Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Hoe dat Abraham buyten den lande reysde, ende Abimelech Coninc van Gerar Abrahams huysvrouwe nam ende hem Godt daerom sloech.

1

⁺ MAer Abraham tooch van daer in dat lant tegent Suyden, ende woonde tusschen Kades ende Sur, ende wert een vreemdelinck te Gerar,

+ A vers 1

2

Ende seyde van zijnen wijue Sara: Het is mijn^† suster. Doen sant Abimelech de Coninck te Gerar na haer, ende lietse halen.

† Gene. 12.e.13. 26.a.7.

3

Maer^* Godt quam tot Abimelech des nachts inden droom ende sprack tot hem: Siet daer, ghy zijt des doots, om des wijfs wille, die ghy genomen hebt, want sy is eens mans echte wijf.

* Ge. 31.d.24.

4

Maer Abimelech en hadse noch niet aengheroert ende sprac: HEEre wildy dan oock een gerechtich volck dooden,

5

En heeft hy niet tot my gheseyt: Sy is mijn suster? Ende sy heeft oock gheseyt: Hy is mijn broeder? Ick hebbe doch dat gedaen met eenuuldigher herten, ende ontschuldighen handen.

6

⁺ Ende Godt sprac tot hem inden droom: Ick weet oock dat ghijt met eenuuldiger herten gedaen hebt, daerom heb ick v oock behoet dat ghy niet teghen my en sondichdet, ende en hebs v niet toegelaten dat ghyse aenroerde.

+ B vers 6

7

So geeft nv den man zijn wijf weder,^† want hy is een Propheet. Ende laet hem voor v bidden so suldy leuendich blijuen. Maer waer ghyse hem niet weder en gheeft, so weet dat ghy de doot steruen moet ende alle wat uwe is.

† Psal. 105.b.15

8

Doen stont Abimelech des morgens vroech op, ende riep alle zijn knechten, ende seyde hen alle dit voor haren ooren: Ende de lieden vreesden hen seer.

9

Ende Abimelech riep Abraham oock ende sprack tot hem:^† Waerom hebdy ons dat ghedaen? Ende wat heb ick aen v gesondicht? dat ghy alsulcken grooten sonde woudet op my ende mijnen rijcke brenghen? Ghy hebt met my ghehandelt, niet alsoomen handelen sal.

† Gene. 12.d.18. 26.b.10.

10

Ende Abimelech sprack tot Abraham: Wat hebt ghy gesien, dat ghy sulcx ghedaen hebt?

11

⁺ Abraham sprac: Ick dachte, misschien en isser gheen vreese Gods in dese plaetsen, ende sullen my, om mijns wijfs wille, dooden.

+ C vers 11

12

Ooc is sy waerachtich mijn suster, want sy is mijns vaders dochter, maer niet mijnder moeder dochter, ende is mijn wijf geworden.

13

Maer doen my Godt wt mijn Vaders huys hiet

[p. 7v]

wandelen^* sprack ick tot haer: Die barmherticheyt doet aen my, dat waer wy henen comen, ghy van my segt, ick ben v broeder.

* Gene. 12.c.11.

14

⁺ Doen nam Abimelech Schapen ende Runderen, knechten ende maechden, ende gafse Abraham, ende gaf hem weder zijn wijf Sara,

+ D vers 14

15

Ende sprack:^† Siet daer mijn lant staet v open, woont waert v wel behaecht:

† Gene. 13.b.9.

16

Ende sprack tot Sara: Siet daer, ick heb uwen broeder duysent siluerlinghen gegeuen. Siet dat sal v een decsel der ooghen zijn, voor alle die by v zijn, ende ouer al: Ende dat was haer straffe.

17

Maer Abraham badt tot Godt, doen heelde Godt Abimelech ende zijn wijf, ende zijn maechden, dat sy kinderen baerden.

18

Want de HEEre hadde te voren vaste toegesloten, alle moeders des huys Abimelech, om Sara Abrahams wijfs wil.