Bible in duytsche (Delftse bijbel 1477)

§ Ca .xlviij

1

DIt sijn die namen vanden gheslachten. Vanden eynden van noerden neuen den wech van ethalon die te emath waert gaet dat vrijthof enon die termijn van damasco. ten noerden waert neuen emath: ende die oestzide sal hem wesen die zee. dan een

2

Ende een termine van dan: vander oest ziden totter ziden vander zee. aser een

3

Ende op azers termijn: vander oestziden totter ziden vander zee. neptalim een.

4

Ende op neptalims termijn: vander oestziden totter ziden vander zee manasses een.

5

Ende manasses termijn vander oestziden totter ziden vander zee. effraym een.

6

Ende efsrayms termijn: vander oestzide totter ziden vander zee. ruben een.

7

Ende op rubens termijn: vander oestziden totter ziden vander zee. iudas een.

8

Ende op iudas termijn: vander oestziden totter ziden vander zee sullen die primicien wesen die ghi den here verscheiden sult vijf ende twintich dusent in die wide ende in die lenghede: alsoe elke delen hebben vander oestziden totter ziden vander zee. Ende daer in midden sal die sanctuarie wesen.

9

Die primicien die ghi den here verscheiden sult: die lenghede van vijf ende twintich dusent: ende die wide van thien dusent.

10

Ende dit sullen wesen die primicien der sanctuarien

[p. *587]

ende der priesters. Te noerden der lenghede vijf ende twintich dusent ende ter zee waert ter widen thien dusent. mer ende oec ten oesten die wide thien dusent. Ende ten zuden waert die lengede vijf ende twintich dusent. Ende daer in die middewaert sal des heren sanctuarie wesen.

11

Den priesteren sal die sanctuarie wesen van sadochs sonen. die mijne oeffeninghe hueden: ende die niet en doelden als die kinderen van israhel doelden: alsoe oec die leuiten doelden

12

Ende hem sullen wesen primicien vanden primicien des lants dat heylighe der heilighen: neuen der leuyten termijn.

13

Mer oec ende den leuyten neuen der priesters eynden in lengeden vijf ende twintich dusent: ende in widen thien duseut. Elke lengede sal wesen van vijf ende twintich dusent: ende die wide van thien dusent.

14

Ende si en sullen daer of niet vercopen noch verwisselen: noch men sal die primicie vanden lande niet verlegghen: want si sijn den here gheheylicht

15

Ende die vijf dusent die ouer sijn in die wide ten vijf ende twintich dusent: sullen die leken lande sijn vander poert in te wonen ende in buyten lande. Ende daer in midden sal die stat wesen:

16

ende dit sijn die maten van dien lande: ter noertziden waert vijf hondert ende vyer dusent: ende ter zuitziden waert vijfhondert ende vier dusent: ende ten oestziden vijf hondert ende vier dusent. ende ten westzidenwaert vijf hondert ende vier dusent

17

Ende die buyten lande vander stat sullen wesen ten noert ziden waert twe hondert ende vijftich ende ter zuytziden waert twe hondert ende vijftich: ende ten oesten waert twe hondert ende vijftich ende ter zeewaert twe hondert ende vijftich.

18

Ende dat ouer wesen sal in die lengede nader sanctuarien primicien thien dusent ten oesten ende thien dusent ten westen die sullen wesen als die primicien vander sanctuarien: ende die vruchten van dien lande sullen wesen in broden den ghenen die der stat dienen

19

Ende die der stat dienen. si sullen wercken wt alden geslachten van israhel.

20

Alle die primicien van vijf ende twintich dusent biden vijf ende twintich dusent ten vier ziden ghemeten. salmen verscheiden inden primicien vander sanctuarien: ende ter possessien vander stat.

21

Ende dat ouer sal wesen van allen ziden vander sanctuarien dusent primicien ende der possessien vander stat van ieghen die vijf ende twintich primicien totten termine van oest dat sal des princen wesen: mer oec vander zee ieghen die vijf ende twintich dusent tvtten termine vander zee sal oeck wesen in des princen delen. Ende in midden dien lande sullen wesen die primicien vander sanctuarien ende die sanctuarie vanden tempel:

22

ende vander leuiten possessie ende vander stat possessien in middewaert vanden delen sal des princen wesen: in iudas termijn ende in benyamins termijn: het sal den prince toebehoren.

23

Ende den anderen geslachten vander oestziden totter west ziden: benyamin een.

24

Ende ieghen benyamins termijn vander oestziden totter westen: symeon een

25

Ende op syme-

[p. *588]

ons termijn vander oestziden totter westziden: ysachar een.

26

Ende ysachars termijn vander oestziden toter westziden: zabulon een.

27

Ende op zabulons termijn vander oestziden totter westziden vander zee: gad een

28

Ende op gads termijn ter zuytziden ten zuyden waert ende dat eynde sal wesen van thamar totten wateren der wedersegghinghe te cades: die erueachticheit ieghen die grote zee.

29

Dit is dat lant dattu meten sultste inden lote den gheslachte van israhel: ende dit sijn die delinghe vanden gbeslachten seit die here god.

30

Ende dit sijn die wtganghen vander stat. Vander noertziden sultstu meten vijf hondert ende vier dusent:

31

ende die poerten vander stat salmen nomen namen vanden gheslachten van israhel. Drie poerten vander noertziden. Rubens poerte die een. iudas poerte die een. leuijs poerte die een.

32

Ende ter oestziden vijfhondert ende vier dusent: ende drie poerten. Iosephs poerte die een: benyamins poerte die een: dans poerte die een.

33

Ende ter zuytziden vijfhondert ende vier dusent. sultstu meten. Symeons poerte die een: ysachars poerte die een: zabulons poerte die een.

34

Ende ter westziden vijfhondert vier dusent. ende hare drie poerten. Gads poerte die een: asers poerte die een: neptalims poerte die een.

35

Ende daer al omme ende omme achthie dusent: ende van dien daghe sal der stat name wesen: die here daer in

§ Hier gaet wt ezechiel die prophete

Deese iegenwoerdighe bible mit horen boeken. ende elc boeck mit alle sijne capitelen. bi enen notabelen meester wel overgeset wt den Latine in duytsche ende wel neerstelic gecorrigeert ende wel gespelt: was gemaect te delf in hollant mitter hulpen gods ende bij ons iacob. iacobs soen ende mauricius yemants zoen van middelborch ter eeren gods. ende tot stichticheit ende lerijnge der kersten gelovigen menschen. Ende wort voleijndt. int iaer der incarnatien ons heren duysent vierhondert zeven ende tseventich. den thiendag der maent ianuario. dit is na het origineel geschreven.