Bewijsstuk.
An edele weerde heeren Burchmeesters ende Scepenen slandts vanden Vryen. Supplieren ende vertooghen met alder reverentie Niclaeys Poels d'oude wylent upperhoofman vande prochie van Artryke, voorts Andries Inghelbrecht, Adriaen vande Weghe, Jooris Sisoy, Jan Matoen, Heindrick Permentier, Pieter Goemaere, Gillis Reyphin, de wedewe van Anthonis Lauwers, Adriaen Erreboudt, Jan van Hulle ende Mathys vande Weghe, alle aerme overbleven prochiaenen vande voors. prochie van Artrycke, hoe zy binde voorleden troubles alle huerlieder goedinghen ende middelen verlooren hebben ende uut de voors. prochie verjaecht syn gheweest van over bet dan neghen jaeren zonder dat zy daer sydert hebben connen ofte moghen verkeeren om de wille vanden viant ende vrybuters, hebbende zy supplianten binnen den zelven tyt in Brugghe ende elders huerlieder leven in groote aermoede gheleet. Ende zy gheirne zouden prouven om wederomme inde zelve prochie by een te wuenen, zo hebben zy gheadviseert daertoe huerlieder wuenplaetse te kiesen de priesteragie ende de hofstede daer wilent Jan van Hulle wuende, staende beeden byden anderen ontrent de kercke, dewelcke plaetsen zy daertoe gheirne zouden bedelven ende sterck maken om jeghens dexcurtien vande vributers ende andere quaetwilleghe persoonen bevrydt te zyne. Dan alzoo hemlieden daertoe van noode es eenighe somme van penninghen ora de zelve fortificatie te doene, en hebben nochte en weten daer toe eenighe middelen overmidts huerlieder voors. aermoede dan midts te vercoopen een goude laken coorcappe die zy tot noch toe bewaert hebben; ende hoewel de zelve coorcappe byde prochiaenen wilent becosticht ende ghecocht es gheweest ten tyde vande revolte van Inghelandt, en zouden de zelve coorcappe nochtans niet durfven ofte willen vercoopen zonder ulieden edele heeren authorisatie ende consent. Tzelve ghemerct, bidden dat ulieden edele believe hemlieden totte voorseyde vercoopinghe te authoriseeren ende by apostille up desen consent te verleenen om de
penninghen te imploieren totte voors. fortificatie, secours ende hulpe vande zelve aerme overblevene prochianen. Daertoe naer rechte ooc zulcke abyten ende goedinghen vande kercke gheemploiert moghen werden, zonderlinghe ghemerct de zelve kercke vande voors. prochie gheheel gheruwineert ende verbrandt es, ende de zelve cappe daer by dien niet en can ghebruuct werden, ende dat de prochianen wederomme in toecommende tyden
Gedeeltelijk auteursrechtelijk beschermd