Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Hoe dat Lot gheuanghen wort, ende Abraham hem verlost, ende Melchisedech broot ende wijn bracht Abraham, ende seghende den seluen.

1

⁺ ENde het gheschiede ter tijt des Conincx Amraphel van Sinear, Arioch des Conincx van Elassar, KedorLaomor des Conincx van Elan, ende Thideal des Conincx der Heydenen,

+ A vers 1

2

Dat sy streden met Bera de Coninck van Sodoma, ende met Birsa de Coninck van Gomorra, ende met Sineab de Coninck van Adama, ende met Senebir de Coninc van Seboim, ende met de Coninck van Bela die Soar heet.

3

Dese quamen te samen in dat dal Siddim, daer nv de soute See is.

4

Want sy waren twelf iaer onder de Coninck KedorLaomor gheweest, ende int derthienste iaer waren sy van hem afgheuallen.

5

Daerom quam KedorLaomor ende de Coninghen die met hem waren, int veerthiende iaer, ende sloeghen de Ruesen tot Astarot, Karnaim, ende de Susim te Ham,^* ende die Emim inden velde Kariathaim,

* Deut. 2.b.9.

6

Ende de Horiten op haren geberchte Seir, tot aen de breede Pharan, welc aen de woestijne paelt.

7

Daer na keerden sy om, ende quamen aen de fonteyn Mispat, dat is Kades, ende sloeghen dat heele lant der Amalekiten, daer toe de Amoriten, die te Hazezon Thamar woonden.

8

⁺ Doen trock de Coninck wt van Sodoma, de Coninck van Gomorra, de Coninck van Adama, de Coninck van Seboim ende de Coninc van Bela, die Soar hiet, ende stelden hen te strijden int dal Siddim,

+ B vers 8

9

Teghen KedorLaomor, de Coninck van Elam, ende teghen Thideal de Coninck der Heydenen, ende teghen Amraphel de Coninc van Sinear, ende teghen Arioth de Coninck van Elassar, vier Coninghen teghen vijue.

10

Ende in dat dal Siddim waren veel leem cuylen.

Maer de Coninck van Sodoma ende Gomorra werden aldaer inde vlucht geslaghen, ende neder geleyt. Ende watter ouer bleef, vloot op dat gheberchte.

11

Doen namen sy alle Haue te Sodoma ende Gomorra, ende alle spijse, ende trocken van daer.

12

Ende sy namen oock met hen Lot, Abrams broeders sone, ende zijn haue, want hy woonde te Sodoma ende sy trocken van daer.

13

⁺ Doen quam daer een die ontloopen was, ende seydet Abram aen, den vreemden,^* die daer woonde in den Haghen Mamre, des Amoriten, de welc een broeder Escol ende Aner was. Dese waren met Abraham int verbont.

+ C vers 13

* Genes. 13.c.18.

14

Als nv Abram hoorde dat zijn broeder gheuanghen was^† wapende hy zijn knechten driehondert ende achthien, in zijnen huyse geboren, ende iaechde hen na tot Dan toe,

† Iosue. 10.b.7. Iere. 41.c.12. 1.Reg. 30.b.9.

15

Ende deylde hem, ende viel tsnachts ouer hen met zijnen knechten, ende sloechse ende iaechdese tot Hoba toe, die ter slincker hant der stadt Damasco leyt,

16

^† Ende bracht alle haue weder, daer toe ooc Lot zijnen broeder, met zijnder hauen, ooc de wijuen ende dat volck.

† Iob. 29.b.17.

17

Als hy nv weder quam vanden slaghe des KedorLaomor, ende de Coningen met hem,^* doen ghinck hem teghen de Coninck van Sodoma, in dat velt dat des tsconincx dal hiet.

* Num. 31.b.13.

18

⁺ Maer^* Melchisedech de Coninc van Salem droech broot ende wijn voort. Ende hy was een Priester Godts, des Alderhoochsten,

+ D vers 18

* Heb. 7.a.1.

19

Ende ghebenedijde hem, ende sprack: Ghebenedijt zijt ghy Abram den hoochsten Godt, die Hemel ende Aerde besidt,

20

Ende gheloeft sy Godt de Hoochste, die v Vianden in v hant besloten heeft,

21

Ende den seluen ghaf Abram de thiende van alderley.

22

Doen sprack de Coninck van Sodoma tot Abram: Gheeft my de lieden, die goeden behout ghy.

23

Maer Abram sprack tot den Coninck van Sodoma: Ick heffe mijn handen op tot den HEERE den hoochsten Godt, die Hemel ende Aerde besit,

24

Dat ick van alle dat v is niet eenen draet noch schoenriem nemen en wil, dat ghy niet en segt, ghy hebt Abram rijck ghemaect,

25

Wtghenomen, wat de Ionghers verteert hebben, ende de mannen Aner, Escol ende Mamre, die met my ghetoghen zijn, die laet haer deel nemen.