hoort,^† Want in Isaac sal v dat saet genoemt worden.

† Rom. 9.a.7.

13

^* Oock wil ick des dienstmaechts sone tot eenen volcke maken, daerom dat hy ws saets is.

* Gen. 17.c.20

14

Doen stont Abraham des morghens vroech op, ende nam broot ende een flessche met water, ende leyde het Hagar op hare schouderen, ende den Ionghen mede, ende lietse wt. Doen tooch sy henen, ende ghinck in de woestijne dwalende by Bersaba.

15

Doen nv dat water inder flesschen wt was, wierp sy den ionghen onder eenen boom,

16

⁺ Ende ghinck henen ende sette haer teghen hem ouer van verre, een armborsts schuet wijt. Want sy sprack: Ick en can des Ionghens steruen niet aensien. Ende sy sette haer teghen hem ouer, ende hief haer stemme op ende weende.

+ C vers 16

17

Doen verhoorde God de stemme des Ionghens, ende de Enghel Gods riep vanden Hemel tot Hagar, ende sprack tot haer: Wat is v Hagar? En vreest v niet. Want Godt heeft verhoort de stemme des Ionghen, daer hy leyt.

18

Staet op, neemt den Ionghen, ende leydt hem aen uwer hant,^* want ick wil hem tot een groot volck maken.

* Gen. 7.c.20.

19

Ende^† Godt dede haer de ooghen op, dat sy een waterfonteyne sach. Doen ghinck sy henen, ende vulde de flessche met water, ende gaf den Ionghen te drincken,

† Esa. 41.c.17

20

Ende Godt was met den Ionghen, die wies ende woonde inder woestijnen, ende wert een goet schutter,

21

Ende woonde inder woestijnen Pharan, ende zijn moeder nam hem een wijf, wt Egipten lant.

22

Ter^† seluer tijt sprack Abimelech ende Phichol zijn Velthoofman met Abraham, ende seyde: Godt is met v, in alle dat ghy doet.

† Gen. 26.d.26.

23

So sweert my nv by God, dat ghy my, noch mijnen kinderen, noch mijnder kinderen kinderen, gheen ontrouwe bewijsen en wilt:^† Maer dat ghi de bermherticheyt die ick aen v ghedaen heb, aen my oock doet, ende aen den lande daer ghy een vreemdelinck in zijt.

† Gen. 20.d.14.

24

Doen sprac Abraham: Ic wil sweren.

25

Ende Abraham strafte Abimelech om des Waterputs wille,^* die Abimelechs knechten met gheweldt ghenomen hadden.

* Gene. 26.b.15

26

Doen antwoorde Abimelech: Ick en hebs niet gheweten, wie dat ghedaen heeft, oock en hebdijt my niet aengheseyt, daer toe en heb ict niet ghehoort, dan heden.

27

⁺ Doen nam Abraham schapen ende Runderen, ende gafse Abimelech, ende maecten beyde een verbont te samen.

+ D vers 27

28

Ende Abraham stelde daer seuen lammeren bysonder.

29

Doen sprack Abimelech tot Abraham: Wat sullen die seuen Lammeren, die ghy daer bysonder ghestelt hebt?

30

Hy antwoorde: Seuen lammeren suldy van mijnder hant nemen, dat sy my tot een ghetuychenis zijn, dat ick desen Put ghegrauen heb.

31

Daer af heet die stede BerSaba, dat sy daer beyde te samen gesworen hebben,

32

Ende also maecten sy dat verbondt tot BerSaba. Doen maecte hem Abimelech op ende Phichol zijn velthooftman, ende toghen weder inder Philistijnen landt.

33

Maer Abraham plante Boomen te BerSaba, ende predicte aldaer van den Naem des HEEREN, des eeuwighen Gods,

34

Ende was een vreemdelinck inder Philistijnen lant, een langhe tijt.