Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Hoe dat Agar beurucht wort van Abram ende baerde Ismael, ende hoe Agar vliede van Sara haerder vrouwe, ende de Enghel haer vertrooste.

1

⁺ SArai Abrams wijf en baerde hem niet, maer sy had een Egiptische dienstmaecht, die hiet Hagar,

+ A vers 1

2

Ende sy sprack tot Abram:^† Siet, de HEEre heeft my toeghesloten, dat ick niet ghebaren en can,^* lieuer, legt v by mijn dienstmaecht, oft ic misschien wt haer my bouwen mochte.

† Esa. 66.b.9

* Gen. 30.a.1.

3

Abram die hoorde de stemme Sarai. Doen nam Sarai Abrams wijf haer Egiptische dienstmaecht Hagar, ende gafse Abram haren man ten wijue, na dien dat sy thien iaer int landt Canaan ghewoont hadden.

4

Ende hy leyde hem by Hagar, die werdt beurucht. Alsoo sy nv sach dat sy beurucht was, achte sy haer vrouwe cleyn voor haer.

5

⁺ Doen seyde Sarai tot Abram: Ghy doet onrecht aen my, ick heb mijn dienst-maecht by v gheleyt, maer nv sy siet, dat sy beurucht gheworden is, moet ick minder gheacht zijn voor haer: De HEEre sy een rechter tusschen v ende my.

+ B vers 5

6

Maer Abram sprack tot Sarai: Siet, uwe maecht is onder v ghewelt, doet met haer alsoot v behaecht. Doense nv Sarai woude verootmoedigen, vloot sy van haer.

7

Maer de Enghel des HEEren, vantse by eender waterfonteynen, inder woestijnen, te weten, byder fonteynen aenden wege tot Sur,

8

Die sprack tot haer: Hagar Sarai dienstmaecht van waer coemdy? Ende waer wildy henen? Sy sprack: Ick ben van mijnder vrouwen Sarai gheuloden.

9

Ende de Enghel des HEEren sprac tot haer: Keert wederom tot uwer vrouwen, ende verootmoedicht v onder haer hant.

10

⁺ Ende de Enghel des HEEren sprac tot haer: Ick wil v saet alsoo vermeerderen, dattet van grooter menichten niet ghetelt en sal moghen wordden. Noch seyde de Enghel des HEEren tot haer:

+ C vers 10

11

Siet,^† ghy zijt beurucht gheworden, ende ghy sult eenen soon baren, diens naem suldy Ismael heeten, om dat de HEEre uwe allendicheit verhoort heeft.

† Gene. 17.c.19. Iudic. 13.a.3. 4.Re. 4.b.16 Luc. 1.b.13.

12

Hy sal een wilt mensche zijn. Sijn hant teghen eenen yeghelijcken, ende een yeghelijcx hant tegen hem, ende sal tegen alle zijn broeders ouer woonen.

13

Ende sy hiet den Naem des HEEren, die met haer sprack: Ghy Godt siet my. Want sy sprack: Ghewisselijcken heb ick hier ghesien dien, die my hier na aenghesien heeft.

14

Daerom hiet sy, die fonteyne, een fonteyn des leuens, die my aengesien heeft, welcke fonteyne is tusschen Kades ende Bared.

15

^† Ende Hagar baerde Abram eenen sone. Ende Abram hiet den sone, die hem Hagar baerde, Ismael.

† Gala. 4.c.22.

16

Ende Abram was sesentachtentich Iaer out, doen hem Hagar den Ismael baerde.