Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hoe dat de Slange den Mensce bedrooch, ende vermaledijt wert. Hoe Adam ende Eua tghebot braken, ende daerom haer cruys van Gode ontfingen. Hoe si haer ontschuldichde, ende wt den Paradise ghedreuen werden.

1

⁺ ENde de Slanghe was listiger dan alle dieren opten velde, die Godt de HEEre ghemaect had, ende sprack totten Wijue: Ia, soude God geseyt hebben, Ghy en sult niet eten van alderley Boomen inden Hof?

+ A vers 1

2

Doe sprac dat Wijf totter Slangen: Wy eten vanden vruchten der boomen inden Hof.

3

Maer vanden vruchten des booms midden inden Hof, heeft God geseyt: En etet daer niet af, en roert hem ooc niet aen, dat ghi niet en sterft.

4

Doe sprac de Slanghe totten Wijue:^† Ghy en sult de doot geensins steruen.

† Sapi. 2.d.24 2.Cor. 11.a.5. Ioan. 8.d.44

5

Maer Godt wetet, dat in welcken daghe, dat ghy daer af eet, so sullen v oogen geopent worden, ende sult zijn als God, ende weten wat goet ende quaet is.

6

Ende dwijf sach aen dat vanden Boom goet te eten waer, ende lieflijc aen te sien, dattet eenen lustigen Boom was, dewijle hy cloec maecte. Ende nam van de vrucht, ende adt, ende gaf haren man ooc daer af, ende hy adt.

7

⁺ Doe werden haerder beyder oogen geopent, ende werden ghewaer dat si naect waren, ende vlochten vijchbladeren tsamen, ende maecten hen voorschoten.

+ B vers 7

8

Ende si hoorden de stemme Gods des HEEren, die inden Hof ginc, doen den dach koel geworden was. Ende Adam verborch hem met sinen Wiue voor daensicht Gods des HEEren, onder de boomen inden Hof.

9

Ende God de HEEre riep Adam, ende sprac tot hem: Waer sydy?

10

Ende hy sprac: Ic hoorde v stemme inden Hof, ende vreesde my, want ic ben naect, daerom verberchde ick my.

11

Ende hy sprac: Wie heuet v geseyt, dat ghy naect zijt, en hebdy niet geten vanden boom daer ick v af gheboot, ghy en sout niet daer af eten?

12

Doen sprac Adam: Dat Wijf die ghy my toe ghegeuen hebt, gaf my vanden boom, ende ic adt.

13

⁺ Doe sprack God de HEEre totten Wijue: Waerom

+ C vers 13

[p. 2r]

hebdy dat gedaen? Dat Wijf sprack: De Slange heeft mi also bedrogen, dat ic adt.

14

Doe sprack God de HEERE totter Slangen: Want ghy sulcx gedaen hebt, so sydy veruloect voor alle Vee, ende onder alle dieren opten velde, op uwen buyck sult ghy gaen ende aerde eten v leuen lanc.

15

Ende ic wil viantschap setten tusschen v ende den Wijue, ende tusschen uwen sade ende haren sade.^* Dat selue sal v dat hooft vertreden, ende ghy sult hem in de versenen steken.

* Collo. 2.b.15.

16

Ende totten Wijue sprac hy: Ick wil v veel smerten toe seynden, als ghy beurucht wort. Ghy sult met smerte kinderen baren:^† Ende uwen wille sal uwe Man onderworpen zijn, ende hy sal v Heere zijn.

† 1.Co. 14.e.34 1.Timo. 2.b.12

17

⁺ Ende tot Adam sprac hy: De wijle ghy verhoort hebt de stemme ws Wijfs, ende gegeten vanden boom, daer ick v af geboot, ende sprac: Ghy en sult daer niet af eten,^* veruloect so sy den Acker om uwen wil, met commer suldy v daer op generen v leuen lanc.

+ D vers 17

* Gene. 5.d.29.

18

Doornen ende dijstelen sal hy v dragen, ende ghi sult dat cruyt opten velde eten.

19

Int sweet ws aensichts suldy v broot eten, tot dat ghy weder tot Aerde wort, daer ghy af ghenomen zijt,^* want ghy zijt Aerde, ende sult weder tot Aerde werden.

* Eccle. 17.a.7.

20

Ende Adam hiet zijn wijf Heua, daerom dat si een Moeder is alder leuendigen.

21

Ende God de HEEre maecte Adam ende sinen Wijue, rocken van vellen, ende trocse hen aen.

22

Ende God de HEEre sprac: Siet, Adam is geworden als onser een, ende weet wat goet ende quaet is, Maer nv dat hy niet wt en strecke zijn hant, ende breke ooc vanden boom des leuens, ende ete, ende leue eewelijc.

23

Doen liet hem God de HEEre wt den Hof Eden, dat hy dat Velt boude, daer hy van ghenomen is,

24

Ende dreef Adam wt, Ende leyde voor den Hof Eden den Cherubim, met een bloot houwende Sweert, om te bewaren den wech totten Boom des leuens.