Den Bibel, Inhoudende dat Oude ende Nieuwe Testament (Biestkensbijbel)

[p. 1v]

¶ Dat .ij. Capittel.

¶ Hier wert verhaelt dat eerste Capittel, ende de vier Hooft wateren des Paradijs, Hoe dat Eua gheschapen, ende den houwelijcken staet van Gode ingheset werdet.

1

⁺ ALsoo wert volbracht Hemel ende Aerde, met haer geheel heyr,

+ A vers 1

2

Ende alsoo volbracht Godt ten seuensten daghe sine wercken die hy gemaect hadde.^† Ende ruste op den seuensten dach van alle zijn wercken die hy maecte,

† Exod. 20.b.11 Hebre. 4.b.4.

3

Ende segende den seuensten dach, ende heylichden, daerom dat hy op den selfden gerust hadde van alle zijn wercken, die Godt schiep ende maecte.

4

Alsoo is Hemel ende Aerde gheworden, doen si gheschapen zijn, ter tijt, als God de HEEre de Aerde ende den Hemel maecte,

5

Ende alderley boomen opten velde, die te voren noyt gheweest en waren op Aerden. Ende alderley cruyt opten velde dat te voren noyt gewassen en was. Want Godt de HEERE en had noch niet laten reghenen op Aerden, Ende daer en was gheen Mensche die dat lant boude.

6

Mer eenen Neuel gincker op vander Aerden, ende maecte vochtich al dlant.

7

⁺ Ende God de HEERE maecte den Mensche wt den Aerden clompe.^† Ende hy blies hem in, den leuendigen adem in zijn Nuese. Ende also wert de mensce een leuende siele.

+ B vers 7

† Acto. 17.d.25. 1.Cor. 15.e.45 Iob. 33.a.4. 4.Esd. 3.a.5.

8

Ende Godt de HEEre plantede eenen Hof in Eden, tegent Oosten, ende sette den mensche daer in, die hy ghemaect hadde.

9

Ende God de HEEre liet opwasssen wt der Aerden alderley Boomen, lustich aen te sien, ende goet te eten,^* ende den Boom des leuens midden inden Hof, ende den Boom der kennissen des goets ende des quaets.

* Apoca. 2.a.7.

10

Ende daer ginc van Eden eenen stroom wt, om te wateren den Hof, ende hy deylde hem aldaer in vier Hooftwateren.

11

Dat eerste heet Pison, dat vliet rontom dat gheheele lant Heuila, ende aldaer vintmen gout,

12

Ende dat gout des Lants is costelijc, ende daer vintmen Bedellion, ende den edelen steen Onix.

13

Dat ander water heet Gihon, dat vliet alom dat gheheele Moren Landt.

14

Dat derde water heet Hydekel, dat vliet voor Assyrien henen. Dat vierde water is den⁺ Phrath.

+ Eccle. 24.d.32

15

⁺ Ende Godt de HEEre nam den mensche, ende settede hem inden Hof Eden, dat hy hem soude bouwen ende bewaren.

+ C vers 15

16

Ende God de HEEre geboot den mensche, ende sprack: Ghy sult eten van alderley Boomen inden Hof:

17

Maer vanden Boom der kennissen des goets ende des quaets en suldy niet eten. Want in wat daghe ghy daer van eet, suldy den doot steruen.

18

Ende Godt de HEEre sprack: Ten is niet goet, dat de mensche alleen sy. Ic wil hem een hulpe maken die by hem sy.

19

Want als God de HEEre gemaect hadde vander Aerden alderley dieren opten velde, ende alderley voghel onder den Hemel, doe bracht hyse tot den mensche, dat hy saghe, hoe hyse noemen soude. Want so de Mensche alderley leuende dieren noemen soude, so souden sy heeten.

20

Ende de mensche gaf eenen yeghelijcken Vee, ende voghel onder den Hemel, ende ghedierte opten velde sinen naem. Mer voor den mensche en werdt gheen hulpe gheuonden, die by hem mochte zijn.

21

⁺ Doen liet God de HEEre eenen vasten slaep vallen op den mensce, ende hy ontsliep, ende nam een van sinen Ribben, ende sloot die stede toe met vleesch.

+ D vers 21

22

Ende^† God de HEEre^* boude een wijf wt de Ribbe, die hy vanden mensce nam, ende brachtse tot hem.

† 1.Tim. 2.b.13.

* Maecte.

23

Doen sprac de mensche:^† Dat is doch een been van mijnen beenen, ende vleesch van mijnen vleessche, Men salse Manninne heeten, daerom, dat si vanden Man ghenomen is.

† Mala. 2.c.14 1.Cor. 11.a.7.

24

^* Daerom sal een man sinen Vader ende zijne Moeder verlaten, ende aen sinen Wijue hangen,^† ende si sullen een vleesch zijn, Ende si waren beyde naeckt, de Mensche ende zijn Wijf, ende en schaemden hen niet.

* Mat. 19.a.5. Marc. 10.a.8. Ephe. 5.c.31.

† 1.Cor. 6.c.16