Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Hoe dat Menschelijcke gheslachte vermenichfuldicht wordt, Adam ende Eua in Cain ende Abel, ende hoe Cain Abel versloech, ende Cain vluchtede.

1

⁺ ENde^* Adam bekende zijn wijf Heua, ende si wert beurucht, ende baerde den Kain, ende sprack: Ic heb ghecreghen den man des HEEren.

+ A vers 1

* Act. 27.d.26.

2

Ende sy voer voort, ende baerde Habel sinen broeder, ende Habel werdt een schaepherder, maer Kain wert een ackerman.

3

Maer het gebuerde na sommige dagen, dat Kain den HEEre offer brachte vanden vruchten des velts.

4

Ende Habel bracht oock vanden eerstelinghen zijnder schapen, ende van haren vette.^† Ende de HEEre sach genadichlijc aen, Habel ende sinen offer:

† Hebre. 11.a.4.

5

Maer Kain en sinen offer en sach hy niet ghenadichlijc aen. Doen wert Kain seer toornich, ende zijn ghelaet veranderde hem.

6

Doen sprac de HEEre tot Kain: Waerom wort ghy toornich, ende waerom verandert hem v gelaet?

7

Ist niet also? Wanneer ghy vroom zijt, so zijt ghi aengenaem: Maer zijt ghy niet vroom, so rust de sonde voor de duere. Maer laet ghy haer niet haren wille, maer heerschapt ouer haer.

8

⁺ Doen sprack Kain met zijnen broeder Habel. Ende tgebuerde, doen si opten velde waren, verhief hem Kain tegen sinen broeder Habel,^* ende sloech hem doot.

+ B vers 8

* Sapi. 10.a.3. 1.Ioan. 3.b.12

9

Doen sprac de HEEre tot Kain: Waer is v broeder Habel? Mer hy sprac: Ick en weets niet, sal ick mijns broeders bewaerder zijn?

10

Maer hy sprac: Wat hebdy ghedaen?^* De stemme van ws broeders bloet roept tot my vander Aerden,

* Heb. 12.d.24

11

Ende veruloect zijt ghy nv opter Aerden, die opgedaen heeft haren mont, ende ws broeders bloet van uwen handen ontfangen.

12

Als ghy den Acker bouwen sult, so en sal hy v voortaen zijn vermogen niet gheuen.^* Onstadich ende vluchtich suldy zijn op Aerden.

* Pro. 28.c.17.

13

Maer Kain sprac tot den HEERE: Mijn sonde is grooter, dan dat si my vergheuen worden mach.

14

Siet, ghy drijft my heden wt den Lande, ende ick moet my voor v aensicht verbergen,^† ende moet onstadich ende vluchtich zijn op Aerden. Soo salt my gaen, dat my dootslae, so wie my vint.

† Iob. 15.c.20.

15

Maer de HEEre sprac tot hem: Neen, maer wie Kain dootslaet,^* dat sal seuenfout gewroken werden.⁺ Ende de HEEre maeckte een teeken aen Kain, dat niemant hem en versloege, wie hem ooc vonde.

* Gen. 4.d.24.

+ C vers 15

16

Also ginc Kain vanden aensicht des HEEren, ende woonde int landt Nod, op gheen zijde Eden teghen den Oosten.

17

Ende Kain bekende zijn wijf, die wert swanger, ende baerde Hanoch, ende hy boude een Stadt, die noemde hy na sijns soons naem, Hanoch.

18

Maer Hanoch wan Irad: Irad wan Mahuiael: Mahuiael wan Mathusael: Mathusael wan Lamech.

19

⁺ Lamech nam twee wijuen, die een hiet Ada, dander Silla:

+ D vers 19

20

Ende Ada wan Iabel, van dien zijn gecomen die in de hutten woonden, ende Vee hadden:

21

Ende zijn broeder hiet Iubal, van dien zijn gecomen die Vedelaers ende Pijpers.

22

Maer Silla wan ooc, namelijc, den Tubalkain, den meester in alderley metael ende ijserwerc. Ende de suster Tubalkain was Naema.

23

Ende Lamech sprac tot sinen wijuen, Ada ende Silla: Ghi wijuen Lamech, hoort mijn reden, ende merct wat ic segge: Ick heb eenen man verslagen, my tot eender wonden, ende een Iongelinc my tot eender buyle.

24

^† Kain sal seuenwerf gewroken worden: Maer Lamech seuenentseuentich weruen.

† Gene. 4.c.15.

25

Adam bekende noch eens zijn wijf, ende sy baerde eenen sone, dien hiet si^† Seth: Want Godt heeft my (sprack si) een ander Saet geset voor Habel, die Kain gedoot heeft.

† Eccle. 49.c.19

26

Ende Seth wan ooc eenen sone, ende hiet hem Enos. Ter seluer tijt begostmen te prediken van des HEEren Naem.