Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Hoe dat God om der menscen sonden wille die gheheele werelt liet vergaen.

1

⁺ MAer doen de menschen begosten te vermeerderen op Aerden, ende wonnen hen dochteren.

+ A vers 1

2

Doen sagen de kinderen Godts nae de dochteren der menschen, dat si schoon waren, ende namense wijue, die welcke si alleen wouden.

3

Doen sprac de HEEre: De menschen willen hen mijnen gheest niet meer laten straffen, want si zijn vleesch:^† Ick wil hen noch respijt gheuen .C. ende twintich Iaer.

† 1.Pet. 3.c.20.

4

In dien tijden warender ooc tyrannen op Aerden. Want nae dien dat de kinderen Gods de dochteren der menschen besliepen, ende hen kinderen wonnen,^† werden daer wt gheweldighe ende vermaerde lieden inder Werelt.

† Baruc. 3.d.26 3.Mach. c.

5

^* Maer doe de HEEre sach, dat der menschen boosheydt groot was op Aerden, ende alle dat opset, ende soecken haerder herten, alleen boos was altijt.

* Genes. 8.d.21.

6

^† Doen beroudet hem, dat hy den Mensche ghemaect had op Aerden, ende tbecommerde hem in zijn hert,

† 1.Reg. 15.c.11. 2.Re. 24.d.16

7

⁺ Ende sprac: Ic wil de menschen die ic geschapen heb, te niete doen vander Aerden, vanden Menschen aen tot dat Vee, ende tot den ghewormte toe, ende tot den voghelen onder den Hemel toe. Want het berout my, dat icse ghemaeckt heb.

+ B vers 7

8

Maer^* Noah vant ghenade voor den HEERE.

* Esaie. 42.a.1. Math. 3.b.17. 17.a.5. Ecclesi. 44.b.17.

9

Dit is dat geslachte Noah: Noah was een vroom man, ende sonder veranderinghe, ende leyde een godlijck leuen tsinen tijde,

10

Ende wan drie Sonen, Sem, Ham, Iaphet.

11

Maer de Aerde was verdoruen voor Gods oogen, ende vol moetwils.

12

Doe sach God op Aerden, ende siet, si was verdoruen, want alle vleesch had sinen wech verdoruen op Aerden.

13

⁺ Doe sprack Godt tot Noah: Dat eynde van allen vleesch is gecomen voor my, want de Aerde is vol boosheyts van hen. Ende siet daer, ick wilse verderuen met der Aerden.

+ C vers 13

14

Maect v een Arcke van Dennen hout, ende maeckt cameren daer in, ende bepectse met peck, binnen ende buyten,

15

Ende maecktse aldus: Drie hondert ellen sy de lencte, vijftich ellen de wijde, ende dertich ellen de hoochte.

16

Een venster suldy daer in maken bouen aen, een elle groot. De duere suldy midden in haer zijde setten. Ende sal drie solders hebben, eenen onder, den anderen int middel, den derden inder hoochte.

17

Want siet, ick wil een diluuie met water laten comen op Aerden, om te verderuen alle dat vleesch, daer eenen leuenden adem in is onder den Hemel. Al wat op Aerden is, sal ondergaen.

18

⁺ Maer met v wil ick een verbont maken, ende ghi sult inder Arcken gaen, met uwen Sonen, met uwen Wijue, ende met uwer sonen Wijuen.

+ D vers 18

19

Ende ghy sult met v inder Arcken nemen alderley Dier van allen vleessche, van elcx een paer, een^* Hy ende een^† Sy, dat si leuende blijuen by v.

* Manneken.

† Wijfken.

20

Vanden voghelen nae haerder aert, vanden Vee nae zijnder aert, ende van alderley ghewormte op Aerden, nae zijnder aert. Van dien allen sal van elcx een paer tot v ingaen, dat si leuende blijuen.

21

Ende ghy sult alderley spijse tot v nemen, diemen eet, ende ghy sultse by v vergaderen dat si v ende hen tot onderhoudinghe daer sy.

22

Ende^† Noah dede alle wat hem God gheboot.

† Hebre. 11.b.7.