Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Hoe dat Abraham ten derden mael de belofte ontfinck, dat hem God dat Landt gaf, ende hem voorseyde dat zijn saet in een vreemt Landt dienen soude, ende wederom verlost wordden.

1

⁺ NA dese gheschiedenissen ghebuerdet dat tot Abram gheschiede, dat woort des HEEren, in een gesichte, ende sprack: En vreest v niet Abram^* ick ben uwen schilt ende uwen seer grooten loon.

+ A vers 1

* Iob. 22.c.23.

2

Maer Abram sprac: HEEre, HEEre, wat wildy my gheuen? Ick gae henen sonder kinderen. Ende mijn huysknecht, dese Eleazar van Damasco heeft eenen sone.

3

Ende Abram sprack noch, my en hebdy gheen^† gheslachte gegheuen, ende siet de sone mijns ghesins, sal mijn erfghenaem zijn.

† Saet.

4

Ende siet, de HEEre sprac tot hem: Hy en sal niet uwe erfgenaem zijn, maer die van uwen lichaem comen sal, die sal v erfghenaem zijn.

5

Ende hy hiet hem wtgaen, ende seyde:^‡ Siet na den Hemel ende telt de Sterren, condise tellen? Ende

‡ Deu. 10.d.22 Iere. 33.d.22. Rom. 4.d.18. Esai. 49.d.18

[p. 5v]

seyde tot hem: Also sal v saet werden.

6

Abram^† geloofde den HEEre, ende dat rekende hy hem tot gherechticheyt.

† Roma. 4.a.3. Gall. 3.a.6. Iacobi. 2.c.23.

7

⁺ Ende hy sprack tot hem: Ick ben de HEEre^‡ die v van Vr, wt Caldea geleyt heb^* dat ick v dit lant te besitten gaue.

+ B vers 7

‡ Gen. 11.d.31.

* Psa. 105.b.11

8

Abram sprac: HEEre HEEre waer by sal ick dat mercken, dat ick dit landt besitten sal?

9

Ende hi sprac tot hem:^† Brengt my een dryeiarige koe, ende een dryeiarige gheyte, ende eenen drieiarighen Ram, ende een Tortelduyue, ende een Ionghe duyue.

† Ier. 34.d.18

10

Ende hy bracht hem sulcx alle, ende hy deylde het midden van malcanderen, ende leyde dat een deel teghen den anderen ouer. Maer die vogelen en deylde hy niet.

11

Ende dat gheuoghelte viel op dat aes. Maer Abram iaechdese daer af.

12

⁺ Doen nv de sonne onder gegaen was, viel eenen diepen slaep op Abram. Ende siet, verschrickinge ende groote duysternis oueruiel hem.

+ C vers 12

13

Doen sprack hy tot Abram.^† Dat suldy weten dat v saet sal vreemt zijn, in een vreemt lant dat zijn niet en is, daer salmense dwingen te dienen, ende plagen, vierhondert iaer,

† Act. 7.a.6. Exo. 12.f.40. Iudic. 5.b.10. Gala. 3.c.17.

14

Maer ick wil rechter zijn ouer dat volc, wiens knechten sy worden sullen.^* Daer na sullen sy wt trecken met veel goets,

* Exo. 12.e.36.

15

^† Ende ghy sult varen tot uwen vaderen met vrede, ende in goeden ouder begrauen worden.

† Gen. 25.a.6.

16

Maer^* sy sullen na vier mans leuen weder hier comen:^† Want de misdaet der Amoriten en is noch niet geheel hier.

* Ge. 46.a.4

† Deu. 20.c.17

17

Als nv de sonne onder ghegaen ende duyster geworden was, siet doen roocte eenen ouen^* ende een viervlamme voer tusschen die stucken wech.

* Iudic. 6.d.21

18

In dien daghe maecte de HEEre een verbont met Abram^* ende sprack: Vwen sade wil ick dit lant geuen, van dat water Egipten aen, tot aen dat groote water Phrath,

* Gen. 12.b.7. 24.a.7. Deut. 1.b.8. 3.Reg. 4.b.21

19

De Keniten, de Kinisiten, de Kaomoniten,

20

de Hethiten, de Pheresiten, de Ruesen,

21

de Amoriten, de Cananiten, de Gergesiten, de Iebusiten.