Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Hoe dat Godt straft Sodoma ende Gomorra om haerder onnoemelijcker oncuysheyts wille. Ende Lot wert ghewaerschout ende behouden met zijn twee dochteren, ende zijn huysvrouwe in eenen Soutsteen verandert, hoe Lot in dronckenschap by zijne dochteren sliep, ende die met kinde maecte.

1

⁺ DIe twee Enghelen quamen te Sodoma des auonts.^† Maer Lot sat te Sodoma onder de poorte: Ende doen hyse sach, stont hy op hen te gemoete, ende neychde hem met zijn aensicht op de Aerde, ende sprack:

+ A vers 1

† Genes. 18.a.1.

2

Siet, HEERE, coemt toch in ten huyse ws knechts, ende blijft ouer nacht: Laet uwe voeten wasschen, soo stady morghen vroech op, ende trect uwer straten. Maer si spraken: Neen maer wy willen ouer nacht opter straten blijuen.

3

Doen^† dwanck hyse seer, ende sy ghinghen tot hem in, ende quamen in zijn huys, ende hy bereyde hen een maeltijt, ende bieck ongesuerde koecken,^* ende si aten.

† Iudi. 19.b.7 Luce. 14.c.23. 24.c.28. Acto. 16.b.15.

* Tob. 12.d.19

4

⁺ Maer eer sy hen slapen leyden,^† quamen die lieden der stadt Sodoma, ende omleyden dat huys, ionck ende oudt, dat gheheele volck wt allen eynden,

+ B vers 4

† Iudi. 19.f.22

5

Ende eysscheden Lot, ende spraken tot hem: Waer zijn de mannen, die tot v comen zijn desen nacht? Laetse wt comen tot ons,^* dat wyse bekennen.

* Leuit. 18.c.22 Iudic. 19.f.22

6

^† Lot ghinck wt tot hen voor de duere, ende sloot de duere achter hem toe,

† Iudi. 19.f.23

7

Ende sprack: Och lieue broeders, en doet niet soo qualijck.

8

Siet, ick heb twee dochteren, die en hebben noch gheenen man bekent, die wil ick hier wt gheuen onder v, ende doet met hen wat v belieft: alleen dese mannen en doet niet, want daerom zijn sy onder die schaduwe mijns dacx inghegaen.

9

Maer sy spraken: Coemt herwaerts. Doen spraken sy, ghy zijt een eenich vreemdelinck hier,^† ende wilt regeren. Wel aen, wy willen v bet plaghen dan de ghene.^* Ende sy dronghen hert op den man Lot.

† Exod. 2.b.14.

* 2.Pe..2.b.7

10

⁺ Ende doen sy henen liepen, ende wilden die duere op breken, grepen die mannen buyten, ende trocken Lot tot hen int huys, ende sloten die duere toe.

+ C vers 10

11

Ende die mannen voor die duere aen den huyse,^† werden met blintheyt gheslaghen, beyde cleyn ende groot, tot dat sy moede werden, ende die duere niet vinden en costen.

† 4.Reg. 6.c.18 Sap. 19.d.16

12

Ende die mannen spraken tot Lot: Hebt ghy noch erghens hier eenen toecomenden swager, ende sonen ende dochteren: Ende wie v toehoort in deser stadt, dien brengt wt deser stede.

13

Want wy sullen dese stede verderuen, daerom dat haer geroep groot is voor den HEERE, die ons herwaerts gesonden heeft om haer te verderuen.

14

Doen ghinck Lot henen wt, ende sprack met zijne toecomende swaghers, die zijn dochteren nemen souden: Maect v op, ende gaet wt deser plaetsen. Want de HEERE sal dese stadt verderuen. Maer sy hieldent voor boerde.

15

⁺ Als nv den dagheraet op ghinck, hieten de Enghelen Lot haesten, ende spraken:^† Maect v op, neemt v wijf, ende v twee dochteren die voor handen zijn, dat ghy oock niet en vergaet inder misdaet deser stadt.

+ D vers 15

† Sapi. 10.a.6.

16

Maer doen hijt nv vertooch, grepen die mannen hem, ende zijn wijf, ende zijn twee dochteren byder hant, daerom dat de HEEre

[p. 7r]

zijnder verschoonde, ende brachten hem wt, ende lieten hem buyten voor de stadt.

