Bible in duytsche (Delftse bijbel 1477)

§ Capittel .xlvij.

1

ENde hi keerde mi omme ter poerten waert vanden huys: ende daer quamen wateren wt onder den dorpel vanden huys ten oesten waert. Want dat aensichte vanden huys scouwede oest waerts. Ende die wateren liepen neder waert in die rechte zide vanden tempel ter zuitziden waert vanden outare.

2

Ende hi leede mi wt alden wech ter noertpoerten. ende hi keerde mi omme ten weghe buyten der buytenster poerten ende ten weghe die ten oeste waert scouwede. Ende sich die wateren liepen weder ouer vander rechterziden

3

doe die man inquam ten oesten die een coerde in sijn hant hadde: ende hi mat dusent cubitus: ende hi leede mi doer die wateren totten enckelen toe.

4

Ende hi mat echter dusent cubitus ende hi leide mi dore dat water totten knyen. Ende hi mat echter dusent cubitus: ende hi leide mij dore dat water totten lendenen.

5

Ende hi mat dusent cubitus. ende ic en mocht ouer die riuiere niet gaen: want die wateren vander dieper riuieren waren gewassen: datmenre niet ouerwaden en mochte

6

Ende hi seide tot mi. Sekerlijc hebstu dit ghesien des menschen sone. Ende hi leide mi wt: ende hi keerde mi ten ouer vander riuieren

7

Ende als ic mi omme ghekeert hadde. Sich soe stonden op dat ouer der riuieren sere vele bomen van beiden ziden

8

Ende hi seide tot mi Dese wateren die wtcomen te hoepen vanden oesten zabule ende neder loepen ten slechten lande vander wildernissen. sullen in dese zee gaen: ende si sullen wtgaen ende die wateren sullen gesont worden.

9

Ende alle leuende ziele die cruupt soe waer dese riuiere comen sal. si sal leuen: ende het sullen vele visschen genoech wesen: na dien dat daer dese wateren comen sullen. Ende si sullen ghenesen worden ende leuen. alle dinghen daer dese riuiere toecomen sal sullen leuen.

10

Ende op die sullen staen visschers Van engaddi tot engallim si sullen wesen een droghinghe van netten. Vele manieren sullen wesen van haren visschen: als die visschen vander groter zee ende van zeer groter menichten.

11

Mer inden oueren vander riuieren ende inden brocken en sullen si niet gheganst worden: want si sullen wesen ghegheuen in soutputten.

12

Ende op die riuiere sal wtwassen in hare ouer aen beiden ziden alrehande bomen die vrucht draghen. Ende gheen blat en sal van dien bomen vallen: ende hare vrucht en sal niet ghebreken. Tot elker maent sal dat hout bringhen sijne vrucht. want sijn watere comen wt die sanctuarie. Ende dies houts vrucht sullen wesen in spisen: ende sine bladeren te medecinen.

13

Dit seit die here god. Dit is die termijn daer

[p. *586]

ghi in besmetten sult dat lant inden twaelf gheslachten van israhel: want ioseph dubbel mate heeft.

14

Ende ghi sulttet besitten elc gelike als sijn brueder: daer ic mine hant hebbe opgheheuen dat ict uwen vaders gheuen soude Ende dit lant sal v vallen in possessien.

15

Ende dit is die termijn vanden lande ten noertziden waert vander groter zee die wech van ethalon den ghenen die comen van sedada

16

emath berotha sabarim die is in midden van damasco ende dat lant neuen emath dat huys thicon dat is neuen den termijn auran:

17

ende die termijn sal wesen vander zee tot den vrijthoue enon die termijn van damasco: ende vanden noerden totten noerden ende totten termijn van emath sal wesen die noert termijn.

18

Voert die termijn van oest van midden auran ende van die middewaert van damasco ende vander middewart van galaad ende vander middewaert des lants van israhel. soe sal die iordane scheiden: ter oest zee waert meet oec die oestzide.

19

Ende die zuitzide ten zuden waert van thamar totten wateren waert der wedersegghinge te cades: ende die riuier totter groter zee dit is die zuitzide ten zuden waert:

20

ende der zee zide: die grote zee van dien eynde rechteuoert tot dattu coemes tot emath: dit is die zide vander zee.

21

Ende ghi sult v dit lant delen inden gheslachte van israhel:

22

ende gi sulttet v luden legghen in erueachticheit ende den toecomelinghen die tot v comen sullen. die kinderen voertghebracht sullen hebben in midven van v luden: ende si sullen v wesen als in gheboren onder die kinder van israhel. Ende si sullen mit v delen die possessie in midden den gheslachten van israhel..

23

Ende in soe wat gheslachten een toecomelinc is: daer suldi hem possessie geuen seit die here god