Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Hoe God Abrahe openbaerde ten anderen mael dat Sara eenen sone hebben soude, ende hem ooc vertoonde, hoe hy Sodoma ende Gomorra soude laten vergaen.

1

⁺ ENde de HEEre openbaerde hem inder Hagen Mamre, doen hy sadt aen de duere zijnder hutten, doen den dach ten heetsten was.

+ A vers 1

2

Ende als hy zijn oogen op hief, ende sach, doen stonden drye mannen teghen hem ouer. Ende doen hyse sach^† liep hy hen te ghemoet vander dueren zijnder hutten, ende neychde hem voor hen neder, op de Aerde,

† Gene. 19.a.2. Acto. 16.b.15.

3

Ende seyde: HEEre heb ic genade geuonden voor uwen oogen, so en gaet niet voorby uwen knecht:

4

Men sal v een weynich waters brengen, ende uwe voeten wasschen, ende rust v onder den boom.

5

^† Ende ick wil v een bete broots brengen, dat ghi v herte laeft, daer nae suldy voort gaen, want daerom sydy tot uwen knecht gecomen. Sy spraken: Doet als ghy geseyt hebt.

† Iudic. 19.b.5. 1.Reg. 28.c.22 Ps. 104.b.15.

6

Abraham haeste hem inder hutten tot Sara ende seyde: Haest v^‡ ende menget drie maten^† Semelmeels, knedet, ende bact koecken.

‡ Mat. 13.e.33. Luce. 13.b.19.

† Semelmeel bediet, ouer al bloemen vanden mele, den doest.

7

Maer hy liep totten runderen, ende haelde daer een fijn goet calf, ende gaft den Ionghen: Die haeste hem ende bereydet.

8

Ende hy droech op boter ende melc, ende vanden calue dat hy bereyt hadde, ende settet hen voor ende trat voor hen, onder den boom,^* ende si aten.

* Gen. 19.a.3. Iudic. 13.c.16. Iob. 12.d.19.

9

⁺ Doen spraken sy tot hem, waer is v wijf Sarah? Hy antwoorde: D er binnen inder hutten.

+ B vers 9

10

Doen sprack hy: Ick wil weder tot v comen, en ick leue, Siet, so sal Sara v wijf eenen sone hebben. Dat hoorde Sara achter hem, achter de duere der hutten,

11

^† Ende sy waren beyde, Abraham ende Sara out ende wel bedaecht so dattet Sara niet meer en ginck nader vrouwen aert,

† Luce. 1.b.18.

12

Daerom loechse by haer seluen, ende seyde:^* Nv ic out ben, sal ic noch met wellust omgaen, ende mijn^† Heere ooc out is?

* Eccli. 25.a.4

† 1.Pet. 3.a.6.

13

Doen sprac de HEERe tot Abraham: Waerom lacht dies Sara, ende seyt: Meyndy dattet waer is, dat ic noch baren sal, so ick toch out ben?

14

Soude dan den HEEre wat onmogelijck zijn? Ontrent dese tijt wil ick weder tot v comen, en ic leue, so sal Sara eenen sone hebben.

15

Doen loochendet Sara ende seyde: Ick en hebbe niet gelachen, want si vreesde. Maer hy seyde: Ten is soo niet, ghy hebt gelachen.

16

Doen stonden die mannen op van daer ende keerden hen tegen Sodoma: Ende Abraham ghinck met hen dat hyse gheleydde.

17

⁺ Doen seyde de HEERE: Hoe can ick Abraham verberghen wat ic doe?

+ C vers 17

18

Aenghesien hy een groot ende machtich volck werden sal,^† ende alle volcken op aerden in hem gebenedijt worden sullen,

† Gene. 12.a.2.

19

Want ick weet, hy salt beuelen zijnen kinderen ende zijnen huyse nae hem, dat si des HEEREN weghen houden ende doen wat recht ende goet is, op dat

[p. 6v]

de HEERE op Abraham comen late, wat hy hem toegheseyt heeft.

20

Ende de HEERE sprack:^† Daer is een gheroep te Sodoma ende Gomorra, dat is groot, ende hare sonden die zijn seer swaer.

† Ezec. 16.f.49

21

Daerom wil ick af varen, ende sien oft si dat alle ghedaen hebben,^† nae den roep, die voor my ghecomen is, oft dattet alsoo niet en is, dat ict wete.

† Ionas. 1.a.2.

22

Ende die mannen keerden haer aensicht ende ghingen na Sodoma.^† Maer Abraham bleef staende voor den HEERE,

† Gen. 19.e.27.

23

Ende ginck tot hem,^* ende seyde: Wildy dan den rechtuaerdighen met den Godloosen te niete doen?

* 4.Es. 7.d.36.

24

Het mochten misschien vijftich Rechtuaerdighe inder stadt zijn, soudy die oock te niete doen, ende dier plaetsen het niet vergheuen om der vijftich gherechtighen wille, die daer in waren?

25

Dat sy verre van v, dat ghy dat doen soudt, ende dooden den gerechten met den godloosen, dat die gherechte sy ghelijck als de godloose. Dat sy verre van v, ghy die alder werelt rechter zijt, ghy en sult also niet oordeelen.

26

⁺ De HEERE sprack: Vinde ick vijftich gherechtighe te Sodoma inder stadt, so wil ick om haren twille al de plaetsen vergheuen.

+ D vers 26

27

Abraham antwoorde ende seyde: Och siet, ick heb my onderwonnen te spreken met den HEERE,^* hoe wel ick Aerde ende Asschen ben.

* Genes. 2.b.7.

28

Daer mochten misschien vijf min dan vijftich gherechtige in zijn, woudy dan de gheheele stadt verderuen om der vijf wille? Hy sprac: Vinde icker in vijfenveertich soo en wil ickse niet verderuen.

29

Ende hy voer voort met hem te spreken, ende seyde: Men mochter misschien veertich daer in vinden. Maer hy sprack: Ick en wil hen niet doen, om der veertich wille.

30

⁺ Abraham sprack:^* En weest niet gram HEERE, dat ick noch meer spreke, men mochter misschien dertich daer in vinden. Maer hy sprack: Vinde icker dertich daer in soo en wil ick hen niet doen.

+ E vers 30

* Iudic. 6.g.39.

31

Ende hy sprack: Och siet, ick hebbe my onderwonnen te spreecken met den HEEre, men mochter misschien twintich daer in vinden. Hy antwoorde, Ick en wilse niet verderuen, om der twintich wille.

32

Ende hy sprack: Och en weest niet gram HEERE dat ick alleen noch eens spreke, men mochte misschien thien daer in vinden. Maer hy sprack: Ick en wilse niet verderuen om der thienen wille.

33

Ende de HEERE ghinck henen, doen hy met Abraham wtghesproken had. Ende Abraham ghinck weder henen, aen zijn plaetse.