17

Ende als sy hem hadden wtghebracht, doen spraken sy: Verlost uwe siele, ende en siet niet te rugghe, oock en staet niet inde gheheele contreye: Opten berghe behout v, dat ghi niet en vergaet.

18

Maer Lot sprack tot hen: Och neen, HEEre, siet,

19

Dewijl v knecht genade vonden heeft voor uwen ooghen, soo wout ghy doch uwe barmherticheyt groot maken, die ghy aen my ghedaen hebt, dat ghy mijn siele byden leuen behielt. Ick en can my niet opten berghe behouden. My mochte een ongheual aencomen dat ick storue.

20

Siet, daer is een stadt na by, daer ick in vlien can, ende is cleyn, aldaer wil ick my behouden, sy is doch cleyn, dat mijn siel leuendich blijue.

21

⁺ Doen sprack hy tot hem: Siet, ick heb v oock in desen stucke aenghesien, dat ick de stadt niet om en keere, daer ghy af gesproken hebt.

+ E vers 21

22

Haest v, ende behout v aldaer. Want ick en can niet ghedoen, tot dat ghijder in coemt. Daer af is de stadt ghenoemt Soar.

23

Ende de sonne was opghegaen op Aerden, doen Lot te Soar in quam.

24

Doen^† liet de HEEre solfer ende vier reghenen, vanden HEERE, vanden Hemel af, op Sodoma ende Gomorra,

† Esaie. 13.d.19. Iere. 50.g.40 Osee. 11.b.8. Amos. 4.c.11 Luc. 17.d.29.

25

Ende keerde die stede om, de geheele contreye, ende alle inwoonders der stede ende wat opten lande ghewassen was.

26

Ende zijn^* wijf sach te rugghe, ende wert tot een Soutcolumne.

* Luc. 17.d.32.

27

Maer Abraham maecte hem des morghens vroech op, aen de plaetse^† daer hy ghestaen hadde, voor den HEERE,

† Gene. 18.c.22.

28

Ende keerde zijn aensicht teghen Sodoma ende Gomorra, ende al dat omliggende lant, ende sach toe, ende siet, doen ghinck daer eenen roock op vanden lande, ghelijck eenen roock van eenen ouen.

29

⁺ Want doen Godt de steden in die contreye verdorf, gedacht hy aen Abraham, ende leydde Lot wt die steden, die hy omkeerde, daer Lot in woonde.

+ F vers 29

30

Ende Lot tooch wt Soar, ende bleef op den berghe met beyde zijn dochteren, want hy vreesde hem te Soar te blijuen ende bleef alsoo in een speluncke met beyde zijn dochteren.

31

Doen sprack de Outste tot de ioncste: Onse Vader is out, ende daer en is gheen man meer op Aerden, die ons beslapen conde, na alder werelt wijse:

32

Soo coemt, laet ons onsen Vader wijn te drincken gheuen, ende by hem slapen, dat wy saet van onsen Vader behouden.

33

Alsoo gauen sy haren Vader wijn te drincken, inder seluer nacht.^† Ende de outste ghinck in, ende leyde haer by haren vader. Ende hy en wert dies niet ghewaer, doen sy haer leyde, noch doen sy op stont.

† Leuit. 18.a.7.

4[34]

⁺ Des morghens sprac de Ouste tot de Ioncste: Siet. Ick heb ghisteren by mijnen Vader gheleghen, laet ons hem desen nacht oock wijn te drinck geuen, dat ghy ingaet ende legghet v by hem, dat wy saet van onsen Vader behouden.

+ G vers 4

35

Also gauen sy haren Vader oock dien nacht wijn te drincken. Ende de Ioncste maecte haer op, ende leyde haer by hem, ende hy en wert des niet ghewaer, doen sy haer leyde, noch doen sy op stont.

36

Also werden beyde de dochteren Lots beurucht van haren Vader. Ende de Outste baerde eenen sone, dien hiet sy Moab, van dien quamen de Moabiten tot op desen dach van heden.

37

Ende de Ioncste baerde oock eenen sone, dien hiet sy, dat kint Ammi, van dien quamen de kinderen Ammon, tot op den dach van heden.